تارازدا قالىڭ قار سالدارىن جويۋ جۇمىستارى ءتورتىنشى تاۋلىككە سوزىلدى - فوتو
تۇرعىنداردىڭ پىكىرىنشە، 14 -قازانعا قاراعان ءتۇنى جاۋعان قاردىڭ قالىڭدىعىنداي قار جامبىل وبلىسىندا بۇرىن- سوڭدى بولماعان. ءالى جەرگە تۇسە قويماعان جاسىل جاپىراقتى كومكەرە جاۋعان جىلبىسقى قار بۇتاقتاردى سىندىرىپ قانا قويماي، ەلەكتر جەلىلەرىن دە ىستەن شىعاردى. تەلەفون كابەلدەرى زارداپ شەگىپ، تەلەفون، ينتەرنەت بايلانىستارىنىڭ ۇزىلۋىنە الىپ كەلدى. كوپتەگەن كولىكتەر قۇلاعان بۇتاقتار استىندا قالدى.
«قازاقپارات» تىلشىسىنە تاراز اكىمى نۇرجان كالەندەريەۆ حابارلاعانداي، تاراز بويىنشا ەلەكتر سىمدارى ۇزىلگەن شاعىممەن بارلىعى 1639 شاقىرتۋ تىركەلگەن.
«قازىر 1323 ى قالپىنا كەلتىرىلدى. 22 بريگادا جۇمىس ىستەپ، ەلەكتر جۇيەسىن رەتكە كەلتىرۋدە. وبلىس اكىمىنىڭ وكىمى بويىنشا قالانى جيناۋعا قىزمەت ماماندارىمەن قوسا، قالالىق ۇيىمدار مەن مەكەمەلەردىڭ قىزمەتكەرلەرى دە شىققان. بارلىعى بەس مىڭ ادام جۇمىلدىرىلدى»، - دەدى ول.
ت ج د باسپا ءسوز قىزمەتىنىنىڭ دەرەكتەرىنە سايكەس، ت ج د «جەدەل قۇتقارۋ جاساعى» م م جەدەل قۇتقارۋ جۇمىستارىنا شامامەن 20 رەت شىققان. قۇلاعان بۇتاقتار استىنان 7 جەڭىل كولىك سىرتقا شىعارىلدى. بۇدان باسقا، كوشەلەردى قۇلاعان اعاشتار مەن بۇتاقتاردان تازالاۋ، ادام ءومىرى مەن دەنساۋلىعىنا قاۋىپ اكەلەتىن اعاش بۇتاقتارىن قيۋ جۇمىستارى جۇرگىزىلدى.
