وليمپيادا چەمپيونى دانيار ەلەۋسىنوۆ ءوزى وقىعان مەكتەپتە جاتتىعۋ وتكىزدى - فوتو
چەمپيونمەن قاتار، مەكتەپ وقۋشىلارىنا «استانا» پرەزيدەنتتىڭ كلۋبىنىڭ سپورت مەنەدجەرى يۋريي مەلنيچەنكو مەن «World class» فيتنەس كلۋبىنىڭ ۇستازدارى ساباق بەردى.
ساباق جۇرگىزۋ كەستەسىنە ساي، سپورتشىلار الدىمەن دەنە شىنىقتىراتىن جاتتىعۋلاردى، سونداي-اق، فيتنەستەگى سوڭعى جاتتىعۋلاردى كورسەتىپ شىقتى. وليمپيادا چەمپيونى دانيار ەلەۋسىنوۆ سپورت ادام دەنساۋلىعىنا قاجەتتى فاكتورلاردىڭ بىردەن ءبىرى ەكەنىن كورسەتتى، دەپ حابارلايدى «استانا» پرەزيدەنتتىك كلۋبىنىڭ باسپا ءسوز قىزمەتى.
«دەنە شىنىقتىرۋ پانىندە بالالاردىڭ دەنەسىن شىنىقتىراتىن جاتتىعۋلارعا كوپ كوڭىل بولگەن ءجون. ءبىز بۇگىنگى ساباعىمىزدىڭ باسىندا جانە ساباقتىڭ سوڭىنا قاراي دەنە شىنىقتىراتىن جاتتىعۋلاردى ۇيرەتتىك. ول جاتتىعۋلاردىڭ ءبىرازىن مەن كۇندەلىكتى جاتىعۋلارىمنىڭ اراسىنان قوسقامىن. جالپى، دەنە شىنىقتىرۋ بالالاردىڭ ءبىلىمىن دامىتىپ، دەنساۋلىعىن نىعايتۋ ءۇشىن ەڭ كەرەك پاندەردىڭ ءبىرى. «دەنە شىنىقتىرۋ» جوباسىنىڭ ارقاسىندا بالالار سپورتقا باس بۇرىپ، دەنى ساۋ ۇلت تاربيەلەيمىز دەگەن ويدامىن. شىنىن ايتسام، ءبىر توپ بالامەن جۇمىس ىستەگەننەن گورى، جەكە-جەكە دايىنداعان ۇنايدى. ءبىراق، مىنە، بۇگىن ساباق جۇرگىزە وتىرىپ، مۇعالىمدەردىڭ قادىرىن، جۇمىستارىنىڭ وڭاي ەمەستىگىن تۇسىندىك»، - دەدى د. ەلەۋسىنوۆ.
پرەزيدەنتتىك كلۋبتىڭ مەنەدجەرى يۋري مەلنيچەنكو مەكتەپ وقۋشىلارى سپورتقا مىقتاپ كىرىسسە، بولاشاقتا دانيار ەلەۋسىنوۆ سياقتى چەمپيون بولاتىندارىنا سەنىم ءبىلدىردى.
ايتا كەتەيىك، «دەنە شىنىقتىرۋ» جوباسى - «Samruk-Kazyna Trust» الەۋمەتتىك جوبالاردى دامىتۋ قورىنىڭ قولداۋىمەن باستالعان جوبا جانە بالالار مەن جاسوسپىرىمدەردى دەنە شىنىقتىرۋ مەن سپورتقا شاقىراتىن باستاما.
اۆتور: كەنجەكەي توقتامۇرات قىزى
