تومەن بايىتىلعان ۋران بانكى قويماسىن ۇلتتىق گۆارديا كۇزەتەدى

استانا. قازاقپارات - ءۇلبى مەتاللۋرگيالىق زاۋىتىنداعى تومەن بايىتىلعان ۋران بانكى قويماسىن ەلىمىزدىڭ ۇلتتىق گۆاردياسى كۇزەتەتىن بولادى. بۇل تۋرالى بۇگىن اتالعان زاۋىت وكىلى الەكساندر حودانوۆ ءمالىم ەتتى دەپ حابارلايدى قازاقپارات.

«ءۇلبى مەتاللۋرگيالىق زاۋىتىنىڭ كۇزەتىلەتىن اۋماعىنداعى قويمانىڭ قاۋىپسىزدىگىن ۇلتتىق گۆارديا اسكەرى كۇزەتكە الادى. جالپى، ءبىز مۇنداي ماتەريالدارمەن 40 جىلدان استام جۇمىس ىستەۋدەمىز. بۇل اتوم ەلەكتر ستانسالارى ءۇشىن وتىن دايىنداۋعا ارنالعان شيكىزات سانالاتىن ستاندارتتى ماتەريال. زاۋىت وسى ۋاقىتقا دەيىن مۇنداي ماتەريالدارمەن جۇمىس ىستەپ تۇرعان، بىزدە قانداي دا ءبىر توسىن وقيعا بولعان ەمەس»، - دەدى ول.

حودانوۆتىڭ ايتۋىنشا، تومەن بايىتىلعان ۋران ەۋروپالىق 30В ستاندارتى ۇلگىسىندەگى سيليندردە ساقتالادى. سيليندردىڭ قالىڭدىعى 13 سانتيمەتر، جوعارى كومىرتەكتى بولاتتان جاسالعان.

«بۇل تولىعىمەن قاۋىپسىز قۇرىلعى جانە ماتەريالدىڭ ساقتالۋىنا قامتاماسىز ەتەدى. ول قانداي اپات ورىن السا دا سىرتقا شىعارىندىنىڭ ورىن الۋىنا جول بەرمەيدى»، - دەدى ول.

ونىڭ سوزىنە قاراعاندا، ياردولىق ماتەريالدىڭ قاۋىپسىزدىگىن قامتاماسىز ەتۋگە باعىتتالعان بارلىق شارالارى جۇرگىزىلگەن جانە ونى ماگاتە ساراپشىلارى تولىق تەكسەرىپ، وڭ باعا بەرگەن.

ايتا كەتەيىك، بۇگىن ق ر پارلامەنتى ءماجىلىسىنىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ كەڭەيتىلگەن وتىرىسىندا «ق ر ۇكىمەتى مەن اتوم ەنەرگياسى جونىندەگى حالىقارالىق اگەنتتىك اراسىنداعى قازاقستان رەسپۋبيلكاسىندا اتوم ەنەرگياسى جونىندەگى حالىقارالىق اگەنتتىكتىڭ تومەن بايىتىلعان ۋران بانكىن قۇرۋ تۋرالى كەلىسىمدى راتيفيكاتسيالاۋ تۋرالى» ق ر زاڭىنىڭ جوباسى تالقىلاندى.

 ەستەرىڭىزگە سالا كەتسەك، 2015 -جىلدىڭ 27 - ساۋىرىندە قازاقستان ۇكىمەتى ءوز قاۋلىسىمەن ەلىمىزدە ماگاتە- ءنىڭ تومەن بايىتىلعان ۋران بانكىن «ءۇلبى مەتاللۋرگيالىق زاۋىتى» ا ق- ىندا ورنالاستىرۋ تۋرالى كەلىسىمگە قول قويۋدى ماقۇلداعان بولاتىن. سول جىلدىڭ 27 - تامىزىندا كەلىسىمگە قازاقستان تارابىنان ەرلان ىدىرسوۆ پەن ماگاتە- ءنىڭ باس ديرەكتورى يۋكيا امانو قول قويعان ەدى.

اۆتور: مارلان جيەمباي