اقتوبەدە سەنبىلىككە شىقپاي، تەرەزەدەن قاراپ تۇرعان حالىق وبلىس اكىمىنەن ءسوز ەستىدى

استانا. قازاقپارات- اقتوبەدە سەنبىلىككە شىقپاعان حالىق بەردىبەك ساپاربايەۆتىڭ اشۋىن كەلتىردى دەپ جازادى كەرەك- ينفو.

 تال ەگىلىپ جاتقان اۋلانىڭ الدىن كولىكتەرمەن بوگەپ تاستاعان تۇرعىندار وبلىس اكىمىنەن ءسوز ەستىدى. ءوڭىر باسشىسى كولىكتەردىڭ دابىلعىشتارىن ىسكە قوسسا دا، تۇرعىندار بالكوننان سىعالاپ تۇرىپ، كولىكتى جولدان الىپ تاستاۋعا شىقپادى.

8 - قازان كۇنى نۇر اقتوبە اۋدانىندا مەكتەپ وقۋشىلارى، اتا- انالار، مۇعالىمدەر تال ەگۋمەن اينالىستى. الايدا سەنبىلىككە بارلىق تۇرعىندار شىقپاعان.

ونىڭ ۇستىنە تال ەگىلۋگە ءتيىس جەرلەردى ءبىرقاتار تۇرعىنداردىڭ كولىكتەرى بوگەپ تاستاعان. مۇنداي ەرسى ارەكەتكە شىداماعان بەردىبەك ساپاربايەۆ كولىكتەردىڭ دابىلعىشتارىن ىسكە قوسىپ، بالكوننان قاراپ تۇرعان تۇرعىندارعا ۇرىستى.

«ءبارىڭىز بەدىرەيىپ قاراپ تۇراسىزدار! مىنا اعاشتاردىڭ بارلىعىن كىمگە ەگىپ جاتىر؟ سىزدەرگە ەگىپ جاتىر عوي. جاپ- جاس جىگىتتەر بولىپ ۇيالمايسىڭدار»، - دەپ وبلىس اكىمى نامىسقا تيەتىن سوزدەر ايتتى.

سودان سوڭ بەردىبەك ساپاربايەۆ قاسىندا بولعان تىلشىلەردەن سەنبىلىككە شىقپاعان تۇرعىندار تۋرالى جاريالاۋدى سۇرادى.

«تەرەزەدەن باقىلاپ، ادامداردىڭ جۇمىس ىستەگەنىنە قاراپ تۇر. ولار سەنبىلىككە شىعۋ كەرەك! وسىلار جايلى ەرتەڭ گازەت پەن تەلەديداردا جاريالانسىن. قاجەت بولسا، نومىرلەرىن جازىپ الىڭىزدار. ادامدار تال ەگىپ جاتقانىن كورىپ تۇر. سوندا كولىكتى ارمەن قاراي قويۋعا بولادى عوي»، - دەدى ول.

ايتا كەتەيىك، نۇر اقتوبە اۋدانىندا تاياۋدا ەكى اۆتوكولىك تۇراعى سالىندى. الايدا تۇرعىندار وعان بارۋعا ەرىنەتىن سياقتى. ولار كولىكتى ءدال تەرەزەلەرىنىڭ الدىنا قويۋدى ادەتكە اينالدىرىپتى. ەندىگى رەتتە كولىكتى ءتيىستى جەرگە قويماعاندار ايىپپۇلمەن جازالانادى.

https://www.nur.kz/kk