گولوۆكين الەمدەگى ەڭ قورقىنىشتى بوكسشى دەپ تانىلدى

استانا. قازاقپارات - Round by Round Boxing پورتالى قارسىلاستارىنا ۇرەي تۋعىزاتىن ەڭ قورقىنىشتى ءۇش بوكسشىنىڭ ءتىزىمىن جاسادى، دەپ حابارلايدى Sports.kz.

بۇل توسىن تىزىمدە قازاقستاندىق گەننادي گولوۆكين كوش باستاپ تۇر، ونىڭ قورجىنىندا كاسىبي رينگتەگى 36 جەڭىس (33 ك و) بار جانە ەشقاشان جەڭىلىپ كورمەگەن. ەكىنشى ورىنعا پورتال جۋرناليستەرى رەسەيلىك بوكسشى سەرگەي كوۆاليەۆتى (30-0-1, 26 ك و) قويعان، ال ءۇشىنشى ورىن - امەريكالىق تەرەنس كروۋفوردقا (29-0, 20 ك و) تيەسىلى.

«ورتا سالماقتاعى WBA، IBO، WBC جانە IBF بەلبەۋلەرى بار گولوۆكين بوكس الەمىندەگى ەڭ تانىمال ەسىم. ول ەڭ قاۋىپتى بوكسشى ەكەنىن دالەلدەدى جانە تەك قانا ۇزدىكتەرمەن جۇدىرىقتاسقىسى كەلەدى. كوپتەگەن قارسىلاستار GGG- مەن كەزدەسۋدەن قاشىپ، اتاقتارىنان باس تارتادى»، - دەپ جازدى باسىلىم.

گولوۆكيننىڭ باپكەرى ابەل سانچەس كەلەسى اپتادا گەنناديدىڭ جاتتىعۋعا ورالاتىنىن جانە جەلتوقساندا وتەتىن كەزدەسۋگە دايىندالاتىنىن حابارلاعان ەدى.