قانات يسلام جانكۇيەرلەرىنە قولتاڭباسى بار بوكس قولعاپتارىن ۇلەستىردى - فوتو، كەسكىن
قاناتتىڭ اشىق جاتتىعۋىن تاماشالاۋعا كەلگەن سپورت سۇيەر قاۋىم قاتارى كوپ بولدى، «قانات چەمپيون!» دەگەن جانكۇيەرلەر ايقايى قاراپايىم ادامداردىڭ دا نازارىن اۋدارتتى.
«بۇل ماعان ۇلكەن قولداۋ!»، - دەگەن قانات يسلام قارسىلاسىنىڭ وڭاي ەمەس ەكەنىن تاعى دا ايتتى.
«ا ق ش- تان جاتتىقتىرۋشىم كەلىپ، سوڭعى ءبىر ايداعى دايىندىعىم ساپالى بولدى. ءتاستۇيىن دايىنبىز. جانكۇيەردىڭ بۇگىنگى قولداۋى بۇل ماعان ۇلكەن دەمەۋ. بيىل ەلىمىزدىڭ تاۋەلسىزدىگىنە 25 جىل. الماتى قالاسىنىڭ 1000 جىلدىعى. وسى ۇلى تويدا جاۋاپكەرشىلىك ەسەلەي تۇسەتىندەي. قارسىلاستى جاتتىقتىرۋشىمەن كۇندە قاراپ وتىرمىز. رەكوردى مەنەن جوعارى، 28 نوكاۋتى بار. سوققىلارى جويقىن. وتە ساق بولۋ كەرەك. سوندىقتان جان- جاقتى دايىندالىپ جاتىرمىز. قارسىلاسىم دەڭگەيىنە قاراي شەتەلدەن دە سپورتشىلار اكەلىپ دايىندىق جاساپ جاتىرمىز»، - دەدى قانات يسلام.
ءسوز سوڭىندا قانات يسلام 29 -قازاندا وتەتىن جەكپە-جەگىن كورۋگە جانە وزگە دە قازاق سپورتشىلارىنىڭ سايىسىن تاماشالاۋعا شاقىردى.
ايتا كەتەيىك، 29 -قازان كۇنى «الماتى ارەنا» سپورت سارايىندا، كاسىپقوي بوكسشى قانات يسلام «WBA Fedelatin» بەلبەۋىن قورعاۋ جانە قۇرلىقارالىق WBO چەمپيوندىق بەلبەۋى ءۇشىن گانالىق بوكسشى پاتريك اللوتەيمەن جەكپە- جەككە شىعادى.
بۇگىن جەكپە-جەك قارساڭىندا قانات يسلام بۇگىن الماتىداعى «مەگا» ساۋدا ورتالىعىندا كوپشىلىك الدىندا جاتتىعۋ وتكىزدى.
29 -قازاندا جانكۇيەرلەر جاس سپورتشى، ريو وليمپياداسىنىڭ قاتىسۋشىسى، الەم چەمپيونى جانىبەك ءالىمحان ۇلىنىڭ دا كاسىپقوي بوكستاعى العاشقى جەكپە- جەگىن كورەدى. جانىبەك العاشقى كەزدەسۋىن كولۋمبيالىك ميلتون نۋنەسپەن وتكىزەدى.
سونىمەن قاتار، «الماتى ارەنا» مۇز سارايىندا وتەتىن بۇل ايتۋلى بوكس كەشىندە ەلىمىزدىڭ كاسىپقوي بوكسشىلارى: جانقوش تۇراروۆ، رۋسلان مىرساتايەۆ، ءالي احمەتوۆ، ايدار شارىپبايەۆ، ايدوس ەربوسىن ۇلى سىندى بىلعارى قولعاپ شەبەرلەرى شەتەلدىك كاسىپقوي سپورتشىلارمەن قولعاپ تۇيىستىرەدى.
اۆتور: الماس مۇقاش ۇلى
