قانات يسلام پاتريك اللوتەيمەن جەكپە-جەك قارساڭىندا اشىق جاتتىعۋ وتكىزدى - فوتو، كەسكىن
ءوز ەلىندە وتكىزگەلى وتىرعان جەكپە-جەك قارساڭىندا قانات يسلام بۇگىن الماتىداعى «مەگا» ساۋدا ورتالىعىندا كوپشىلىك الدىندا جاتتىعۋ وتكىزدى.
بۇگىنگى قانات يسلامنىڭ اشىق جاتتىعۋى ساۋدا ورتالىعىنىڭ ءۇشىنشى قاباتىندا ءوتىپ جاتىر. سپورتتىڭ قويىلىمدى تاماشالاۋعا كەلگەن جۇرتتىڭ قاراسى كوپ.
وسىدان ءبىر اي بۇرىن 23 -قىركۇيەكتە باسپا ءسوز ءماسليحاتىن وتكىزگەن قانات ءوز ەلىندەگى العاشقى جەكپە-جەكتىڭ جۇگى اۋىر ەكەنىن ايتقان بولاتىن.
«تۇڭعىش رەت ءوز ەلىمدە كەزدەسۋ وتكىزگەلى وتىرمىن. بۇل ۇلكەن جاۋاپكەرشىلىك. قارسىلاسىم وسال ەمەس. 36 كەزدەسۋ وتكىزىپ، ونىڭ 28 ىن نوكاۋتپەن جەڭگەن. جەرلەستەرىمنىڭ قولداۋىنا سەنەمىن. قازىرگى جاتتىعۋىم IBA اكادەمياسىندا ءوتىپ جاتىر»، - دەگەن بولاتىن قانات يسلام.
بۇل سپورت كەشەنىنىڭ قازاق جانكۇيەرلەرى ءۇشىن تاعى ءبىر ەرەكشەلىگى، وندا جاس سپورتشى، ريو وليمپياداسىنىڭ قاتىسۋشىسى، الەم چەمپيونى جانىبەك ءالىمحان ۇلى كاسىپقوي بوكستا العاش رەت ءوز باعىن سىنايتىنىن ايتا كەتەيىك.
جانىبەك العاشقى كەزدەسۋىن كولۋمبيالىك ميلتون نۋنەسپەن وتكىزەدى.
اتاپ وتەرلىگى، 29 -قازاندا «الماتى ارەنا» مۇز سارايىندا وتەتىن ايتۋلى بوكس كەشىندە ەلىمىزدىڭ كاسىپقوي بوكسشىلارى: جانقوش تۇراروۆ، رۋسلان مىرساتايەۆ، ءالي احمەتوۆ، ايدار شارىپبايەۆ، ايدوس ەربوسىن ۇلى سىندى بىلعارى قولعاپ شەبەرلەرى شەتەلدىك كاسىپقوي سپورتشىلارمەن قولعاپ تۇيىستىرەدى.
اۆتور: الماس مۇقاش ۇلى
