استاناداعى قوناق ءۇي وكىلدەرى زاتتارى ۇرلاندى دەگەن رۋمىن فۋتبولشىلارىنا ساۋال جولدادى
دەگەنمەن، ەلوردانىڭ قوناق ءۇي وكىلدەرى ازىرشە رۋمىنيا قۇراماسىنان ەش جاۋاپ الا الار ەمەس، دەپ حابارلايدى قازاقپارات.
«Rixos President Astana» قوناق ۇيىندە رۋمىنيانىڭ ۇلتتىق قۇراما مۇشەلەرىنىڭ جەكە زاتتارى مەن اقشالارىنىڭ ۇرلانعاندىعىنا قاتىستى ب ا ق- تا جاريالانعان اقپاراتقا وراي بۇل مالىمەتتەردىڭ ناقتى ەمەس ءارى استانا قالاسىنىڭ قۇقىق قورعاۋ ورگاندارىمەن رەسمي دالەلدەنبەگەندىگىن حابارلاعىمىز كەلەدى»، - دەلىنگەن قوناق ءۇي تاراتقان اقپاراتتا.
سونىمەن قاتار وندا 2016 -جىلدىڭ 9-11 -قازانى ارالىعىندا «Rixos President Astana» قوناق ۇيىندە رۋمىنيانىڭ ۇلتتىق قۇراما كومانداسى تۇرعاندىعى ايتىلعان. 2011 -جىلدىڭ 11 -قازانى كۇنى شامامەن ساعات 13,30 دا قوناق ءۇي قىزمەتكەرلەرىنە رۋمىنيا ۇلتتىق قۇراماسى وكىلىنەن فۋتبولشىلاردىڭ ءبىرىنىڭ نومىرىندە اقشا مەن IPAD جوعالعاندىعى تۋرالى اقپارات تۇسكەن. كۇزەت قىزمەتى بەينە باقىلاۋ جۇرگىزىپ، بۇل وقيعانى تىركەۋ جانە تىڭعىلىقتى تەرگەۋ جۇرگىزۋ ءۇشىن استانا قالالىق ءى ءى د وكىلدەرىن شاقىرعان. فۋتبول كومانداسىنىڭ مۇشەلەرى دە، وكىلى دە بەلگىسىز سەبەپتەرمەن پوليتسياعا ارىز جازۋدان باس تارتقان. بۇل جايتتى وقيعا ورنىنا كەلگەن پوليتسيا قىزمەتكەرلەرى تىركەگەن. سول كۇنى كەشكە قاراي قوناق ءۇيدىڭ جەكە باستاماسىمەن كۇزەت قىزمەتكەرلەرى جانە استانا قالالىق ءى ءى د وكىلدەرى بىرلەسىپ، قوناق ءۇيدىڭ بەينە باقىلاۋ كامەرالارىن قوسىمشا تەكسەرىپ، قىزمەتكەرلەردى تەرگەپ، قاجەتتى تەرگەۋ ارەكەتتەرىن جاساعان.
تەكسەرۋ ناتيجەسىندە اتالعان نومىرگە بوگدە ادامداردىڭ كىرمەگەندىگى انىقتالعان. سول ساتتە كوماندا قوناق ءۇي زالدارىنىڭ بىرىندە جاتتىعۋ جاساپ جاتقان.
«Rixos President Astana» قوناق ءۇيى جۇمىس ىستەي باستاعان كەزەڭنەن بەرگى ارالىقتا ءبىز گەرمانيا، تۇركيا، ازەربايجان، اۆستريا، پولشا، چەحيا جانە باسقا دا كوپتەگەن مەملەكەتتەردىڭ ۇلتتىق قۇرامالارىن بىرنەشە مارتە قابىلداعاندىعىمىزدى اتاپ وتكىمىز كەلەدى. ءبىراق، وسى ۋاقىت ىشىندە قوناق ۇيدە مۇنداي بىردە-ءبىر وقيعا بولعان ەمەس. قوناق ءۇي تۇراقتى تۇردە ءتۇرلى ەلدەردىڭ رەسمي دەلەگاتسيالارىن ورنالاستىرادى جانە قازاقستان رەسپۋبليكاسىنىڭ مەملەكەتتىك ورگاندارى مەن ديپلوماتيالىق ميسسيالارى اراسىندا جوعارى بەدەلگە يە. اتالعان وسەكتىڭ تارالۋى سەبەپتەرى قوناق ءۇي ءۇشىن قازىر تۇسىنىكسىز بولىپ وتىر»، - دەدى قوناق ءۇي وكىلدەرى.
اۆتور: مارلان جيەمباي
