تاۋەلسىزدىكتىڭ قۇرداسى بولۋ ۇلكەن جاۋاپكەرشىلىك - ءبىرجان قۋحايەۆ

 ورال. قازاقپارات - تاۋەلسىزدىكتىڭ قۇرداسى بولۋدى ءوز باسىم ۇلكەن جاۋاپكەرشىلىك دەپ تۇسىنەمىن. وسى ورايدا ءار قادامىڭدى ويلاپ باسىپ، جاسار ءىسىڭ مەن ايتار سوزىڭە دەيىن اسا مۇقيات بولۋ كەرەك.

 بۇل تۋرالى قازاقپارات تىلشىسىنە «جاس وتان» ج ق اقجايىق اۋداندىق بولىمشەسىنىڭ ءتوراعاسى، «نۇر وتان» پارتياسى اۋداندىق فيليالىنىڭ شتاتتان تىس كونسۋلتانتى، اۋداندىق ءماسليحات دەپۋتاتى ءبىرجان قۋحايەۆ ءمالىم ەتتى.

 وسىدان شيرەك عاسىر بۇرىن، 1991 -جىلى 15 -ساۋىردە اقجايىق اۋدانىنىڭ بۋدارين اۋىلىندا دۇنيەگە كەلگەن ءبىرجان قۋحايەۆ قارشادايىنان- اق بەلسەندىلىگىمەن، ويىنىڭ ورەسىنىڭ بيىكتىگىمەن كوزگە تۇسكەن. وزگەسىن قوزعاماعاندا، بەس جاسىندا اۋىلدا دويبىدان الدىنا جان سالماعان ول كورشىلەس العاباستاعى اۋداندىق جارىستا دا وزىق شىعىپ، العاشقى ماقتاۋ قاعازىن يەلەنگەن ەكەن. كەيىن مۇنداي ماراپاتتار سانى كوبەيە بەرگەن. قوعامدىق- ساياسي ومىرگە، سونىڭ ىشىندە پرەزيدەنتتىك سايلاۋعا بەلسەنە قاتىسقانى ءۇشىن ەلباسى نۇرسۇلتان نازاربايەۆتان ەكى مارتە العىسحات العان ءبىرجان قۋحايەۆ ادەبيەت پەن مادەنيەتكە، ونەر مەن ولەڭگە، ءتىل مەن داستۇرگە ەرەكشە جاقىن. 2013 -جىلى «ب ق و جاستار قاۋىمداستىعى» زاڭدى تۇلعالار بىرلەستىگى ۇيىمداستىرعان وبلىستىق بايقاۋدا «ۇزدىك جاس اۋدان كوشباسشىسى» اتالىمى بويىنشا وزىق شىققان ول سونداي- اق وبلىستىق قادىر (2008, 2014 ج. ) ، جۇبان (2010 ج. ) ، مۇقاعالي (2009 ج. ) وقۋلارىنىڭ جەڭىمپازى، باۋىرجان مومىش ۇلىنىڭ 100  جىلدىعىنا ارنالعان وبلىستىق عىلىمي- تانىمدىق كونفەرەنتسياسىنىڭ 1-ورىن يەگەرى (سىرىم اۋدانى، 2010 ج. ) ، «ءتىل - تاتۋلىق تىرەگى» وبلىستىق بايقاۋىنىڭ Ⅱ ورىن يەگەرى (ورال قالاسى، 2013 ج. ) اتانعان. بۇگىندە ءتول لاۋازىمدارىنا قوسا اۋداندىق «جايىق تاڭى» گازەتىنىڭ قوعامدىق ءتىلشىسى، اۋداندىق ورتالىقتاندىرىلعان كىتاپحانالار جۇيەسى جانىنداعى «مۋزا» شىعارماشىل وقىرماندار وتاۋىنىڭ مۇشەسى، اۋداندىق، وبلىستىق دەڭگەيدەگى كونتسەرتتىك ءىس- شارالاردىڭ تۇراقتى جۇرگىزۋشىسى رەتىندە تانىلىپ جۇرگەن ءبىرجان امانگەلدى ۇلى، ءبىر قىزىعى، تۇستاستارى سەكىلدى مەكتەپتەن كەيىنگى قادامىن بىردەن جوعارى وقۋ ورنىنان باستاعان جوق. 2010 -جىلى №14 كاسىپتىك ليتسەيدى (قازىرگى اقجايىق اگرارلىق- تەحنيكالىق كوللەدجى) «ەلەكتروندى ەسەپتەۋ جانە ەسەپتەۋىش ماشينالارىنىڭ وپەراتورى» ماماندىعى بويىنشا ءتامامداعان ءبىرجان ەڭبەك جولىن دا «جاستار تاجىريبەسى» باعدارلاماسىنا سايكەس سول ءبىلىم ورداسىندا باستايدى. كەيىن اقجايىق اۋدانى ىشكى ساياسات ءبولىمىنىڭ ءستاتيسى، «اقجايىق ورەندەرى» جاستار قوعامدىق بىرلەستىگىنىڭ ءتوراعاسى مىندەتىن اتقارعان ول 2015 -جىلدىڭ قازانىنان «نۇر وتان» پارتياسى اۋداندىق فيليالىنا قىزمەتكە اۋىستى. «نۇر وتان» پارتياسى جانە «جاس وتان» جاستار قاناتى رەسپۋبليكالىق سەزدەرىنە قاتىسىپ، ەلباسىنىڭ ءسوزىن تىڭداپ، كوكەيگە توقىپ ۇلگەرگەن جاستىڭ قازىرگى تاڭدا وزىنەن كەيىنگىلەرگە ايتار اقىل- كەڭەسى دە از ەمەس.

- ءبىرجان، وسى وتكەن بەيسەنبىدە كەزىندە ءوزىڭ ءبىلىم العان اقجايىق اگرارلىق- تەحنيكالىق كوللەدجىندە كەزدەسۋ وتكىزىپسىڭ، وندا نە اڭگىمە بولدى؟

- بىرىنشىدەن، ءبىز الدىمەن تاۋەلسىزدىكتىڭ وڭايلىقپەن كەلمەگەندىگىن، ازاتتىق جولىندا تالاي اتا- بابالارىمىزدىڭ قانىن دا، جانىن دا اياماعاندىعىن تۇسىنە بىلۋگە ءتيىستىمىز. ەكىنشىدەن، سونى جان- جۇرەگىمىزبەن سەزىنە وتىرىپ، تاۋەلسىزدىك جىلدارىندا قول جەتكىزگەن تابىستارىمىزدى باياندى ەتىپ، ەلىمىزدى ودان ءارى كوركەيتۋگە ۇلەس قوسا ءبىلۋىمىز كەرەك. قاسيەتتى ەلىمىزدىڭ بىرلىگى مەن جەرىمىزدىڭ ءار پۇشپاعىن قورعاۋ جۇگى دە ءبىزدىڭ يىعىمىزدان تۇسپەك ەمەس. مىنە، وسىنداي قاستەرلى قۇندىلىقتاردى كەيىنگى ءىنى- قارىنداستارعا جەتكىزە بىلسەك، ودان اسقان ارمان- ماقسات، ودان بيىك ابىروي جوق دەر ەدىم. اسىرەسە، ەلدىك، ۇلتتىق ماسەلەلەرگە بەي- جاي قاراماي، الاشتىڭ ازاتتىعىنا ادال بولۋىمىز كەرەك. وسىنى اڭگىمەلەگەندە، جاستارىمىزدىڭ كوزىنەن ۇشقىن كورىپ، جۇرەگىنەن جالىن سەزىنسەك، ءسوزىمىزدىڭ بوسقا كەتپەگەنى.

- ەندەشە، بۇگىندە جاستاردىڭ قاي قىلىعى ءوزىڭدى الاڭداتادى؟

 - ءبىزدىڭ اتا- بابالارىمىز ايتقان، بىلگەننىڭ ءتىلىن الماۋدان اسقان قاسىرەت جوق، ودان اسىرىپ نە ايتا الامىن. بۇرىن اقساقالدار مەن ۇستازداردىڭ الدىن ەشكىم كەسىپ وتپەيتىن ەدى، ال قازىر كەيبىر جاستارىمىز ۇلكەندى سىيلاۋدان قالىپ بارادى. انا ءتىلىن بىلمەيتىندەر دە از ەمەس. تاعى ءبىر ايتارىم، قاناعاتشىل ەمەسپىز. ءتىپتى باسقاسىن ايتپاعاندا، قىمبات تەلەفونعا جۇگىرىپ، باسەكەگە تۇسەتىن بولدىق. مىسالى، مەنىڭ ۇيالى تەلەفونىم قاراپايىم عانا، بۇدان بەدەلىم كەمىپ كەتپەيدى. ءوز ەڭبەگىممەن تاپقان وسى بايلانىس قۇرالىم كەيبىرەۋلەردىڭ اكە- شەشەسىنە نەسيەگە العىزىپ، ۇستاپ جۇرگەن ايفونىنان ون ەسە ارتىق. تەمىر- تەرسەك، كيىم- كەشەك ارقىلى جارىسۋ جاقسىلىققا اپارمايدى. ودان دا ونەر- ءبىلىم، كوركەم مىنەز ارقىلى وزايىق تا ءبىر- بىرىمىزدەن. ەلباسىمىز ايتىپ جۇرگەنىندەي، ءبىز وزگە جۇرتتان كەم بولماۋىمىز ءۇشىن بىرنەشە ءتىل ءبىلىپ، زاماناۋي عىلىمدى مەڭگەرىپ، قاتارىمىزدىڭ الدى بولۋعا ءتيىستىمىز. سوندا عانا بابالارىمىز اڭساعان «ماڭگىلىك ەلگە» جەتە الامىز. قازاقستان جاستارىنا ايتارىم وسى.