جاس كورىنۋ قۇپياسى

استانا. قازاقپارات - الەۋمەتتىك جەلىلەردە كەيبىر كەلىنشەكتەر بويجەتكەن قىزداردان دا جاس ءارى سۇلۋ كورىنەدى.

ماسەلە تەك فوتوشوپ نە فيلترلەردە ەمەس. كەلەسى كەڭەستەر جاسى 35-تەن جوعارى كەلىنشەكتەرگە ارنالادى.

شاش

شاشىڭىزدىڭ تۇسىنە ءمان بەرىڭىز. شاش بويايتىنداردىڭ %70 ى ادەتتە ءوز شاشىنىڭ تۇسىنەن اقشىل ءتۇستى تاڭدايدى. بۇل ەركەكتەردىڭ سارى شاشتى بيكەشتەردى ۇناتادى دەگەن ستەرەوتيپىنە بايلانىستى بولۋى مۇمكىن. الايدا، ستيليستەر اقشىل ءتۇستى شاش بەتىڭىزدى قارتايتىپ كورسەتەدى دەيدى. سوندىقتان شاشىڭىز اعارا باستاسا، ءبىر- ەكى تون قويۋ تۇسكە بوياعانىڭىز ءجون. ەگەر شاشىڭىزعا اق تۇسپەسە، تولىعىمەن بوياماي، شاشتىڭ ءتۇبى مەن ۇشتارىن عانا بوياۋىڭىزعا بولادى. ال توتىقۇس قاۋىرسىندارى سياقتى نۇسقالار، كوگىلدىر، كۇلگىن ءتۇستى شاش بالالىق ارمان بولىپ قالا بەرگەنى ءجون.

قىسقا شاش كەكسە ەتىپ كورسەتەدى. ادەتتە 40 جاستان باستاپ ايەلدەر شاشىن قىسقارتقاندى جاقسى كورەدى. الايدا قىسقا شاش بارلىعىنا جاراسا بەرمەيدى. ەگەر ءسىزدىڭ بەت فورماڭىز يدەال بولسا، ارينە، ەشقانداي شاش ۇلگىسى اجارىڭىزدى بۇزا المايدى. سوندىقتان شاشىڭىزدى قۇلاقتان جوعارى شولتيتپاس بۇرىن اسىقپاي ويلانىڭىز.

بۋىلعان، تۇيىلگەن شاش تۋرالى. بەتىڭىزدىڭ كونتۋرىن اشىپ، جىلماعاي ەتىپ تۇراتىن شاش ۇلگىلەرى تەرىڭىزدىڭ پروبلەمالارىن ايقىن كورسەتەدى. ەگەر شاشىڭىز جاعىڭىزدى جاۋىپ، ءسال يەگىڭىزگە قاراي ءتۇسىپ تۇرسا، بىرنەشە جاسقا جاسارتادى. ارينە، قىرىققا كەلىپ، جاس كەزىڭىزدەگىدەي شاشىڭىزدى جايا سالعان جاراسپاس. ءبىراق گولدي حوۋن سياقتى ۇزىن كەكىلىڭىزدى ءسال بۇيرالاپ جۇرسەڭىز وبرازىڭىزعا رومانتيكا بەرىپ، جاسىراق كورسەتەتىنى انىق.

تەرى

سكراب قولدانىڭىز. جارناماداعى قىزداردىڭ بەتى جارقىراپ تۇراتىنى نەگىزىنەن وسى سكرابتاردىڭ ارقاسى. بەتىڭىزدەگى ءولى ءارى سولعىن تارتقان تەرى قاباتىن «سىپىرىپ» تاستاساڭىز، ءوڭىڭىز اشىلادى. جاس كەزىندە ەپيتەلي ايىنا 2-3 رەت وزدىگىنەن ءجيى جاڭارادى. جاس وتە كەلە بۇل پروتسەسس باياۋلاي تۇسەدى. ونىڭ ۇستىنە، قابىرشاعىنان تازارتىلعان تەرىگە كوسمەتيكا دا ادەمى تۇسەدى. سونىمەن بەتىڭىزدى اپتاسىنا 1-2 رەت سكرابپەن تازارتىپ، ماسكا جاساپ تۇرعايسىز.

قولىڭىزدى كۇتۋدى ۇمىتپاڭىز. پاپاراتستسيلەر ماڭگى جاس مادوننانىڭ قولدارىن ءتۇسىرىپ الىپ، «جاعا ۇستاتقانى» ەسىڭىزدە مە؟ قاتپار- قاتپار ءاجىم بولعان، تامىرى بىلەۋلەنىپ شىققان قولدارى شىنىمەن سۇمدىق. ادەتتە ايەلدەر بەتىنە قىمبات كرەمدەر جاعىپ، قولدارىن كرەم قالدىقتارىمەن ۇيكەي سالادى. كۇندەلىكتى ىدىس جۋاتىن سۇيىقتىق، كىر جۋاتىن ۇنتاقپەن جاناساتىن، كۇنىنە 6-7 رەت سابىنمەن جۋىلاتىن قول تەرىسىنە دە ەرەكشە كۇتىم قاجەت. ايتپاقشى، ىدىستى رەزەڭكە قولعاپپەن جۋۋدى ادەتكە اينالدىرساڭىز، جۇمساق الاقانىڭىزدى نەمەرەلەرىڭىز دە ماقتايتىن بولادى.

تىرناعىڭىزدى وسىرمەڭىز. جەزتىرناق، مىستان كەمپىردىڭ باستى اتريبۋتى ەسىڭىزدە عوي؟ مانيكيۋر مەن پەديكيۋردى ۇنەمى جاساتقان دۇرىس، الايدا ۇزىن، اكريلدى- گەلدى تىرناق كۇتىنگەن ايەل ەمەس، قارتامىس تارتقان ايەل ەتىپ كورسەتەدى. ەڭ تاماشا نۇسقا - فورماسى دوعالداۋ، فرەنچ مانيكيۋر، تىرناق ۇزىندىعى 3 م م اسپاعانى ءجون.

ماكياج

باستىسى - ارتىق كەتپەۋ. جاس ۇلعايعان سايىن بوياۋ دا قويۋلانا تۇسەدى دەگەن جاڭساق پىكىر. تونالدى كرەم ەشقاشان ءاجىمدى جاسىرا المايدى. ودان گورى دالاپتى ازداپ جاعىپ، جەڭىل تەنمەن كوزدى بوياڭىز. ەگەر تونالدى كرەممەن قوش ايتىسا الماساڭىز، وپادان قۇتىلىڭىز. ۇنتاقتى كوسمەتيكا ءاجىمدى بەتكە بىركەلكى تۇسپەيدى. ءبىراز ۋاقىتتان سوڭ اجىمدەردىڭ قاتپارىنا ءتۇسىپ، جاسىڭىزدى ۇستاپ بەرەدى. سوندىقتان كرەم نەمەسە تۇيىرشىكتەر تۇرىندەگى وپا- دالاپتى تاڭداڭىز. ماكياج ءتۇسىن تاڭداعاندا قوڭىر تۇستەن اۋلاق بولىڭىز. قوڭىر ءتۇس اجارىڭىزدى اۋىرلاتادى، قارتايتادى. اشىق، ساليقالى تۇستەردى تاڭداڭىز. ەسىڭىزدە بولسىن، ماكياج نەعۇرلىم از بولسا، ءسىزدىڭ ءوڭىڭىز دە جاسارا تۇسەدى.

دەنە

سالبىرعان تەرىنى ەمى - سپورت. جارناماعا سەنبەڭىز، ءسىز شالقاڭىزدان ءتۇسىپ جاتقاندا دەنەڭىزدىڭ تسەلليۋليتىن جوق قىلاتىن، ارتىق مايدى سىپىرىپ تاستايتىن كرەم، ماسكا ەشقاشان بولعان ەمەس، بولمايدى دا. جاس ۇلعايعان سايىن بىلەك ەتتەرى سالبىراي باستايدى. شولاق جەڭدى كويلەكتەردى ۇزاق ۋاقىت كيگىڭىز كەلسە، گانتەلمەن دوس بولىڭىز. 2,5-3 كگ گانتەلدى ۇستاپ، قولىڭىزدى تىك كوتەرىڭىز، يىق دەڭگەيىنە دەيىن ءتۇسىرىپ، جاتتىعۋدى 15 رەت قايتالاڭىز. ايتپاقشى، ورتا جاستا ءىشىڭىز دە، ارقاڭىز دا جاتتىعۋلاردى قاجەت ەتەدى. دۇرىسى - ترەناجەر زالىنا بارىپ، جاقسى ينسترۋكتوردان كەڭەس الىڭىز.