ساپاسىز تاۋارلار ۇسىنعان ازىق-تۇلىك دۇكەندەرىنىڭ ءتىزىمى جاريالاندى
اتالمىش كوميتەتتىڭ سايتىندا جاريالانعان اقپاراتقا سۇيەنسەك، ءتيىستى ساپاداعى قاۋىپسىز تاۋاردى ساتىپ الۋدا تۇتىنۋشىلاردىڭ قۇقىقتارىن بۇزعان ءىرى ساۋدا نىساندارىنىڭ ءتىزىمى كەلەسىدەي: «مەترو كەش ەند كەرري» (43 بۇزۋشىلىق)، «رامستور كازاحستان» (18 بۇزۋشىلىق)، «Magnum» (21 بۇزۋشىلىق) جانە "مادجيد ال فۋتتايم گيپەرماركەتس كازاحستان" (23 بۇزۋشىلىق) گيپەرماركەتتەرى؛ «انۆار» (28 بۇزۋشىلىق)، «Small» (32 بۇزۋشىلىق) سۋپەرماركەتتەرى جانە باسقالارى.
ساۋدا نىساندارىندا ونىمدەردىڭ باكتەريولوگيالىق كورسەتكىشتەرى، ساقتاۋ تالاپتارى جانە جارامدىلىق مەرزىمدەرى تالاپتارعا سايكەس كەلمەگەن، ولاردىڭ سايكەستىگىن راستايتىن قۇجاتتار بولماعان. ساتۋعا قابىلداپ الىنعان كەزدە ءونىمنىڭ تاڭباسىنا جانە ءوندىرۋ كۇنىنە كوڭىل اۋدارىلماعان، مەملەكەتتىك تىلدەگى ءونىمدى تاڭبالاۋ جونىندەگى تالاپتار ەسكەرىلمەگەن.
وسىعان بايلانىستى، تۇتىنۋشىلاردىڭ قۇقىقتارىن قورعاۋ كوميتەتى ونىمدەردى (تاۋارلاردى) ساتىپ الۋ كەزىندە ءونىمنىڭ جارامدىلىق مەرزىمىنە، ساقتاۋ تالاپتارىنا جانە تاڭبالاۋعا كوڭىل اۋدارۋدى سۇرايدى.
