جانى اشىعان كەيىپپەن جىنعا تيەتىن سۇراق قوياتىندار بار. ول قانداي سۇراقتار؟

استانا. قازاقپارات - اڭگىمە نەدەن باستالدى؟ «قازاقستان» ۇلتتىق ارناسى سايتىنداعى بلوگىندا جانار بايسەمىزوۆا ادامدار اراسىندا سونداي ءبىر ومىرلىك ماڭىزى جوق، ياكي، جاۋابىنا قاراي قانداي دا ءبىر شەشىم قابىلداۋدى، كومەك كورسەتۋدى ماقسات ەتپەسە دە ءجيى قويىلاتىن سۇراقتاردى ءتىزىپ شىققان ەكەن.

جاناردىڭ جازعانى ەشكىمگە جاسىرىن ەمەس. بەس ساۋساقتىڭ بىردەي بولمايتىنى سياقتى، ادامداردىڭ دا ءتۇر-ءتۇرى بولادى. بىرەۋى اڭعالدىعىنان اڭداماي سويلەپ جاتسا، ەندى ءبىرى جانى اشىعانسىپ تۇرىپ جابىرقاتا سالادى. ويتكەنى، ونداي سۇراقتار قويۋشىنى سونداي قاتتى مازالايتىنىنا كۇمانىم بار. ال، قويىلعان ادامنىڭ، جاۋاپ بەرۋشىنىڭ كەي جاعدايدا جىنىنا تيەتىنى انىق. ومىردە وزىمە ءجيى قويىلعان سونداي «ماقسات- ماعىناسىز» سۇراقتاردىڭ ءبىرشاماسىن مەن دە ءتىزىپ شىققاندى ءجون كوردىم.

2013 -جىلدان باستاپ «جىگىتىڭ بار ما؟»، «نەگە جىگىتپەن جۇرمەيسىڭ؟» دەگەن سۇراقتار قويىلمايتىن بولدى. 2014 -جىلى «قاشان ۇيلەنەسىڭدەر؟»، «جۇرگەندەرىڭە كوپ بولدى ما؟» دەگەن سۇراقتار كەزەڭىن امان- ەسەن ارتقا قالدىردىق. قۇدايعا شۇكىر، وتباسى بولىپ وتىرعانىمىزعا، مىنە، ەكىنشى جىل. «اياعىڭ اۋىر بولىپ قالدى ما؟»، «ۇيلەنگەندەرىڭە قانشا بولدى، كوتەردىڭ بە؟»، «نەگە كوتەرمەي ءجۇرسىڭ؟» دەيتىندەر دە جوق. اياكوز ەسىمدى قىزىمىز ءوسىپ كەلە جاتىر. شىن ايتسام، كۇيەۋگە شىعىپ، بالا تۋعاننان كەيىن ماعان ەندى ونداي «نەتاكتيچنىي سۇراقتار» قويىلمايدى دەپ ويلادىم. سويتسەم، وڭباي قاتەلەسىپپىن.

سونىمەن، جاۋاپ الۋدى ەمەس، جىنعا ءتيۋدى ماقسات ەتەتىن سونداي ون سۇراق:

1-ورىن كۇيەۋگە شىققاننان كەيىن بويىما بىردەن بالا بىتپەدى. «جۇكتىسىڭ بە؟»، «بالانى جوسپارلاپ جاتىرسىڭدار ما؟» سۇراقتارى جىعىلعانعا جۇدىرىق بولدى. جاۋاپ: ءبارى اللا تاعالانىڭ قولىندا. مەنىڭ ەمەس.

2-ورىن اياعىمنىڭ اۋىرلاعانىن ەستىگەن اعايىن- تۋىس، كورشى- قولاڭ، تامىر- تانىس «ۇل ما، قىز با؟» دەپ قىزىعۋشىلىق تانىتتى. «قىز بالا» دەگەن جاۋاپتى الىسىمەن ءبىرى «قىز دەگەن اتا- اناسىنا جانى اشىعىش بولادى. بۇكىل جاقسىلىقتى ۇلدان ەمەس، قىزدان كورىپ وتىرمىز» دەپ قۇتتىقتاپ جاتسا، ءبىرى «قىز دەگەن دە جاقسى عوي. ايتەۋىر امان بولسىن» دەپ جاندارى اشي جونەلدى.

جاۋاپ: قىز دا، ۇل دا -  بالا. قىزىڭ دا، ۇلىڭ دا بولعانعا نە جەتسىن، ارينە. باستىسى دەنى ساۋ، سانالى بولسا بولعانى.

3-ورىن ءبىر ۇيدە التى ادام بولىپ تۇرامىز. اتام، ەنەم، ءبىز جانە قايىن اپكەم. جۇرت مەنەن «اتا- ەنەڭمەن بىرگە تۇراسىڭدار ما؟»، «نەگە بولەك شىقپادىڭدار؟»، «بىرگە تۇرۋ قيىن ەمەس پە؟»، «سوندا بارلىعىڭ ءبىر ۇيدە تۇراسىڭدار ما؟» دەۋدەن شارشار ەمەس.

جاۋاپ: كۇيەۋىم ءۇيدىڭ جالعىز ۇلى بولعاندىقتان اتا- انامىزبەن بىرگە تۇرامىز. بۇكىل ءومىرىن بالا تاربيەلەۋگە، سونى وقىتۋعا، تاماق تابۋعا ۇيرەتكەن جانداردى قالايشا جالعىز تاستايمىز، بۇل ادامدىق پا؟ بولەك تۇرعاننىڭ نەسى جاقسى؟ دەپ قارىمتا سۇراق قويعىم كەلەدى.

4-ورىن: ءبىر جىل بۇرىن قايىن ءسىڭلىمدى ۇزاتتىق. تويعا بەسىك ارقالاپ اپارعانىمىزدى كورگەن جۇرت تاڭدانىسىن اشىق ءبىلدىردى. «بەسىككە جاتا ما؟»، «بەسىككە قازىرگى كەزدە جاتقىزۋعا بولا ما؟»، «باسى جالپاق، ءداۋ بولىپ كەتەدى عوي» دەپ جان-جاقتان شۋلادى. كەيبىرەۋلەر نە دەرىن بىلمەي، كوزدەرى باقىرايدى دا قالدى.

جاۋاپ: مەن بەسىككە جاتقانمىن. اياعىم ءتۇزۋ، باسىم دا ءاپ-ادەمى. قىزىم دا بەسىككە جاتتى. باسقا بالالارىمدى دا بەسىككە بولەيمىن. بەسىك مەن ءۇشىن مانەجدەن دە، بەسىك اربادان دا، بارىنەن دە ىڭعايلى. بەسىك ەڭ باستىسى ۇلتتىق تاربيەنىڭ باستاۋى.

5-ورىن: اياكوز قازىر ءبىر جاستان استى. جۇگىرىپ ءجۇر. قايدا بارساق تا بالانى وزىمىزبەن بىرگە الا جۇرەمىز، سوندىقتان ەل كوزىنشە ەمىزۋگە ءماجبۇرمىن. ايەلدەر «ءالى ەمىزىپ ءجۇرسىڭ بە؟»، «بالاڭ قازىر قانشادا؟»، «قاشانعا دەيىن ەمىزەسىڭ؟»، «ەمشەكتەن شىعارۋ كەرەك»،  «ەمىزە بەرگەننەن پايدا جوق. سەنىڭ سۇتىڭدە ءنار قالمادى» دەپ قىنجىلتادى.

جاۋاپ: مۇمكىندىك بولسا (دەنساۋلىق جاعىنان) ەكى جاسقا شەيىن ەمىزە بەرگىم كەلەدى. ەمىزگەن قاتتى ۇنايدى. ەمىزگەن سايىن ءوزىمدى باقىتتى سەزىنەمىن. تۇلا بويىم مەيىرىمدىلىككە تولادى. بوتقا دايىنداپ، دايىن قوسپا ساتىپ الىپ ۋاقىت جوعالتپايمىن ءارى اقشام كەتپەيدى. كەز كەلگەندە جەردە بالانىڭ قارنى اشسا، مازاسى قاشسا بولسا ەمىزە قويامىن. بوپەنىڭ قارنى تويادى ءارى كوڭىل- كۇيى كوتەرىلىپ، تىنىشتالادى. اۋىرىپ قالسا دا نەگىزگى ەم- دوم -  سول انا ءسۇتى. ەمىزۋ -  ەڭ دۇرىسى.

6-ورىن: قۇرساق كوتەرگەننەن كەيىن جۇمىستان بىردەن شىعىپ كەتتىم. جەتى ايعا شەيىن شىداپ جۇمىس ىستەۋگە دەنساۋلىعىم جارامادى. سونىمەن ۇيدە وتىرعانىما شامامەن ەكى جىل. «جۇمىسقا قاشان شىعاسىڭ؟»، «الدە شىقپاي ۇيدە وتىراسىڭ با؟» دەگەن سۇراقتار وزەكتى. جاۋاپ: جاقىندا جۇمىسقا ورنالاستىم. مەنىڭ ماقالالارىمدى ەندى qamshy.kz سايتىنان وقي الاسىزدار.

7-ورىن: «سەنى تەلەديداردان قاشان كورەمىز؟»

جاۋاپ: كوك جاشىكتەن كەزىندە كورىنگەنبىز. بولاشاقتا دا كورە جاتارسىزدار.

8-ورىن: «سەن بۇرىندا «ايتۋعا وڭايدا» ىستەپ ەدىڭ. بەيسەن قۇرانبەكتىڭ ۇيالىسىن بەرشى؟» نەمەسە «ايگۇل يمانبايەۆا مەن التىناي جورابايەۆا شىنىمەن دە جاقسى ارالاسا ما؟» جاۋاپ: بايلانىس تەلەفونى 87173932275؛ بىلمەدىم.

9-ورىن: «ايلىعىڭ قانشا؟» جاۋاپ: ق ر ۇلتتىق ەكونوميكا مينيسترلىگىنىڭ ايتۋى بويىنشا

 143650 ت گ.

10-ورىن «ەكىنشىنى قاشان جوسپارلاپ جاتىرسىڭدار؟»

جاۋاپ: ءبىرىنشى سۇراققا قاراڭىز. پى/سى: سۇراق قويعاندا تۇرعان دانەڭە جوق شىن مانىندە. تەك بىرەۋلەر شىنايى قىزىعۋشىلىقپەن سۇراپ، اقىل- كەڭەستەرىن ايتىپ جاتسا، كەيبىرەۋلەر تيىسكىسى، كوڭىل- كۇيدى تۇسىرگىسى، قۇر مازانى العىسى، تىنىشتىقتى قاشىرعىسى كەلىپ سۇراق قويادى. سول سەبەپتى سۇراقتىڭ «تاكتيچنىي» نە «نەتاكتيچنىي» بولۋى سۇراق قويۋشىعا، ونىڭ نيەتىنە تىكەلەي بايلانىستى.

جازيرا بايدالى «قامشى» سىلتەيدى

 

Qamshy.kz