سپورتتاعى تاۋەلسىزدىك قۇرداستارى - فوتو
قاراپ تۇرساق، قازىر وسى 353174 بالا 353174 تۇلعاعا، 25 جاستاعى قىز- جىگىتتەرگە، اكە- انالارعا، مىڭ ءتۇرلى ماماندىق يەسىنە، جالپى ايتساق، جالىنداي جارقىراعان جىگەرلى ازاماتتارعا اينالدى ەمەس پە!؟ سولاردىڭ اراسىنان سپورتتا جۇلدىزى جانىپ، 25 جاسىندا قازاقستاننىڭ داڭقىن اسقاقتاتىپ جۇرگەندەر بار. بۇگىن تاۋەلسىزدىكپەن تۇيدەي قۇرداس سپورت تارلاندارىن تانىستىرساق.
دانيار ەلەۋسىنوۆ
بوكسشى. 1991 -جىلى 13 -ناۋرىزدا تۋعان.
قازىر 69 كەلىگە دەيىنگى سالماقتا بوكستاسادى. بيىل وليمپيادا چەمپيونى اتاندى. جالپى، تاۋەلسىزدىك العاننان بەرى قازاقستان ءتورت جىل سايىنعى جازعى وليمپيادا ويىندارىنان بوكسشىلار ەشقاشان التىن جۇلدەسىز ورالعان ەمەس. دانيار ەلەۋسىنوۆتىڭ بيىلعى التىنى وليمپيادا ويىندارىنىڭ تاريحىندا قالدى، سەبەبى، ءبىر ەلدىڭ بوكسشىلارى قاتارىنان ءتورت رەت 69 كەلى سالماقتاعى التىندى ەشكىمگە بەرگەن جوق.
دانيار ەلەۋسىنوۆتىڭ اكەسى - مارات ەلەۋسىنوۆ قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى، ال ءىنىسى - داۋرەن ەلەۋسىنوۆ الەم چەمپيونى، ازيانىڭ ەكى دۇركىن چەمپيونى، ازيا ويىندارىنىڭ ەكى دۇركىن چەمپيونى.
ارتەم زاحاروۆ
ۆەلوشاباندوز. 1991 -جىلى 27 -قازاندا تۋعان.
ارتەم زاحاروۆ ازيا چەمپيونى، ازيا كۋبوگىنىڭ جەڭىمپازى، الەم كۋبوگىنىڭ قولا جۇلدەگەرى، ازيا چەمپيوناتىنىڭ قولا جانە كۇمىس جۇلدەگەرى.
قازاقستاننىڭ ۆەلوسپورت بويىنشا ۇلتتىق قۇراماسىنىڭ كوشباسشىسى تالاي جارىسقا تۇسكەن جىگىت. بيىل ول ريو- دە- جانەيرودا وتكەن وليمپيادا ويىندارىنا جولداما جەڭىپ الدى. ايتا كەتەيىك، 2004 -جىلعى افينا وليمپياداسىنان بەرى جولاقتى جارىس بويىنشا قازاقستان قۇراماسى وليمپيادا ويىندارىنا قاتىسپاعان ەدى. ال، بيىل ريو ويىندارىنا جولداما ۇتىپ العان ارتەم زاحاروۆ مارە سىزىعىن ونىنشى بولىپ كەستى.
ءىلياس سۇلەيمەنوۆ
بوكسشى.1991 -جىلى 29 -ناۋرىزدا دۇنيەگە كەلگەن.
52 كەلى سالماقتا جۇدىرىقتاسىپ جۇرگەن ءىلياس بوكسقا 2002 -جىلى كەلدى. استانا جاتتىعادى. ول ازيا ويىندارىنىڭ چەمپيونى، ازيا چەمپيوناتىنىڭ كۇمىس جۇلدەگەرى، اسكەريلەر اراسىنداعى الەم چەمپيوناتىنىڭ كۇمىس جۇلدەگەرى، گاللادا وتكەن حالىقارالىق جارىستىڭ جەڭىمپازى اتانعان. ۇلتتىق قۇرامادان تىس، ءىلياس اتاقتى «استانا ارلانس» كاسىبي بوكس كلۋبىنىڭ نامىسىن قورعاعان.
سەرگەي حيجنيچەنكو
ق ر فۋتبول قۇراماسىنىڭ شابۋىلداۋشىسى. 1991 -جىلى 17 -شىلدەدە تۋعان.
فۋتبولداعى كاسىبى 15 جاسىندا باستالعان ول وسكەمەننىڭ «شىعىس» كومانداسى ءۇشىن ويناعان بولاتىن. وسى كومانداداعى، جالپى، فۋتبولداعى ەڭ العاشقى ويىنىن گولمەن باستاعان. «شىعىس» كومانداسى قازاقستاننىڭ پرەمەر- ليگاسىنان شىعىپ قالعاننان كەيىن، ماسكەۋدىڭ سسكا كومانداسى سەرگەيگە كوز سالىپ، كوماندانىڭ ەكىنشى قۇرامىمەن جاتتىققان بولاتىن.
2010 -جىلى سەرگەي استانانىڭ «لوكوموتيۆ» كومانداسىنا اۋىسىپ، كەيىننەن «اتىراۋ» قۇراماسىنا كوشكەن ەدى. 2011 جىلدىڭ اقپانىندا قاراعاندىنىڭ «شاحتەر» فۋتبول كلۋبىنا اۋىستى. 2016 -جىلدىڭ اقپانىنان بەرى «توبىل» كومانداسىمەن كەلىسىمشارتقا وتىردى.
نۇرسۇلتان بەلگىبايەۆ
حوككەيشى. 1991 -جىلى 3 -تامىزدا تۋعان.
استانانىڭ حوككەي مەكتەبىنەن ءبىلىم العان جىگىت. 2007 -جىلدان بەرى قازاقستاننىڭ اتاقتى «بارىس» كومانداسى ساپىندا مۇز ايدىنعا شىعىپ ءجۇر. ق ر- نىڭ حوككەيدەن ستۋدەنتتىك قۇراماسىمەن بىرگە دۇنيەجۇزىلىك قىسقى ۋنيۆەرسيادادا ەكى رەت جۇلدەگەر اتانىپ ۇلگەردى. 2013 جانە 2015 -جىلدارى نۇرسۇلتاننىڭ كومانداسى كۇمىس جۇلدەلەردى يەلەنگەن ەدى.
يۋليا راحمانوۆا
جەڭىل اتلەتشى. 1991 -جىلى 25 -قازاندا تۋعان.
ورتا قاشىقتىقتاعى جارىستارعا ەت ۇيرەتكەن يۋليا بۇرىنعى «رەسپۋبليكا كۇنىندە» دۇنيەگە كەلگەن. 2014 -جىلى ازيا چەمپيونى اتاندى، ازيا چەمپيوناتىنىڭ كۇمىس جۇلدەگەرى، 2015 -جىلعى ازيا چەمپيوناتىنىڭ قولا جۇلدەگەرى. 2015 -جىلعى ۋنيۆەرسيادادا جەڭىسكە جەتكەن جەلاياق.
بيىل ريو وليمپياداسىنا بارعان يۋليا 400 مەتر قاشىقتىقتا جۇگىرىپ، مارە سىزىعىن سەگىنشى سپورتشى بولىپ كەسكەن ەدى.
الەكسەي شەتكين
ق ر فۋتبول قۇراماسىنىڭ شابۋىلداۋشىسى. 1991 -جىلى 21 -مامىردا تۋعان.
2010 -جىلى «جەتىسۋ» كومانداسىنىڭ قۇرامىندا ءجۇرىپ، قازاقستاننىڭ پرەمەر- ليگاسىنداعى دەبيۋتىن وتكىزدى. ۇلكەن فۋبولداعى العاشقى گولىن دا سول جىلى «اقجايىقتىڭ» قاقپاسىنا سالعان ەدى. «جەتىسۋ» كومانداسىندا ءجۇرىپ 84 ماتچ وتكىزگەن، 15 گول سالعان. 2012 -جىلى ۋەفا ەۋروپا ليگاسىندا العاشقى ويىنىن وتكىزگەن.
ەۋرو-2016 ىرىكتەۋ كەزەڭىندە قازاقستان ءۇشىن ەكى ويىن وتكىزگەن.
ولگا سافرونوۆا
جەڭىلاتلەتشى. 1991 -جىلى 5 -قاراشادا تۋعان.
ولگا كارەراسىن ۇزىندىققا، بيىكتىككە سەكىرىپ باستاعان. كەدەرگىمەن جۇگىرۋدە دە ءوزىنىڭ كۇشىن سىناپ كورگەن سپورتشى سوڭىندا سپرينتكە توقتاعان. ازيا ويىندارىنىڭ چەمپيونى، ازيا ويىندارىنىڭ كۇمىس جانە قولا جۇلدەگەرى، ازيا چەمپيوناتىنىڭ ەكى دۇركىن كۇمىس جۇلدەگەرى. ازيا چەمپيوناتىنىڭ قولاسىن العان جۇيرىك.
لوندون جانە ريو وليمپياداسىنا قاتىسقان.
نۇرسۇلتان تۇرسىنوۆ
بالۋان. 1991 -جىلى 1 -تامىزدا تۋعان.
كۇرەسكە 8 جاسىندا كەلگەن نۇرسۇلتان 2014 -جىلى ازيا چەمپيونى اتاندى. 2015 -جىلى ازيا چەمپيوناتىنىڭ كۇمىس جۇلدەگەرىن يەلەندى. سپورتتى سەرىك ەتكەن وتباسىنىڭ ۇلى. اكەسى - شىڭعىس تۇرسىنوۆ قازاق كۇرەسى بويىنشا جاتتىقتىرۋشى، ۇلكەن اعاسى مۇحيت تۇرسىنوۆ - قازاق كۇرەسى بويىنشا ەكى دۇركىن الەم چەمپيونى، قازاق كۇرەسى بويىنشا ازيا چەمپيونى، «قازاقستان بارىسى-2014» ءتۋرنيرىنىڭ جەڭىمپازى.
اۆتور: كەنجەكەي توقتامۇرات قىزى
