نە سەبەپتى جۇكتى ايەلگە جىلى سوزدەر ايتۋ كەرەك

استانا. قازاقپارات  - مەن كوپشىلىككە اياعى اۋىرلاعان ايەلگە تۇسىنىستىكپەن قاراپ، جىلى ءسوز ايتايىق، ونى قولىمىزدان كەلگەنىنشە مەيىرىمگە بولەيىكشى دەگەن ويدى ايتقىم كەلەدى. سەبەبى ايەلدەر ءدال وسى كەزدە اسا سەزىمتال، كوڭىلشەك بولادى. بۇل تۋرالى زامانا گازەتى حابارلايدى.

► ءبىز كوبىنە العاش رەت اياعى اۋىرلاعان جاس كەلىندەرگە عانا كوڭىل بولەمىز. ەكىنشى رەت جۇكتى بولعانىندا ەندى ول ءبارىن بىلەدى دەپ ويلايمىز. ءبىراق ونىنشى رەت جۇكتى بولسا دا ايەل اياعى اۋىر كەزىندە جاقىن ادامدارىنىڭ قولداۋىن كۇتەدى. اعزاداعى گورموندىق وزگەرىستەر ايەلدىڭ جۇيكەسىنە اسەرىن تيگىزبەي قويمايدى. سوندىقتان بولار، كەيبىر ايەلدەر، ونىڭ ىشىندە ءوزىم دە بارمىن، جىلاۋىق بولىپ الامىز. كەز كەلگەن نارسە، ءتىپتى كينوداعى كەيىپكەردىڭ ايانىشتى ومىرىنە، كوڭىلسىز اۋەنگە دە جىلاي سالامىز. بىرەۋدىڭ ارتىقتاۋ ءسوزى دە كوڭىلگە ءتيىپ قالادى. قىسقاسى، مۇنداي ۋاقىتتا ايەل «تىرناق استىنان كىر ىزدەۋگە» كىرىسەدى. (مۇمكىن بۇل قۇبىلىس بارىندە بىردەي بولمايتىن دا شىعار. ونداي سەزىمدە بولمايتىن ايەلدەردەن كەشىرىم سۇرايمىز) . وسىنداي كەزدە ايەلىڭىزگە جىلى سويلەي سالعاننان ەشتەڭەڭىز كەتە قويماس. تاڭەرتەڭ ۇيقىدان ويانعاندا قالاي دەمالعانىن سۇراڭىز، ەش جەرى اۋىرىپ تۇرعان جوق پا ەكەن، ونى دا بىلە سالىڭىز. «ءوزىڭدى كۇتىپ ءجۇر» ، - دەپ قامقور كوڭىلىڭىزدى ءبىلدىرىپ قويىڭىز. ودان ءسىزدىڭ كىسىلىگىڭىز كەمىپ قالمايدى. قايتا سۇيىسپەنشىلىكتەرىڭىز ارتا تۇسەدى.

 ► جۇمىسىڭىزدان ەرتەرەك كەلىپ، ايەلىڭىزدىڭ جەرىك اسىن جەگىزىڭىز. كوپ ايەلدەر جەرىك كەزدە ءۇيدىڭ تاماعىن جەگىسى كەلمەيدى. سوندىقتان ءدامحاناعا ەرتىپ بارىڭىز. ايەلىڭىزگە جەرىك اسىن جەگىزەسىز، ءارى وڭاشا وتىرىپ، سىرلاسىپ قايتاسىزدار. بۇل ءتاسىلدىڭ ءبىر- ءبىرىڭىزدى تۇسىنۋگە دە جاردەمى تيەدى.

► دارىگەرگە بىرگە بارىڭىزدار. اسىرەسە، «ۋزي» - گە تۇسكەندە جانىندا بولساڭىز، ايەلىڭىزدى باقىتقا كەنەلتەسىز ءارى ونىڭ ەڭ باقىتتى ءساتىنىڭ كۋاسى بولاسىز. قۇرساقتاعى شاراناسىن مونيتوردان كورگەندە ايەلدەر توبەسى كوككە جەتەردەي قۋانادى. ايەلىڭىزدىڭ قۋانىشىن ءبولىسىپ، جانىندا بولىڭىز. ول - ەكەۋىڭىزگە ورتاق قۋانىش، ورتاق باقىت.

 ► ايەلىڭىزدىڭ اياعى اۋىرلاعاندا وتباسىنىڭ وزگە مۇشەلەرىنە، اسىرەسە اناڭىزعا وعان تۇسىنىستىكپەن قاراۋى كەرەگىن ايتىڭىز. ايەل مۇنداي كەزدە كوبىرەك ۇيىقتاعىسى كەلەدى، كەيدە ءتاتتى، كەيدە قىشقىل، اشى تاعامدارعا اۋەس بولادى. ايەلدىڭ مۇنداي «ەركەلىگىن» وزىنىكى ەمەس، قۇرساعىنداعى شاراناسىنىڭ «قالاۋى» دەپ ءتۇسىنىڭىز، مۇنى وزگەلەرگە دە ءتۇسىندىرىڭىز.

 ...قىسقاسى، جۇكتى ايەلگە قامقورلىق كورسەتكەن جاقسى. ۇيقىسى تىنىش، تاماعى توق، ۋايىمى جوق، كۇيزەلىسكە تۇسپەگەن دەنى ساۋ ايەلدەن ومىرگە دەنى ساۋ ۇرپاق كەلەتىنى ەسىڭىزدە بولسىن. ال كۇيبەڭ تىرلىكتەن تيتىقتاپ شارشاپ، اينالاسىنداعىلاردان قولداۋ كورمەگەن ايەلدەن اشۋلانشاق، ىزاقور، ءالجۋاز، اۋرۋشاڭ بالا تۋىلادى. وسى جايلار قاپەرىڭىزدە بولسىن!

Stan.kz