استانادا سەمسەرلەسۋدەن اشىق تۋرنير ءوتىپ جاتىر
جارىس 24- قىركۇيەككە دەيىن جالعاسادى. بۇل تۋرالى قالا اكىمدىگىنىڭ سايتى حابارلادى.
تۋرنيرگە ۇلى بريتانيا مەن قىرعىزستاننان، قازاقستاننىڭ وبلىستارى مەن قالالارىنان (الماتى، شىعىس قازاقستان، سولتۇستىك قازاقستان جانە وڭتۇستىك قازاقستان وبلىستارى، الماتى، قاراعاندى جانە استانا قالالارى) سپورتشىلار قاتىسادى.
جارىستىڭ اشىلۋ سالتاناتىندا 200 گە جۋىق سپورتشى وليمپيادالىق مارشپەن ءجۇرىپ ءوتتى.
- قۇرمەتتى دوستار، استاناعا قوش كەلىپسىزدەر! بيىل «استانا قىلىشى» تۋرنيرى قازاقستان رەسپۋبليكاسىنىڭ ەلورداسىندا بەسىنشى رەت وتكىزىلىپ جاتىر. سپورتشىلارعا جەڭىس قانا تىلەيمىن! ەڭ مىقتىلارى توپ جارسىن! سەمسەرلەسۋدەن V «استانا قىلىشى» حالىقارالىق اشىق تۋرنيرىن اشىق دەپ جاريالاۋعا رۇقسات ەتىڭىزدەر! - دەدى استانا قالاسىنىڭ دەنە شىنىقتىرۋ جانە سپورت باسقارماسى باسشىسىنىڭ ورىنباسارى سامات قابدۋلين.
جارىس ەكى جاس ساناتىندا وتەدى: 1999-جىلى تۋعاندار جانە 2000-جىلى تۋعان سپورتشىلار جەكە جانە كوماندالىق ەسەپتە كۇش سىناسادى.
جارىستىڭ العاشقى كۇنىنىڭ قورىتىندىسى بويىنشا اعىلشىن ستيۆەن بەيتمەن اقتىق سىنعا ءوتىپ، 3-ورىنعا تابان تىرەدى. ول تۋرنير چەمپيونى اتانعان الماتىلىق البەرت شەشينگە ەسە جىبەردى. كادەتتەر اراسىندا قازاقستاندىق يلحامجان انارقۇلوۆ توپ جاردى. ايەلدەر اراسىندا الماتى قالاسىنىڭ سپورتشىسى مەلاني حامرايەۆا، كادەتتەر اراسىندا الماتىلىق الەكساندرا تامبوۆتسيەۆا چەمپيون اتاندى. كوماندالىق جارىستاردا ەرلەر اراسىندا الماتى ق. رمي كومانداسى، ايەلدەر اراسىندا الماتى قالاسىنىڭ كومانداسى ۇزدىك دەپ تانىلدى. جەڭىمپازدارعا استانا قالاسى اكىمدىگىنىڭ دەنە شىنىقتىرۋ جانە سپورت باسقارماسىنىڭ ديپلومدارى تابىستالدى.
ادينا ءازىمحانوۆا، مانسۇر ەستەۋ سايكەسىنشە، «جەڭىسكە دەگەن ەركى ءۇشىن» جانە «تۋرنيردىڭ ەڭ تەحنيكالىق سەمسەرلەسۋشىسى» ديپلومدارىمەن ماراپاتتالدى. ەڭ جاس قاتىسۋشىلار استانا قالاسىنىڭ فيزيكا-ماتەماتيكالىق باعىتتاعى نازاربايەۆ زياتكەرلىك مەكتەبىنىڭ ديرەكتورى م. جاكەنوۆتىڭ اتىنان ءتيىستى ديپلومدار مەن سىيلىقتارعا يە بولدى.
