الماتىدا تىلدەر كۇنىنە وراي «قازاقستانىم - ورتاق شاڭىراعىم» فەستيۆالى وتۋدە
فەستيۆال جۇمىسىنا ق ح ا كەڭەسى مۇشەلەرى، الماتى قالاسى ءماسليحاتىنىڭ دەپۋتاتتارى، ەتنومادەني بىرلەستىك جەتەكشىلەرى مەن قوعامدىق ۇيىم وكىلدەرى، مەكتەپ مۇعالىمدەرى مەن وقۋشىلار قاتىسۋدا.
شارا اياسىندا «تىلدەر الەمىندە» كىتاپ كورمەسى، «ءتىل تاعدىرى - ەل تاعدىرى» سەمينارى مەن «انا ءتىلى - اياۋلى ءۇنى» كونسەرتتىك باعدارلاماسى ۇيىمداستىرىلعان.
«قازاقستان حالقى 22 - قىركۇيەكتە تىلدەر كۇنىن اتاپ وتەدى. بيىل ەل تاۋەلسىزدىگىنىڭ 25 جىلدىعىن تويلايمىز. شيرەك عاسىردا قازاقستان ساياسي- ەكونوميكالىق جەتىستىكتەرگە جەتتى. بەيبىتشىلىكتى تۋ ەتكەن كورەگەن ساياساتتىڭ ارقاسىندا قازاقستان حالقى ۇلتارالىق تاتۋلىقتا ءومىر كەشىپ وتىر»، - دەدى قازاقستان حالقى اسسامبلەياسى ءتوراعاسىنىڭ ورىنباسارى لەونيد پيتالەنكو.
ايتا كەتەيىك، 27 جىل بۇرىن - 1989 -جىلى 22 -قىركۇيەك كۇنى «ءتىل تۋرالى» زاڭ قابىلدانعان بولاتىن. بۇل زاڭدا قازاق س س ر- ءنىڭ مەملەكەتتىك ءتىلى قازاق ءتىلى، ال ورىس ءتىلى - ۇلتارالىق ءتىل دەپ بەكىتىلگەن ەدى.
بۇگىندە قازاق ەلىندە 130 دان استام ۇلت وكىلى ءومىر ءسۇرىپ كەلەدى. قازاقستان رەسپۋبليكاسىنىڭ كونستيتۋتسياسى (1995ج. )، «ءتىل ساياساتى تۋرالى» تۇجىرىمداماسى (1996ج.) جانە وسىلارعا نەگىزدەلگەن «ءتىل تۋرالى» زاڭ (1997ج.) رەسپۋبليكاداعى تىلدەردىڭ ۇلتارالىق جاراستىق پەن رۋحاني ىنتىماقتاستىقتىڭ قۇرالى رەتىندە قىزمەت ەتۋىن جانە ءتىل الۋاندىعىن كوزدەيدى.
