گولوۆكين مەن جيروۆ الماتىدا وتەتىن بوكس كەشىندە قازاقستاندىق سپورتشىلارعا قولداۋ كورسەتپەك

الماتى. قازاقپارات - الماتىدا وتەتىن كاسىپقوي بوكسشىلاردىڭ جەكپە-جەگىندە گەننادي گولوۆكين مەن ۆاسيلي جيروۆ قازاقستاندىق سپورتشىلارعا قولداۋ كورسەتەدى، - دەدى الەم چەمپيونى، قازاقستاندىق كاسىپقوي بوكسشى يسا اقبەرايەۆتىڭ پروماۋتەرى رۋستام ابدۋسالاموۆ.

«24- قىركۇيەك كۇنى بالۋان شولاق اتىنداعى سپورت سارايىندا ەل تاۋەلسىزدىگىنىڭ 25 جىلدىعىنا، الماتى قالاسىنىڭ 1000 جىلدىعىنا وراي تاماشا سپورت كەشى وتەدى. ءبىرىنشى اۋىر (91 كەلىگە دەيىن) سالماق دارەجەسى بويىنشا الەم چەمپيونى اتاعى ءۇشىن يسا اقبەربايەۆ پەن نەمىس سپورتشىسى مايك كۋرتسۆەيل اراسىندا جەكپە-جەك - ەڭ باستى وقيعا. كەشكە گ. گولوۆكين كەلىپ، وتانداستارىنا قولداۋ بىلدىرەدى. سونىمەن قاتار، تاۋەلسىز قازاقستاننىڭ ءبىرىنشى الەم چەمپيونى ۆاسيلي جيروۆ تا كەلەدى»، - دەدى رۋستام ابدۋسالاموۆ.

سونداي-اق، بۇل كۇنى رينگكە قازاقستاننىڭ بىرنەشە دۇركىن چەمپيونى فيرۋزا شاريپوۆا دا شىقپاق.

يسا اقبەربايەۆ بۇل كەشكە كاسىپقوي بوكستا ءۇمىت ارتىپ جۇرگەن قازاقستاندىق بوكسشىلاردى ادەيى جيناپ وتىرعانىن ايتتى.

«ال جەكپە-جەك تۋرالى ايتار بولسام، سايىس قىزۋ وتەتىنىنە، جەڭىس ءبىزدىڭ جاقتا بولاتىنىنا ءۇمىتتىمىن»، - دەدى يسا اقبەربايەۆ.

اۆتور: الماس مۇقاش ۇلى