المانىڭ ادام ومىرىنە قاي كەزدە قاۋىپ تۋعىزاتىنىن بىلەسىز بە؟

استانا. قازاقپارات - ادەتتە المانى «دەنساۋلىق جەمىسى» دەپ اتايدى. وعان ءبىر سەبەپ ونىڭ قۇرامىندا كوپتەگەن دارۋمەندەر مەن انتيوكسيدانتتاردىڭ بولۋى.

 الايدا كوپشىلىك المانى سوڭىنا دەيىن، ياعني ءتۇبى مەن سۇيەكتەرىنە دەيىن جەۋگە بولمايتىنىن بىلە بەرمەيدى.

اعىلشىن تىلىندە مىناداي ماقال بار: «كۇنىنە ءبىر الما جەگەن ادام دارىگەردىڭ الدىنا بارمايدى» (An apple a day keeps the doctor away) . المانى تۇتىنۋ كوپتەگەن اۋرۋلاردىڭ، ونىڭ ىشىندە وبىردىڭ دا الدىن الاتىنى انىقتالعان. باسقا جەمىس- جيدەكتەرمەن سالىستىرعاندا قۇرامىندا س دارۋمەنى كوپ مولشەردە بولماعانىمەن، الما انتيوكسيدانتتارعا باي. المانىڭ وزەگى ىشەكتىڭ جيىرىلۋىنا سەبەپ بولىپ، جۇرەكتىڭ جۇمىسىن جاقسارتادى ءارى حولەستەريننىڭ مولشەرىن ازايتادى.

كەيبىر ديەتولوگتار المانى تۇتاستاي جەۋگە كەڭەس بەرەدى. الايدا ول دۇرىس ەمەس. المانىڭ سۇيەگىندە وتە قاۋىپتى قوسپا - بادام قىشقىلى نيتريلىنىڭ گەنتسيبيوزيدى C20H27NO11 نەمەسە اميگدالين بار. سونداي- اق، بۇل شيە، بادام، شابدالى جانە الحورى تەكتەس وسىمدىكتەردىڭ باسىم بولىگىندە بار. اميگداليننىڭ مولشەرى ءار جەمىستە ءارتۇرلى بولىپ كەلەدى. ماسەلەن بادام مەن شابدالىنىڭ قۇرامىندا شامامەن %2,5-3 بولسا، ورىكتە -% 1,8، ال المانىڭ قۇرامىندا -% 0,6 بولادى.

عالىمدار جەمىس- جيدەكتەردىڭ قاۋىپتىلىگىن ەسكە سالدى. اميگدالينمەن ۋلانعان ادامنىڭ كەم دەگەندە باسى اۋرىپ، جۇرەگى اينيدى. اۋىر ناۋقاستانسا، ادام تسيانوز، تىرىسپاعا شالدىعىپ، ەسىن جوعالتۋىن مۇمكىن. ونىڭ اقىرى ولىممەن اياقتالۋى دا عاجاپ ەمەس.

جاڭا زەلانديادا 30-60 ورىك سۇيەگىن تۇتىنعاننان كەيىن اميگدالينمەن ۋلانعان ادام تىركەلگەن. ناقتى نەشە الما سۇيەگىنىڭ ۋلانۋعا اكەلىپ سوقتىراتىنى سانالعان جوق، الايدا از مولشەردە بولسا دا ءار سۇيەكتىڭ زيان الىپ كەلەتىنىن ۇمىتپاعايسىز.

Stan.kz