تاريحي نىسانداردى ارالاپ جۇرگەن ەكسپەديتسيا مۇشەلەرى قاسقىر سوعىپ الدى
ەكسپەديتسيا مۇشەلەرى قوستاناي وبلىسى، امانگەلدى اۋدانىنىڭ، قابىرعا اۋىلىنىڭ جانىنداعى كەنەسارى حاننىڭ ساردارلارىنىڭ ءبىرى قوشقار باتىردىڭ باسىنا بارىپ قۇران باعىشتاپ شىعىپ، تەنتەكتىڭ بويىنداعى بايقادام كونە مەشىتىنىڭ ورنىنا بارا جاتقان جولدا قاسقىرلارعا تاپ بولدى. ەكسپەديتسيا مۇشەلەرى جول جيەگىنەن 1-2 شاقىرىم قاشىقتىقتا قارعا، قۇزعىنداردىڭ كوپتەپ ۇشىپ- قونىپ جۇرگەنىن بايقاپ، بىردەن كولىكتەرىن سولاي باعىتتادى، وسى كەزدە جىلقىنىڭ قالعان جەمتىگىن جاۋكەمدەپ جاتقان 4 بىردەي قاسقىردىڭ ۇستىنەن ءتۇستى. سول ارالىقتا ەكسپەديتسيا قۇرامى قاشىپ ۇلگىرمەگەن ءبىر قاسقىردى كولىكتەرىمەن سوعىپ قۇلاتىپ، قانجىعالارىن مايلادى .
بىزگە جول باستاپ كەلە جاتقان اۋىل ازاماتى عانيبەك بايجانوۆتىڭ ايتۋىنشا جاقىن ۋاقىتتاردان بەرى قاسقىر اۋىل مالدارىنا ءجيى شاباتىن بولعان. اۋىلدىڭ 4 قوشقارى مەن 2 ەشكىسىن تاماقتاپ، بىرنەشە بەس بۇزاۋىن جاراقاتتاپ كەتكەن ەكەن. سوندىقتان ساپاردا جۇرگەن بىزدەر بۇل ولجامىزدى جاقسىلىققا جورىساق، ال اۋىل تۇرعىنى مالىمىزعا شاباتىن قاسقىردىڭ سانى بىرەۋ بولسادا ازايدى دەپ قۋانىپ جاتتى .
وسىعان دەيىن دە ەكسپەديتسيا ەلسىز دالالاردان تۇلكى مەن قابانداردى، جولدا جاتقان جىلانداردى كەزدەستىرگەن بولاتىن. تىپتەن، قازاق دالاسىنىڭ ءسانى بولعان، كيەلى اڭ اقبوكەندەردىڭ دە 5-6 اۋىن الىستان كوزىمىز شالعان. بىزدەر سوندا جاقىنعى جىلداردان بەرى بەلگىسىز ىندەتتەن قىرىلىپ، سانى كەمىپ كەتكەن كيىكتەردىڭ، سار دالادا ساعىمداي جۇيتكىگەن ەركە اڭنىڭ اماندىعىن تىلەگەن ەدىك.
ەستەرىڭىزگە سالا كەتەيىك,11- قىركۇيەك كۇنى ارقالىق قالاسىنان باستاۋ العان، « ءور تورعاي ەرلىك مەكەنى» اتتى ەكسپەديتسيانىڭ ءبىر اپتاعا مەجەلەگەن ساپارى بارىسىندا ەكى مىڭ شاقىرىم جولدى باسىپ ءوتىپ، تاريحي ماڭىزى زور وتىزدان استام نىسانعا بارۋ جوسپارلانعان. ەكسپەديتسيا قۇرامىندا عالىمدار، ولكەتانۋشىلار، قوعام بەلسەندىلەرى، جۋرناليستەر مەن بلوگەرلەر بار.
باقىتجول كاكەش
