ءمولدىر اۋەلبەكوۆا: ابىرويىمنان ايىرماسىن دەپ تىلەيمىن
اڭگىمەمىزدەن ءانشىنىڭ جاستار تاربيەسىندەگى جۇلدىزداردىڭ ءرولى تۋرالى كوزقاراسىن ءبىلىپ، ارمانعا قول جەتكىزۋىنىڭ وزىندىك جولىمەن تانىس بولا الاسىزدار.
ءمولدىر، جازعى دەمالىستى قالاي وتكىزدىڭىز؟
جاز دەمالىسىن شەتەلدە ەمەس، ءوز ەلىمىزدە وتكىزۋدى ۇيعاردىق. ءار ايماقتا، ءارتۇرلى دەمالىس ورىندارىندا بولىپ، شەتەلدەن كەم تۇسپەيتىن تابيعاتىمىزدا جاقسى تىنىعىپ قايتتىق.
جولداسىڭىز ءسىزدىڭ شىعارماشىلىعىڭىزعا، جالپى ونەرگە قالاي قارايدى؟
جولداسىم مەنىڭ 10 جىل وسى سالادا ءبىلىم الىپ، 12 جىلدان استام ۋاقىت ەڭبەكتەنىپ كەلە جاتقانىمدى تولىق ءتۇسىنىپ، ۇلكەن قولداۋ كورسەتۋدە.
ەل الدىندا جۇرگەن سوڭ، ءسىزدىڭ سىرت كەلبەتىڭىز ۇنەمى نازاردا جۇرەدى. ساحنا كيىمدەرىڭىزدى تىڭدارماندارىڭىز جوعارى باعالايدى، كويلەكتەردى قايدان الاسىز؟
ساحنا كيىمى انگە بايلانىستى تاڭدالادى. ياعني، ءاندى حالىق قۇلاقپەن تىڭداپ، كيگەن كيىمدى كوزبەن كورىپ، ەكەۋى ءبىر- بىرىمەن ۇيلەسىپ جالپى وبراز قالىپتاسۋى ءتيىس. ارنايى وتاندىق ديزاينەرلەردىڭ كومەگىنە جۇگىنىپ تىكتىرتەمىن، نە بولماسا كاتالوگ ارقىلى شەتەلدىك برەند دۇكەندەرىنەن تاپسىرىسپەن الدىرتامىن.
الەۋمەتتىك جەلىلەرگە دەگەن كوزقاراسىڭىز قانداي؟ ونداعى سىن- پىكىرلەردى كوڭىلىڭىزگە الاسىز با؟
الەۋمەتتىك جەلىنىڭ پايداسى دا، زيانى دا مول. تۇتىنۋشى ءوزى تاڭدايدى، كەرەگىن الىپ كەرەكسىزىنەن باس تارتۋى قاجەت. مەن ينستاگرام جەلىسىنىڭ قولدانۋشىسىمىن. پاراقشامدى ءوزىم جۇرگىزەمىن. حالىقتىڭ پىكىرىمەن ساناسۋ كەرەك دەپ ويلايمىن. ارينە، ەستى سىندى قابىلداپ، ەسسىزىنە ءمان بەرمەۋگە تىرىسامىن. وقىرماندارىمنىڭ سۇراقتارىنا قولىمنان كەلگەنشە ۋاقىت تاۋىپ جاۋاپ بەرەمىن. ءبىر قادام تىڭدارماندارىما، قولداۋشى حالقىما جاقىن بولعانىما قۋانامىن.
ماقساتشىلسىز با؟
ماقساتشىلدان بۇرىن، ارمانشىلمىن. مەنى ارماندار جەتەلەيدى. ارمان ماقساتقا، ماقسات جوسپارعا، جوسپار ىسكە اسىپ جاتادى.
كوپشىلىك قاۋىم جۇلدىزداردىڭ ونەرىنەن گورى، جەكە ومىرىنە قىزىعۋشىلىق تانىتادى. جۇلدىز بولۋدان جالىققان ساتتەر بولدى ما؟
حالىقتىڭ، ياعني، ونەر ادامى بولعاندىقتان، جالىعۋدان ساقتاسىن. "جالىقتىم" دەسەم حالىقتان جالىققانداي بولامىن. تاۋبەمەن ءجۇرىپ، ءاردايىم سابىر ەتەمىن. قايتا وسى ابىرويىمنان ايىرماسىن دەپ تىلەيمىن. جەكە ومىرىممەن بولىسۋدەن قاشقان ەمەسپىن. قايتا قۋانىشىما ورتاقتاسىپ، جىلى لەبىز ءبىلدىرىپ، تىلەكتەرىن جاۋدىرتىپ وتىرعان جانداردىڭ جىلۋلىق سەزىمىنە بولەنگەننىڭ ءوزى باقىت ەمەس پە.. .
بوس ۋاقىتىڭىزدا كىتاپ وقيتىنىڭىزدى بىلەمىز. سوڭعى وقىعان كىتابىڭىز قانداي؟
تۇرمىستاعى كەلىنشەك بولعالى، كوبىنەسە وتباسى تۋرالى كىتاپتارعا قىزىعامىن. سوڭعى وقىعان كىتابىم - "يسلام جانۇياسى".
قازىر نارىق زامانى، جەكە كاسىپ باستاۋ ويىڭىزدا بار ما؟
نارىق زامانىندا جەكە كاسىپپەن اينالىسۋ جوسپاردا تۇر. ءبىراق، قاي سالانى قامتيتىنىن ءالى شەشكەن جوقپىز. جولداسىم كاسىپكەر، سول سەبەپتى، وتاعاسىنىڭ اقىلىنا جۇگىنەتىن بولامىن.
قازاق ەستراداسى قايدا بارا جاتىر؟ شەتەلگە ەلىكتەۋشىلىككە قالاي قارايسىز؟
ءار بولىپ جاتقان كەزەڭگە وڭ كوزقاراسپەن قاراۋعا تىرىسامىن. بۇرىنعى ەسترادامىزبەن سالىستىرعاندا كوش ىلگەرىمىز. كەزىندە اندەردىڭ، تەلەباعدارلامالاردىڭ باسىم كوپشىلىگى ورىس تىلىندە بولدى. قازىر، شۇكىر، تەك ورىس تىلىندە ءان شىرقاعان قانداستارىمىز قازاق تىلىنە قاراي ويىستى. باعدارلامالار تۇگىلى، جاڭا ارنالار اشىلىپ ءتىلىمىز مۋزىكا ارقىلى دارىپتەلۋدە. ارينە، ءمانسىز- ماعىناسىز اندەر كوبەيدى، انشىلەر دە از ەمەس. دەگەنمەن، حالىق ءوزى تاڭداپ، كەرەگىن ساراپتاپ الادى. قالعانى ۋاقىتشا عانا، وتكىنشى بولىپ قالا بەرەدى.
قوعام تاربيەسىندە انشىلەر قاۋىمى وزىنە جاۋاپكەرشىلىك الۋى ءتيىس پە؟
قازىرگى ەلىكتەگىش زاماندا، قوعام تاربيەسىندە ءبىزدىڭ كىشىگىرىم ءرولىمىز بار. جاۋاپكەرشىلىكتى سەزىنۋگە ءتيىسپىز. عالامتور دامىعان ۋاقىتتا، جاستاردىڭ باسىم كوپشىلىگى ءبىزدىڭ ونەرىمىزبەن قاتار ءومىرىمىزدى باقىلاۋدا. بىزدەن كورگەنىنە قىزىعۋى مۇمكىن. سول تۇرعىدا، اشىق كيىنۋ، ەرسى سويلەۋ، مادەنيەتسىزدىك تانىتۋ سياقتى دۇنيەلەرگە جول بەرمەۋىمىز كەرەك. ءيا، اشىق كيىنۋدە تۇرعان نە بار دەگەن پىكىرلەر دە از ەمەس. دەگەنمەن، ەڭ اۋەلى ءدىنىمىز - يسلام، تەگىمىز - قازاق ەكەنىن ۇمىتپاعانىمىز ابزال.
سۇحباتىڭىزعا راحمەت، ءمولدىر!
AFISHA. NUR. KZ
