تانىمال مودەل قازاق كەلىندەرى باعالانباي جۇرگەنىن ايتىپ، دابىل قاقتى
بۇل تۋرالى NUR. KZ پورتالى comode.kz سايتىنا سىلتەمە جاساپ حابارلايدى.
قازاقستاندىق ديزاينەر اينۇر تۇرىسبەكتىڭ باستى ءارى سۇيىكتى مودەلى ديانا ىدىرىس كەلىن بولۋدىڭ تاجىريبەسىمەن ءبولىسىپ، قازاق كەلىندەرىنىڭ قيىن جاعدايىن ءسوز ەتتى.
مودەلدىڭ پىكىرىنشە، قۇدالارعا «كيىت بەرۋ» - ەسكىرگەن كونە ءداستۇر. ول «كيىتكە» كەتكەن اقشاعا شەتەلگە بارىپ دەمالىپ قايتقان دۇرىسىراق دەپ ويلايدى.
«تويدان كەيىن مەن سۋپەر كەلىن اتانۋعا بارىنشا تىرىستىم. تۇسكى اسقا مانتى كەرەك پە؟ تەز-اق ازىرلەيمىن. ال شىنىن ايتقاندا، ءبارىن «گۋگلدان» سۇرايتىنىمىز وتىرىك ەمەس. جىگىتتىڭ جۇرەگىن تاعاممەن جاۋلايسىڭ دەگەن شىن دا شىعار، ءبىراق اقىلدىڭ دا وينايتىن ءرولى بار»، - دەيدى ديانا.
ول قازاق كەلىندەرىنىڭ قاتىگەز كۇيەۋىنەن نەلىكتەن كەتە المايتىنىن ءتۇسىندىرىپ بەردى.
«بالا-شاعامدى جانە ءوزىمدى اسىراي المايمىن دەگەن قورقىنىش - ايەلدەردىڭ تيگەن كۇيەۋىنەن كەتە الماۋىنا بىردەن ءبىر سەبەپكەر. جۇمىس ىستەيتىن ايەلگە بۇل جايت قورقىنىش تۋدىرمايدى»، - دەپ اعىنان جارىلدى مودەل.
ديانا وسى تۇرعىدا كەلىن رەتىندە كوپ قيىنشىلىق كورگەن اجەسىن ەسىنە الدى.
«مەنىڭ اجەم بولاتىن. ول كەزەكتى بالاسىن ۇيىندە بوسانعانىندا، بولمەگە ەنەسى كىرىپ كەلىپ «مىنا قاتىن تۋدى، بۇگىن شاي ىشپەيمىز، بىلەمىن عوي» دەپ قاتتى ايتقان ەكەن. سول كەزدە اجەم ورنىنان تۇرىپ، ساماۋرىن قايناتۋعا كەتتى. ەڭ سوراقاسى - بۇگىن دە كەلىندەردىڭ جاعدايى وزگەرە قويماعانى، تەك ۇيدە ەمەس، پەرزەنتحانادا بوسانادى دەمەسەڭ»، - دەپ رەنىشىن ءبىلدىردى ول.
مودەل ەلىمىزدە «ەنەلەر اينالىمى» تۇسىنىگى تۇراقتالىپ قالعانىن ءسوز ەتتى.
«قازاق ايەلدەرى اراسىندا «ەنەلەر اينالىمى» ۇعىمى قالىپتاسىپ قالعان. ءار ەنە كەلىنىنە ءوز ەنەسى جاساعانداردى قايتالايدى»، - دەيدى ديانا.
جاسى 25 كە كەلگەندەردى كارى قىز اتايتىنداردى دا مودەل تۇسىنە المايدى ەكەن.
«ءبىزدىڭ قازاقتار جاسىڭ 25 كە كەلسە كارى قىز دەيدى. سول سەبەپتى، قىزدار اسىعىس تۇرمىسقا شىعادى. ال اجىراسقان قىزداردى نە دەيتىنىن ءتىپتى ايتپاي-اق قويايىن. ەۋروپادا 30 جاسىڭدا تۇرمىسقا شىعۋىڭ - قالىپتى جاعداي. ول ۋاقىتتا ايەل اقىل توقتاتىپ، بەرىك وتباسىن قۇرۋعا تولىقتاي دايىن بولادى»، - دەپ سالىستىردى ارۋ.
وسى تۇرعىدا ديانا قازاق قىزدارىنا لايىقتى باعا بەرىلمەي جۇرگەنىنە كۇيىندى.
«يسپان قىزدارىنىڭ اتىنا كەرەمەت كولىكتەردى بەرىپ جاتادى. ال قازاق قىزدارىنا ۇلبولسىن، ۇلجالعاس، ۇلتۋار، ۇلجان دەگەن ەسىمدەر بەرەدى. مۇنداي قىزدار ءاۋ باستان اتا-اناسىنىڭ تەك ۇل قالاعانىن ءتۇسىنىپ، سوعان كوندىگىپ وسۋگە ءماجبۇر. بىزدە ايەلدەردىڭ ءرولى ەش باعالانباعانى قالاي؟»، - دەپ سۇراق قويدى ول.
ديانا كۇيەۋىنىڭ قول كوتەرگەنىنە شىداپ جۇرگەن قازاق قىزدارىنا «مەن قانشالىقتى باقىتتىمىن» دەگەن سۇراقتى قويۋعا كەڭەس بەردى. ارۋدىڭ پىكىرىنشە، وندايعا شىداپ جۇرەتىن ايەلدەرگە اتا-اناسى تەك كەلىن مەن ايەل بولۋدى ۇيرەتكەن.
«ءبىر كۇنى مەنىمەن بىرگە ەمحانادا 50 جاستاعى ايەل جاتتى. كۇيەۋى - ىشكىش، ءوزى جەتى بالا تاۋىپ العان. ەمحانادان شىعا سالىسىمەن استاناعا بارىپ، ەلدەن كومەك سۇرايمىن دەيدى. بولماسا ءوزىمدى جانە بالالارىمدى ورتەي سالامىن دەگەندە توبە شاشىم تىك تۇردى. كۇيەۋى ىشكىش، تابىسى جوق بولسا، نەسىنە سەنىپ جەتى بالا تۋدى؟ «نەسىبە» دەپ قويادى. نەسىبەنىڭ دە ءتۇر-ءتۇرى بولادى ەكەن»، - دەپ تاڭىرقادى ديانا.
مودەل ساۋاتى تومەن كەلىندەردىڭ، ءتىپتى ەمحانادا دەنساۋلىعى قانشالىقتى اۋىر ەكەنىن ۇقپايتىنىن دا جاسىرمادى. ءوزىن قويىپ، بالاسىن دا قاۋىپكە توندىرەتىندەردى ايەل مۇلدەم جاقتامايتىنىن اشىق ايتتى.
«مەنىڭ ءبىر تانىسىم بالاسىنىڭ ارقاسىنا شىققان ىسىكتى قويدىڭ مايىمەن ەمدەمەك بولدى. بۇل قاتەرلى ىسىك بولسا شە؟ مۇنداي ساۋاتسىزدىق - زاماناۋي قازاقتاردىڭ اسقىنىپ تۇرعان ماسەلەسى»، - دەپ كۇيىندى ديانا.
