قازاقپارات ءستيلىن وزگەرتەدى
«بۇرىنعىسىنشا باسىمدىلىق مەملەكەتتىك ساياسات، الەۋمەتتىك- ەكونوميكالىق سالاداعى جاڭالىقتارعا بەرىلەدى. الايدا، سونىمەن بىرگە ءبىزدىڭ ماقساتىمىز قاتارداعى وقىرماننىڭ سۇرانىسىنا ساي بولۋ. سوندىقتان سايتتا وسى مۇددەلەرگە سايكەس كەلەتىن ماتەريالدار جاريالانادى» ، - دەدى ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا «قازاقپارات» حالىقارالىق اقپارات اگەنتتىگىنىڭ باس ديرەكتورى اسەل تولەگەنوۆا.
ونىڭ سوزىنە قاراعاندا، كونتەنتتەگى وزگەرىستەر وقىرمانداردىڭ تاڭداۋىنا جۇرگىزىلگەن تالداۋدى ەسەپكە الا وتىرىپ ايقىندالدى. وسى رەتتە وقيعالار، قىلمىس، جەمقورلىق، قارجى، باسپانا، اۆتوجۇرگىزۋشىلەرگە ارنالعان جاڭالىقتار، مەديا تۇلعالارى، جانجالدار سەكىلدى تاقىرىپتار ەسكەرىلىپ وتىر. سونىمەن قاتار الەۋمەتتىك جەلىلەردەن، ازاماتتاردىڭ شاعىمدارىنا قاتىستى اقپارات جانە ءتۇرلى مەسسەندجەرلەر ارقىلى حابارلامالار بەلسەندى پايدالانىلادى.
سايتتىڭ جاڭارتىلعان گرافيكالىق ديزاينى مەن باستى بەتتىڭ وزگەرتىلگەن قۇرىلىمى وقىرمان ءۇشىن پايدالانۋعا ىڭعايلى بولا تۇسەدى. ال ورىندالعان ديزايننىڭ تۇستىك گامماسى قارالىم بارىسىندا كوزگە سالماق تۇسىرمەيدى.
رەداكسيانىڭ پايىمىنشا، جۇرگىزىلىپ جاتقان جۇمىستار سايتتىڭ تارتىمدىلىعىن ارتتىرىپ، كوپشىلىك اۋديتوريا ءۇشىن قولجەتىمدىرەك بولۋعا مۇمكىندىك بەرەدى. ناتيجەسىندە، سايتتىڭ ءبىر تاۋلىكتەگى بىرەگەي پايدالانۋشىلارى 27 مىڭنان 45 مىڭعا دەيىن جەتكىزىلمەك.
