جىل سايىنعى قايىرىمدىق ماقساتتاعى استانا مارافونى باستالدى
اتالعان جارىسقا بايلانىستى بۇگىن تاڭعى ساعات 8 دەن 14:00 گە دەيىن استانادا ءبىرقاتار كوشەلەردە قوزعالىس شەكتەلىپ، وسى رەتتە ورىنبور كوشەسىمەن، رەسپۋبليكا، تۇران، ابىلاي حان داڭعىلدارى جانە شاھاردىڭ وزگە دە نەگىزگى كوشەلەرى ارقىلى مارافونشىلار جۇگىرىپ وتپەك. جارىس «حان شاتىردان» باستالىپ، سول جەردەن اياقتالادى. ۇيىمداستىرۋشىلاردىڭ ايتۋىنشا، وسىنداي باعدار قوناقتارعا استانانى بارىنشا كورسەتۋگە مۇمكىندىك بەرەتىنىن اتاپ ءوتتى، ياعني قازىرگى زامانعى مارافوندار تۋريزمدى دامىتۋدىڭ بالامالى جولى.
بۇگىندە شاراعا ق ر پرەمەر-ءمينيسترى كارىم ءماسىموۆ، ق ر پرەزيدەنتى اكىمشىلىگىنىڭ باسشىسى ادىلبەك جاقسىبەكوۆ، ۇكىمەت مۇشەلەرى، ءبىرقاتار وتاندىق جانە حالىقارالىق كومپانيالاردىڭ وكىلدەرى، ەل تۇرعىندارى، قازاقستاندا تىركەلگەن ەلشىلىكتەردىڭ قىزمەتكەرلەرى، سونداي-اق الىس جانە جاقىن 25 شەتەلدىڭ اتلەتتەرى قاتىسۋدا. اتاپ ايتقاندا، قازىرگى كەزدە ا ق ش، برازيليا، گەرمانيا، ۇلى بريتانيا، مالايزيا، اۆستراليا، بەلگيا، يران، رەسەي، تۇركيا، گرەكيا، جاپونيا، وزبەكستان، قىتاي، فرانسيا، پولشا جانە باسقا دا ەلدەردىڭ ازاماتتارى بار.
بۇدان بۇرىن حابارلانعانداي، جالپى العاندا 5 مىڭعا جۋىق ادام جۇگىرەتىنى جوسپارلانعان.
بەلگىلى بولعانداي، شاراعا قاتىسۋشىلار ءۇشىن بۋرابايعا جانە ەلورداعا جاقىن ورنالاسقان «الجير» مۇراجايىنا، سونىمەن قاتار وزگە دە ماڭىزدى ورىندارعا ساپارلار جوسپارلانىپ وتىر.
اتاپ ايتقاندا، وسى قايىرىمدىلىق مارافونى ەلوردادا 2009-جىلدان بەرى ءداستۇرلى تۇردە ۇيىمداستىرىلۋدا. مارافون قاشىقتىعى استاناداعى ەسىل، الماتى جانە سارىارقا اۋداندارىن قامتىپ وتىر. وسى رەتتە سپورتتىق شارا 4 ساناتتا وتەدى، ياعني 42,2 شاقىرىم، 21,1 شاقىرىم، 10 شاقىرىم قاشىقتىقتا جۇگىرۋلەر ەسكەرىلىپ وتىر. بۇل مارافون قايىرىمدىلىق جارىس بولىپ تابىلاتىندىعى بەلگىلى. 2009-جىلدان بەرى 24 ميلليون تەڭگە جينالىپ، ءتۇرلى قايىرىمدىلىق ۇيىمدارعا قولداۋ جاسالدى. 21,1 شاقىرىمدا نورماتيۆتى ورىنداعان قاتىسۋشىلارعا قازاقستان رەسپۋبليكاسىنىڭ سپورت شەبەرى اتاعى بەرىلەدى.
استانا مارافون-2016 جارىسىنىڭ قاتىسۋشىسى اتانۋ ءۇشىن باستاپقى جارنانى تولەۋ قاجەت. تىركەلۋدىڭ ەكى ءتاسىلى بار. بىرىنشىسىندە - astana42k.com سايتىندا ونلاين رەجىممەن قوسىلۋعا بولادى. ال ەكىنشى ءتاسىلى ارنايى بەلگىلەنگەن ورىنداردا جۇزەگە اسىرىلادى. نيەت بىلدىرگەندەر كروسسفيت استانا كلۋبتارىنىڭ بىرىنە كەلىپ، قولما-قول جارنانى ەنگىزۋ جولىمەن تىركەلدى.
