وزبەكستان پرەزيدەنتى يسلام كاريموۆ قايتىس بولدى
بۇل تۋرالى ي. كاريموۆتىڭ قىزى لولا كاريموۆا- تيلليايەۆا ينستاگرامداعى پاراقشاسىندا حابارلادى.
مەملەكەت باسشىسىنىڭ جەرلەۋ ءراسىمى 3 - قىركۇيەك كۇنى سامارقاندتا وتەدى. جەرلەۋ ءراسىمىن ۇيىمداستىرۋ كوميسسياسىن وزبەكستاننىڭ پرەمەر- ءمينيسترى شاۆكات ميرزيەيەۆ باسقاردى.
ءبىرقاتار ب ا ق ەل ۇكىمەتى مەن پارلامەنتىنىڭ حابارلاماسىنا سىلتەمە جاساپ، مەملەكەت باسشىسىنىڭ قازاسىنا بايلانىستى ەلدە ءۇش تاۋلىك قارالى كۇن جاريالانادى دەگەن اقپارات تاراتىپ جاتىر.
بۇعان دەيىن، 2 - قىركۇيەك كۇنى وزبەكستان پرەزيدەنتىنىڭ سايتىندا مينيسترلەر كابينەتىنىڭ كاريموۆتىڭ دەنساۋلىعىنا قاتىستى حابارلاماسى جاريالاندى.
وندا وتكەن سەنبىدە ينسۋلت العاننان كەيىن اۋرۋحاناعا جاتقىزىلعان مەملەكەت باسشىسى يسلام ابدۋگانيەۆيچ كاريموۆتىڭ جاعدايى كۇرت ناشارلاپ كەتكەنى ايتىلعان.
يسلام ابدۋعاني ۇلى كاريموۆ 1938 -جىلى 30 - قاڭتاردا دۇنيەگە كەلگەن. وزبەكستان رەسپۋبليكاسىنىڭ تۇڭعىش پرەزيدەنتى، مەملەكەت قايراتكەرى، وزبەكستان عىلىم اكادەمياسىنىڭ اكادەميگى (1994)، وزبەكستان قاھارمانى (1994).
2000 -جىلى وتكەن بۇكىل حالىقتىق سايلاۋدا وزبەكستان رەسپۋبليكاسى پرەزيدەنتى بولىپ قايتا سايلاندى؛
سوڭعى سايلاۋ 2015 -جىلدىڭ نارۋىز ايىندا ءوتتى.
تاۋەلسىز وزبەكستان رەسپۋبليكاسىنىڭ ءبىلىم بەرۋ سالاسىنا سىڭىرگەن ەڭبەگى ءۇشىن يسلام كاريموۆقا «وزبەكستان قاھارمانى» اتاعى بەرىلگەن. سونداي- اق ول «مۋستاكيلليك» جانە ءامىر تەمىر مەدالدارىمەن ماراپاتتالعان.
ودان بولەك، ي. كاريموۆ ءبىرقاتار مەملەكەتتەردىڭ جانە بەدەلدى حالىقارالىق ۇيىمداردىڭ وردەندەرىمەن، مەدالدارىمەن جانە قۇرمەتتى اتاعىمەن ماراپاتتالعان.
