ريو وليمپياداسىنىڭ قولا جۇلدەگەرى الەكساندر زايچيكوۆ قازالى جۇرتشىلىعىمەن كەزدەستى

قىزىلوردا. قازاقپارات - ەلىمىزدىڭ ماقتانىشىنا اينالعان سپورتشى، ريو وليمپياداسىنىڭ قولا جۇلدەگەرى الەكساندر زايچيكوۆ قازالى جۇرتشىلىعىمەن كەزدەستى.

بۇل تۋرالى اۋدان اكىمدىگىنىڭ باسپا ءسوز قىزمەتى حابارلادى.

اۋدان اكىمىنىڭ ورىنباسارى ا. قارجاۋبايەۆ سىر بويىلىق تولاعايعا جەرلەستەرىنىڭ ۇكىلەگەن ۇمىتتەرىن اقتاعانى ءۇشىن العىسىن ءبىلدىرىپ، زايچيكوۆپەن قازالىلىقتاردىڭ ماقتاناتىنىن جەتكىزدى. سونداي-اق، چەميونعا اق بوز ات مىنگىزدى.

الەكساندر ءوز سوزىندە بۇل جەڭىستىڭ تالماي ەتكەن ەڭبەكتىڭ جەمىسى مەن جانكۇيەرلەردىڭ قولداۋىنىڭ ناتيجەسى ەكەنىن ايتىپ، ەگەمەن ەلدىڭ ابىرويىن بيىككە كوتەرەمىن دەگەن ۋادەسىن بەردى.

ايتا كەتەيىك، اۋىر اتلەت الەكساندر زايچيكوۆ ريوداعى ХХХІ   جازعى وليمپيادا ويىندارىندا 105 كەلىگە دەيىنگى سالماقتا باق سىناپ، قوسسايىس قورىتىندىسى بويىنشا 416 كەلىنى ەڭسەرىپ، قازاقستان قورجىنىنا قولا جۇلدە سالعان بولاتىن.