تۋعان كۇندى اتاپ وتۋگە بولا ما؟

استانا. قازاقپارات - ءوز وتباسىندا تۋعان كۇندى مەرەكەلەۋگە بولا ما؟ ول شاريعاتقا قارسى ەمەس پە؟ ىسىراپ ەمەس پە؟ وسىعان قاتىستى دىنىمىزدە نە ايتىلعان؟

تۋعان كۇندى اتاپ ءوتۋ ماسەلەسى توڭىرەگىندە پىكىر بىلدىرگەن ءدىن ماماندارىن ەكى توپقا بولۋگە بولادى:

1.تۋعان كۇندى اتاپ ءوتۋدى كۇنا سانايتىن ماماندار.

2.تۋعان كۇندى اتاپ وتۋگە رۇقسات دەيتىن ماماندار.

تۋعان كۇندى اتاپ وتۋگە قارسى كەلگەندەر مىنا ەكى نەگىزگە سۇيەنەدى:

«كىم ءبىر قاۋىمعا ۇقساسا (ەلىكتەسە) ول - سولاردان». (حاديس. ءابۋ ءداۋىد، احمەد يبن ءحانبال، تاباراني ت. ب. ).

«كىمدە- كىم ءبىزدىڭ بۇل ىسىمىزگە (دىنگە) وندا جوق نارسەنى ەنگىزسە، ونىسى قابىل ەتىلمەيدى». (حاديس. بۋحاري جانە ءمۇسلىم).

بۇل دەگەنىمىز، تۋعان كۇن تويلاۋ - مۇسىلمان ەمەستەردىڭ ەنگىزگەن ءداستۇرى. ەگەر تۋعان كۇندى تويلايتىن بولساق، مۇسىلمان ەمەستەرگە ۇقساعان بولامىز. سونداي-اق، اتالمىش ءۇردىس پايعامبار مەن ساحابالار كەزەڭىندە جوق ەدى. پايعامبارىمىز جاساماعان ءۇردىستى مۇسىلمانداردىڭ ۇستانۋى دىنگە ەنگىزىلگەن جاڭالىق (بيدعات) بولماق. بۇعان جول جوق.

تۋعان كۇندى اتاپ وتۋگە رۇقسات دەيتىن مامانداردىڭ سۇيەنگەن نەگىزدەرىنە كەلەر بولساق:

قۇنداقتا جاتقان يسا پايعامبارعا اللانىڭ قۇدىرەتىمەن ءتىل شىعىپ، جۇرتقا ايتقان مىنا ءبىر ءسوزى قۇراندا بايان ەتىلگەن: «ماعان تۋىلعان كۇنىمدە دە، ولەر كۇنىمدە دە جانە قايتا تىرىلەتىن كۇنىمدە دە ەسەندىك بولادى». (ءماريام سۇرەسى، 33-ايات. ).

پايعامبارىمىزدان (س. ا. ۋ. ) دۇيسەنبى كۇنى ۇستالاتىن ورازا جايىندا سۇرالادى. سوندا اللا ەلشىسى: «ول كۇن -  مەنىڭ تۋىلعان كۇنىم. جانە ول كۇنى ماعان پايعامبارلىق بەرىلدى»، - دەپ جاۋاپ بەرگەن. (حاديس. يبن حاببان -  3725؛ ءمۇسلىم-1985؛ ءال- حاكيم-4110. ت. ب. ). وسى حاديستە پايعامبارىمىز ءوزىنىڭ تۋىلعان كۇنى مەن پايعامبارلىق بەرىلگەن كۇنى بولعاندىقتان اللاعا شۇكىر ەتىپ، دۇيسەنبى كۇنى ورازا ۇستايتىنىن ايتىپ وتىر. حاديستەن بايقاعانىمىزداي، ادامنىڭ دۇنيەگە كەلۋى دە جاراتۋشىنىڭ بەرگەن نىعمەتى. ال، اللانىڭ بەرگەن نىعمەتىنە قۋانىپ، شاتتانۋ كۇنا ەمەستىگى قۇراننىڭ مىنا ءبىر اياتىندا ايتىلعان: «سەن ايت: «اللانىڭ بۇل يگىلىگى مەن مەيىرىمىنە ولار قۋانسىن...». (يۋنۋس سۇرەسى، 58-ايات. ).

 تاعى ءبىر حاديستە: «پارىز امالداردان كەيىنگى ەڭ ابزال امال -  مۇمىنگە قۋانىش سىيلاۋ بولىپ تابىلادى...»، - دەلىنگەن. (حاديس. يبن ءشايبا. ). حاديستە ايتىلعانداي، مۇسىلمانعا قۋانىش سىيلاۋ - ۇلكەن ساۋاپتى ءىس. ەندى، تۋعان كۇنىن جەلەۋ ەتىپ، ادامداردى قۋانتىپ جاتساق، ونىڭ نەسى كۇنا؟

دەمەك، ەكىنشى توپ ءدىن ماماندارىنىڭ بايلامى بويىنشا، شاريعاتقا تەرىس كەلەتىن ارەكەتتەرگە بارماي، ىسىراپ جاساماي ءوزىنىڭ تۋعان- تۋىستارىنىڭ، جاقىن دوس- جاراندارىنىڭ اراسىندا تۋعان كۇنىن اتاپ ءوتىپ جاتسا، ونىسى كۇنا ەمەس. دەگەنمەن، تويلاماعان كىسىنى دە شاريعات جازعىرمايدى.

  islam.kz