ەلوردانىڭ ورتالىق الاڭىندا وقۋشىلارعا قاجەتتى قۇرال- جابدىقتار تومەن باعالارمەن ساتىلۋدا - فوتو

استانا. قازاقپارات - ەلوردا اكىمدىگىنىڭ الدىنداعى الاڭدا قازاقستاندىق وندىرۋشىلەردىڭ مەكتەپ جارمەڭكەسى ءوتىپ جاتىر.

استانا قالاسىنىڭ ءبىلىم باسقارماسى كامەلەت جاسقا تولماعانداردىڭ قۇقىقتارىن قورعاۋ ءبولىمىنىڭ باسشىسى ءلاززات ورىنباساروۆانىڭ ايتۋىنشا، ءبىرىنشى كەزەكتە جارمەڭكە تۇرمىسى تومەن جانە كوپ بالالى وتباسىلارعا كومەكتەسۋگە باعىتتالعان. ونىڭ باستى ماقساتى - ەلوردالىق بالالاردى مەكتەپكە قاجەتتى زاتتارمەن قامتاماسىز ەتۋ.

ەكى كۇنگە سوزىلاتىن جارمەڭكە بارىسىندا استانالىقتار بالالارىنا مەكتەپ فورماسىن، سپورتتىق كوستيۋمدەر مەن اياق كيىمدەر تاڭداپ، كەڭسە تاۋارلارى مەن كىتاپتاردى 10-¬50 پايىز جەڭىلدىكپەن ساتىپ الۋدا.

«ءبىز «كلەرك» كەڭسە بۇيىمدارى دۇكەنىنەن كەلىپ وتىرمىز. استانا نارىعىندا جۇمىس ىستەگەنىمىزگە 11 جىل بولدى. بۇگىنگى جارمەڭكەدە ەلوردالىقتار بارلىق مەكتەپكە قاجەتتى قۇرال- جابدىقتاردى 10 پايىز جەڭىلدىكپەن ساتىپ الا الادى. ماسەلەن، داپتەر 12-15 تەڭگەدەن، قالامساپتار 30 تەڭگەدەن، فلوماستەرلەر 200 تەڭگەدەن، سومكەلەر 3600 تەڭگەدەن ساۋدالانۋدا»، - دەدى اتالعان كومپانيانىڭ مەنەدجەرى تالعات سىزدىقوۆ.

سونىمەن قاتار، شارا بارىسىندا حالىققا كەڭەس بەرەتىن قوعامدىق قابىلداۋ ءبولىمى جۇمىس ىستەيدى. كوپشىلىك نازارىنا وقۋشىلار سارايلارىنىڭ، مۋزىكا جانە ونەر مەكتەپتەرى ۇجىمدارىنىڭ قاتىسۋىمەن كونسەرتتىك باعدارلاما ۇسىنىلادى.

          

 اۆتور: مارلان جيەمباي