دميتري مەدۆەديەۆ كەيكى باتىر مەن كەنەسارى حاننىڭ باس سۇيەگىن استاناعا قايتارىپ بەرۋ جاعىن قاراستىرۋعا ۋادە بەردى

سوچي. قازاقپارات - ر ف پرەمەر- ءمينيسترى دميتري مەدۆەديەۆ قازاقستاننىڭ ءوتىنىشى بويىنشا ۇلت ازاتتىق كوتەرىلىس جەتەكشىلەرىنىڭ ءبىرى كەيكى باتىردىڭ باس سۇيەگىن قايتارۋعا قاتىستى كوتەرىلگەن ماسەلەنى قاراستىراتىنىن ايتىپ، ۋادە بەردى.
None
None

د. مەدۆەديەۆپەن كەزدەسۋدە قازاقستان پرەمەر- ءمينيسترى كارىم ءماسىموۆ «ءداستۇرلى» سۇراقتاردان بولەك ماسەلە كوتەردى، دەپ حابارلادى ينتەرفاكس.

 قازاقستان ۇكىمەتىنىڭ باسشىسى تاريحتاعى 100 جىلدىقتا ەكى ەل اراسىندا كوپتەگەن وقيعا باستان وتكەنىن ايتىپ، سونىڭ ىشىندە 1917 -جىلعا ەرەكشە توقتالدى.

«بىزدە ءبىر ماسەلە بار. مەنىڭ سىزدەن سۇرار ءوتىنىشىم: سول كەزەڭدە ۇلت ازاتتىق كوتەرىلىس جەتەكشىلەرىنىڭ ءبىرى بولعان كەيكى باتىردىڭ ر ع ا ۇلى پەتر اتىنداعى انتروپولوگيا جانە ەتنوگرافيا مۇراجايىنداعى باس سۇيەگى تۋرالى ماسەلەنىڭ انىق- قانىعىن ءبىلىپ بەرۋگە تاپسىرما بەرسەڭىز. ونىڭ سۇيەگىن قازاقستان توپىراعىندا جەرلەۋ ءۇشىن قايتارىپ بەرۋ ماسەلەسىنىڭ شەشەمىن تابۋ مۇمكىندىگىن قاراستىرساق»، - دەدى ك. ءماسىموۆ.

 ول بۇل ماسەلە قازاقتار ءۇشىن وتە ماڭىزدى ەكەنىن ايتتى.

 سونىمەن قاتار، قازاقستاندىق تاراپ تاعى ءبىر ۇلت ازاتتىق كوتەرىلىس جەتەكشىسى كەنەسارى حاننىڭ باس سۇيەگىن وتانىنا قايتارۋ ماسەلەسىن كوتەردى.

 رەسەي پرەمەرى بۇل سۇراقتى رەتتەۋگە اتسالىساتىنىن ايتىپ، ۋادە بەردى.

«كۇماندانباڭىز، مەن اۋىزشا، كەرەك بولسا، حات جۇزىندە بۇل ماسەلە تۋرالى تاپسىرما بەرەمىن، سوسىن سىزبەن تەلەفون ارقىلى حابارلاسىپ، ورتاق شەشىم قابىلدايمىز»، - دەدى د. مەدۆەديەۆ.

 بۇدان بۇرىن كارىم ءماسىموۆ دميتري مەدۆەديەۆپەن اتالمىش جادىگەردى قايتارۋ تۋرالى ماسەلەنى تالقىلايتىنى تۋرالى ءوزىنىڭ تۋيتتەرىندە جازعان ەدى.

قازاقستان ءۇشىن اسا قۇندى جادىگەردى كەڭەس داۋىرىنەن بەرى قايتارۋعا بىرنەشە مارتە ۇمتىلىس جاسالدى. سوڭعى كەزدەرى بۇل تاقىرىپ، اسىرەسە، الەۋمەتتىك جەلىلەردە ءجيى كوتەرىلە باستادى. ماسەلەن، قازاقستاندىق نۇرلان امىرەقۇلوۆ فەيسبۋك الەۋمەتتىك جەلىسىندە وسى تاقىرىپتاعى جازباسىن جاريالادى.

رەسەيلىك ارىپتەسىمەن كەزدەسۋ كەزىندە كارىم ءماسىموۆ استانادا وتەتىن XIII ايماق ارالىق ىنتىماقتاستىق فورۋمىنا قاتىستى ماسەلەلەردى دە تالقىلادى. اتاپ ايتقاندا، باتىس ەۋروپا- باتىس قىتاي ءتارىزدى ءىرى كولىك جوبالارىن جۇزەگە اسىرۋ بارىسى ءسوز بولدى. جايىق ترانس شەكارالىق وزەنىنە قاتىستى تاقىرىپقا باسا نازار اۋدارىلدى. پرەمەر- مينيستر بۇل ماسەلە بويىنشا ۇكىمەتارالىق كەلىسىمگە قول قويۋدى ۇسىندى.

سونىمەن قاتار لوگيستيكا، شەكارا ماڭى ىنتىماقتاستىعى جانە ناقتى ەكونوميكا سالاسىنداعى باسقا دا ماڭىزدى ماسەلەلەر بويىنشا وزەكتى تاقىرىپتار تالقىعا سالىندى.

سوڭعى جاڭالىقتار