نەسىپ جۇنىسبايەۆ حالىقارالىق سپورت جۋرناليستەرى قاۋىمداستىعىنىڭ ارنايى ماراپاتىنا يە بولدى

بۇل تۋرالى ريو وليمپياداسىندا جۇرگەن قازاقپارات ءتىلشىسى حابارلادى.
بۇگىن ريو- دە- جانەيرو قالاسىندا ءوتىپ جاتقان وليمپيادا ويىندارى اياسىندا حالىقارالىق سپورت جۋرناليستەرى قاۋىمداستىعى (AIPS) ون جانە ودان دا كوپ وليمپيادا ويىندارىنا بارىپ، ءتورتجىلدىق دودالاردى ناسيحاتتاۋدا سۇبەلى ەڭبەك سىڭىرگەن ءبىرقاتار ەلدەردىڭ سپورت تىلشىلەرىن ماراپاتتادى. ونىڭ ىشىندە 10 وليمپيادانىڭ كوزىن كورگەن، اتاقتى سەيداحمەت بەردىقۇلوۆتىڭ ءتول شاكىرتى نەسىپ جۇنىسبايەۆ تا بولدى.
الەم سپورت جۋرناليستەرىنىڭ بۇل سالتاناتىنا اتتارى اڭىزعا اينالعان سپورتشىلار شاقىرىلىپتى. لاۋرەات جۋرناليستەردى سولار ماراپاتتادى. ولار - وليمپيادا ويىندارىنىڭ 400 مەترگە جۇگىرۋدەن 5 دۇركىن چەمپيونى، الەمنىڭ بىرنەشە دۇركىن رەكوردشىسى، امەريكالىق اڭىز جەلاياق مايكلد جونسون، برازيليا فۋتبولىنىڭ اڭىز ويىنشىسى، كوماندا كاپيتانى، الەم چەمپيونى كافۋ، وڭتۇستىك افريكالىق گولف شەبەرى گارري پلايەر، ۇلى بريتانيالىق داڭقتى ۆەلوترەكشى ۆيكتوريا پەندلەتون، سونىمەن قاتار، قىسقى وليمپيادالاردا موناكونىڭ تۋىن ءۇش رەت ۇستاپ شىققان موناكونىڭ پرينتسى البەرت II جانە وزگەلەر بار. جيىنعا مۇنداي اتاقتى ادامداردىڭ شاقىرىلۋى سالتاناتتى كەشتىڭ ماڭىزىن ەرەكشە كوتەردى.
ماراپاتتاۋ راسىمىنەن كەيىن نەسىپ جۇنىسبايەۆ قازاق تىلشىلەرىنە بۇل سىيلىقتىڭ ماڭىزى تۋرالى ايتىپ بەردى.
«بۇل سپورت جۋرناليستەرىنە دەگەن ۇلكەن قۇرمەت! حالىقارالىق سپورت جۋرناليستەرى قاۋىمداستىعى (AIPS) وسىمەن ەكىنشى رەت تىلشىلەردى وسىنداي ءىرى ماراپاتپەن قۋانتىپ جاتىر. ءبىرىنشىسى لوندون وليمپياداسىندا وتكەن. ەكىنشى رەت مىنە، وزدەرىڭىز كورىپ وتىرعانداي ريو- دە- جانەيرو قالاسىندا، تاعى دا وليمپيادا اياسىندا ۇيىمداستىرىلىپ جاتىر. بۇل وليمپيادادا جەڭىمپاز سپورتشىلاردى قالاي قۇرمەتتەسە، سپورت تىلشىلەرىن دە سولاي قۇرمەتتەۋمەن تەڭ»، - دەپ اتاپ ءوتتى نەسىپ جۇنىسبايەۆ.
سونداي- اق، قازاق تاريحىندا سپورت جۋرناليستەرىنەن مۇنداي قۇرمەتكە وسىعان دەيىن ەشكىم بولماعانىن دا اتاپ ءوتتى.
«بۇگىنگى ماعان كورسەتىلگەن قۇرمەت وسىعان دەيىن قازاق تاريحىندا بولعان جوق. مىنە، ءبىرىنشى رەت ماراپاتتالىپ جاتىرمىز. بۇل مەنىڭ عانا ەمەس، قازاق ەلىنىڭ، قازاق سپورت جۋرناليستيكاسىنىڭ جەتىستىگى. از- كوپ بولسىن، 10 وليمپيادانىڭ كوزىن كوردىم. بارعان سايىن ەرتەڭگى ۇرپاق ءۇشىن وليمپياداداعى جارقىن جەتىستىكتەرىمىز تۋرالى كىتاپتار جازدىم. بۇل دا بولسا ەڭبەگىمنىڭ وتەۋى»، - دەدى جۇنىسبايەۆ.
نەسىپ ءجۇنىسباي ۇلى 1950 -جىلى 10 - جەلتوقساندا تالدىقورعان وبلىسى قاراتال اۋدانى، كوپ بىرلىك اۋىلىندا دۇنيەگە كەلگەن.
ول 1968 - جىلى كەڭەس وداعى ارمياسىنىڭ قاتارىنا الىنىپ، ك س ر و قارۋلى كۇشتەرىندە قىزمەت ەتەدى. نەگىزگى قىزمەتىن رەسپۋبليكالىق «لەنينشىل جاس» گازەتىندە باستاپ، وسى گازەتتىڭ سپورت جانە اسكەري- پاتريوتتىق تاربيە ءبولىمىن باسقاردى، گازەتتىڭ رەداكسيا القاسىنىڭ مۇشەسى، كاسىپوداق، كومسومول، پارتيا ۇيىمدارىنىڭ حاتشىسى بولدى.
1991 -جىلى قاڭتار ايىندا رەسپۋبليكالىق «سپورت» گازەتىنە باس رەداكتور بولىپ تاعايىندالادى. رەسپۋبليكالىق «سپورت» گازەتىن 2014 - جىلعا دەيىن، ياعني زەينەتكە شىققانشا باسقاردى.
سونداي- اق، ق ر سپورت كوميتەتىنىڭ القا مۇشەسى بولىپ سايلاندى. قازاقستان جۋرناليستەر وداعىنىڭ مۇشەسى، قازاقستان جازۋشىلار وداعىنىڭ مۇشەسى، باسقارما مۇشەسى. حالىقارالىق سپورت جۋرناليستەرى قاۋىمداستىعىنىڭ (AIPS) مۇشەسى. سونىمەن بىرگە ازيا سپورت جۋرناليستەرى وداعىنىڭ (ASPU) اتقارۋ كوميتەتىنىڭ مۇشەسى (1994-2006 ج ج. ). ازيا وليمپيادالىق كەڭەسىنىڭ (و س ا) باسپا ءسوز كوميتەتىنىڭ مۇشەسى بولعان تۇڭعىش ءارى جالعىز جۋرناليست.
ازيا سپورت باسپا ءسوزى وداعى پرەزيدەنتىنىڭ كەڭەسشىسى. قازاقستان سپورت باسپا ءسوزى قاۋىمداستىعىن قۇرۋشى جانە تۇڭعىش پرەزيدەنتى (1992 - 2013 ج ج. ). رەسپۋبليكامىزدا تازا قازاق بالالارىنان عانا تۇراتىن «نامىس» كاسىپقوي فۋتبول كلۋبىن قۇرۋشى جانە پرەزيدەنتى (1991 - 1996 ج ج.).
قازاقستان توعىزقۇمالاق فەدەراتسياسىنىڭ تۇڭعىش پرەزيدەنتى (1991 ج.)
اۆتور: كۇنسۇلتان وتارباي