تۇركيا ي م- مەن كۇرەستە كۇتپەگەن جەردەن رەسەيمەن بىرىكتى
بۇل رەسەيگە سەنىم ءبىلدىرۋ مە الدە شاراسىزدىق پا - كوپشىلىك تۇسىنبەي قالعانداي.
«سودىرلارمەن سوعىساتىنداردىڭ ءبارىن قولدايمىز، نەگە رەسەيمەن بىرىكپەسكە؟ » دەپ مالىمدەدى چاۆۋشوگلۋ.
تۇرىك باسپا ءسوزى دە «تۇركيا رەسەيگە ينجيرليك اۋە بازاسىن پايدالانۋعا بەرەدى» دەگەن اقپاراتتى جاپپاي تاراتىپ جاتىر. تۇرىك بيلىگى شىنىمەن قاتتى كەتكەن سياقتى. مۇنى ماسكەۋ قۋانا قۇپتاسا، تۇرىك بيلىگىنىڭ انكاراداعى (بالكىم باتىستاعى) قارسىلاستارى توپ قۇرا باستادى.
چاۆۋشوگلۋ تىم اسىعىس مالىمدەمە جاساپ جىبەرگەن جوق پا؟ ونىڭ ايتقاندارى كوپ ۇزاماي ينتەرنەتتەگى اقپاراتتاردان الىنىپ تاستالدى.
چاۆۋشوگلۋ جالما- جان «تۇركيا رەسەيگە اسكەري بازاسىن بەرەدى» دەگەن ءسوزدى جوققا شىعارۋعا كوشتى. «ينجيرليك تۋرالى ايتقانىم جوق. تەك پرەزيدەنتتىڭ ءسوزىن قايتالاپ، تەررورعا قارسى سوعىستا رەسەيمەن ىنتىماقتاسۋعا ءازىرمىز دەگەن مالىمدەمە جاسادىم» دەدى ول.
تۇركيا پرەزيدەنتى رەجەپ تايىپ ەردوعان جۇرتتى تاڭعالدىرىپ، يزرايلمەن جانە رەسەيمەن مامىلەگە كەلگەن 10 كۇن ىشىندە قارسىلاستارى ونى وڭىنان دا، سولىنان دا توپەلەپ سىناپ جاتىر.
«تابان استىندا كىلت بۇرىلاتىنداي نە وزگەردى؟ »
«كەشەگى جيھادشى «باۋىرلار» بۇگىن تەررورشىعا اينالدى»
«يزرايلمەن مامىلەلەسۋ ءۇشىن گازانى ساتىپ جىبەردىڭ»
بۇل نارازىلىق ەردوعانعا اسەر ەتپەيتىن سىڭايلى. ول جاقتاستارىن «ءبىز ەشقاشان جولىمىزدان تايمايمىز. ءبىز تەك رەسەيمەن جانە يزرايلمەن اراداعى قولدان جاسالعان قايشىلىقتاردىڭ كەسىرىنەن بۇلىنگەن قارىم- قاتىناستى جونگە سالدىق» دەپ سەندىردى.
تۇرىك باسپا ءسوزىنىڭ جازۋىنا قاراعاندا، انكارا وتپەلى كەزەڭدە سيريا پرەزيدەنتى باشار اسادپەن دە جاقىنداسۋى مۇمكىن.
دەگەنمەن مەنىمەن تىلدەسكەن ەشقانداي استىرتىن توپقا دا، يدەولوگياعا دا جاتپايتىن ءاربىر تۇرىك ازاماتى «تۇركيانىڭ ءىشى- تىسىنداعى الاۋىزدىق اتاۋلىنى ءبىر ساتكە نەگە ۇمىتپاسقا؟ » دەيدى.
كۇردىستان جۇمىسشىلار پارتياسى تەررورشىلارىمەن اراداعى 32 جىلدان استام ۋاقىت بويى ءجۇرىپ كەلە جاتقان قاندى سوعىس تۇركياعا تىم قىمباتقا ءتۇستى جانە ءادىلىن ايتساق، [تۇركيا ارەكەتتەرى] سول زۇلىمدىقتىڭ ءتۇپ نەگىزىن جويا دا العان جوق. ال ي م بولسا، وپ- وڭاي كۇيرەگەن نەمەسە قاپەلىمدە قۇلاعان تاياۋ شىعىستاعى ديكتاتورلىق رەجيمدەردىڭ ورنىنا كەلگەن فۋندامەنتاليستەر مەن ەكسترەميستىك توپتاردىڭ كەسىرىنەن جىلدام تاراعان جاڭا ىندەت.
2010 -جىلداردىڭ باسىندا «اراب كوكتەمىنەن» شابىتتانعان يسلامشىل ەردوعان بۇل رەجيمدەردى بىرتىندەپ وزىنە جاقىن ادامدار الماستىرادى دەگەن ۇمىتپەن ىرگەلەس سيريا مەن يراكتاعى، ءتىپتى ەگيپەتتەگى الگىندەي توپتارعا قولداۋ كورسەتە باستاعان. ەردوعاننىڭ بۇل ويى جۇزەگە اسا قويمادى، ال ونىڭ كوپشىلىگى ءىس- ارەكەتى جاعىنان دا، وي- ساناسى جاعىنان دا زورلىق- زومبىلىققا بەيىم تۇراتىن يسلامشىل «اعايىندارى» تۇركيانىڭ وزىنە ءتىس باتىرا باستادى.
اكشەحيردەن انكاراعا قونىس اۋدارعان، ءومىر بويى كونسەرۆاتورلارعا داۋىس بەرىپ كەلە جاتقان احمەت ۇستا «جەڭىلۋدى توقتاتقان تۇستان باستاپ جەڭە باستايسىڭ» دەگەن تۇرىك ماتەلىن ەسىمە سالدى. ال زايىرلىلىقتى قولدايتىن، ەردوعاندى جاقتىرمايتىن زەينەتتەگى زاڭگەر نۇرگۇل حانىم سوڭعى ءبىر جىل توڭىرەگىندە تۇركيانىڭ ءار تۇكپىرىنەن ەستىپ جۇرگەن پىكىردى قايتالادى. «تۋعان ەلىمىزدەن ايىرىلىپ قالامىز با، جەرىمىز بولشەكتەنىپ كەتە مە دەپ قورقۋشى ەدىك، ەندى جاقىندارىمىزعا، تۇركيانىڭ ازاماتتارىنىڭ ومىرىنە الاڭداي باستادىق» دەيدى ول.
ارپەر ەسىمدى جاسى 30-دار شاماسىنداعى جوعارى تەحنولوگيا مامانى «ەردوعان مەن ونىڭ ا ك ر («ادىلەت جانە دامۋ» ) پارتياسى كوپ قاتەلىكتەرى ءۇشىن جاۋاپ بەرەدى. قازىر تۇركيا ءۇشىن وتە اۋىر كەزەڭ باستالدى. كىلت بۇرىلىستار دا كەرەك، ءارى مۇنى بۇل قويىرتپاقتى جاساعانداردىڭ وزدەرى جاقسى ورىنداي الادى، دەگەنمەن، اشىعىن ايتساق، سوڭعى 10 جىلدا ەكونوميكا مەن الەۋمەتتىك سالادا وتە ۇلكەن جەتىستىككە جەتكىزگەن دە سولار» دەدى.
ابباس دجاۆاديدىڭ بلوگى اعىلشىن تىلىنەن اۋدارىلدى.
«ازاتتىق» اقپاراتى
