سافار شاكەيەۆتىڭ قىسقا دا جارقىن عۇمىرى - كەسكىن
16 -شىلدەدە حابار- وشارسىز كەتكەن سافار شاكەيەۆتىڭ ءولى دەنەسى قالا ىشىندە، ەسەنتاي وزەنىنەن تابىلدى.
«قازاقپارات» ح ا ا مارقۇمنىڭ وتباسىنا قايعىرىپ كوڭىل ايتا وتىرىپ، مىنا ماتەريالدى سافار شاكەيەۆتىڭ جارقىن بەينەسىن ەسكە الۋعا ارنايدى.
سافار شاكەيەۆ 1991 -جىلى 2 -قىركۇيەكتە كوكشەتاۋ قالاسىندا تۋعان. 16 جاسىندا جوعارى ءبىلىم الۋ ءۇشىن ا ق ش- قا اتتانادى.
چەپمەن (Chapman University) جەكە ۋنيۆەرسيتەتىنىڭ (كاليفورنيا شتاتىنىڭ وريندج قالاسى) كينەماتوگرافيا جانە مەدياونەر (Dodge College of Film and Media Arts) بولىمىندە وقىدى.
ءوزىنىڭ ءبىلىمى مەن دارىنىن قاشاندا ىزگىلىكتى ىستەرگە جۇمساۋعا ۇمتىلدى. ونىڭ قىسقامەتراجدى فيلمدەرى مەن كليپتەرى شىنايى سەزىمگە جانە مەيىرىمگە تولى.
قازاقستانعا ورالعان سوڭ، سافار شاكەيەۆ ءىرى دۇكەندەردىڭ بىرىنە قىزمەتكە ورنالاسىپ، كرەاتيۆ ءبولىمىن باسقاردى.
ءبىرقاتار جارنامالىق جانە الەۋمەتتىك بەينەروليكتەر ءتۇسىردى. ولاردىڭ ءبىرى - سۇيىكتى وتانىمىزعا ارنالعان.
ءبىر جولى، بىرگە ىستەيتىن ارىپتەستەرىنىڭ ءبىرىنىڭ ۇلى سول جاق بۇيرەگىنىڭ نەفروبلاستوما (ەمبريوندىق قاتەرلى ىسىك) ، ۆيلمس ىسىگى دەرتىنە شالدىققانى انىقتالعان كەزدە سافار كلينيكا مەن ءتيىستى مامانداردى تابۋعا كومەكتەسىپ قانا قويماي، كىشكەنتاي الان جايىندا اسەرلى روليك تۇسىرەدى.
«ءيا، روليكتى سافار مەن رۇستەم تۇسىرگەن. سافار ءوزى جەتەكشىلىك جاساپ، روليكتى ءوزى مونتاجدادى. رۇستەم كومەكتەستى. سافار ەرەكشە ءبىر مەيىرىمدى جان بولاتىن»، - دەپ جازادى كىشكەنتاي الاننىڭ اناسى دينارا سەديروۆا.
سافار بوكستى جاقسى كورگەن. گەننادي گولوۆكيننىڭ جەكپە-جەكتەرىن ۇزبەي تاماشالايتىن بولعان. سافار تاعى ءبىر بوكسشىنى ەرەكشە قۇرمەت تۇتتى. ول - اتاقتى موحاممەد ءالي.
سافار اكەسىن قاتتى سىيلايتىن. ونى ماقتان تۇتاتىن. شىعارمالارىنا ءتانتى بولىپ جۇرەتىن.
ءوزىنىڭ الەۋمەتتىك جەلىلەردەگى جەكە پاراقشالارىنا اكەسىنىڭ شىعارمالارىن جاريالاپ، ونىڭ كونتسەرتىنە ءوزىنىڭ دوستارى مەن تانىستارىن تۇراقتى تۇردە شاقىرىپ وتىرعان.
ارينە ءوزى دە مۋزىكانى ەرەكشە ۇناتتى. سايكەسىنشە، ءان سالاتىن بولعان. ءبىراق، ونى مۇمكىندىگىنشە جاريا ەتپەۋگە تىرىسقان. ول بۇل تۋرالى عالامتور بەتىنە تەك ءبىر رەت قانا ءوزىنىڭ بەينەروليگىن جاريالاپتى.
ونىڭ استىنا: «ال ەندى مەن باستايىن دەپ وتىرعان مىنا ءان ءبىرجولا ينتەرنەتتە قالاتىن بولدى. مەن ءوزىمنىڭ ىشكى قورقىنىشتارىمنىڭ ءبىرىن - كوپشىلىك الدىندا ءان سالۋعا دەگەن قورقىنىشىمدى جەڭگىم كەلەدى. ويتكەنى، مەن ەشقاشاندا ءاندى ناشىنە كەلتىرىپ ورىنداي العان ەمەسپىن. ونى مويىندايمىن»، - دەپ قولتاڭبا جازعان.
بۇگىن الماتى جۇرتشىلىعى سافار شاكەيەۆتى سوڭعى اقتىق ساپارعا شىعارىپ سالدى. قارالى جيىن «قازاق كونسەرت» زالىندا ءوتتى.
سافار شاكەيەۆ كەڭساي-2 زيراتىنا، باتىرحان شۇكەنوۆتىڭ قاسىنا جەرلەندى.
(ماتەريال الەۋمەتتىك جەلىلەردەگى ماتەريالدار بويىنشا دايىندالدى)
اۆتور: ايبوتا جاپپاربەرگەن
