قازاقستاننىڭ بىتىمگەرشىلەرى ۇلى بريتانياداعى وقۋ-جاتتىعۋدا جوعارى دەڭگەي كورسەتتى - فوتو
ۇلى بريتانيادا قىزۋ ءجۇرىپ جاتقان «دالا قىرانى-2016» حالىقارالىق بىتىمگەرشىلىك وقۋ- جاتتىعۋىنىڭ قاتىسۋشىلارى سپورتتىق پاندەر كەشەنىندە، ياعني، ارقان تارتۋ، گانتەلدەرمەن ەستافەتا، اۋىر اۆتوتەحنيكانى سۇيرەتۋ، فۋتبول جانە ۆولەيبولدان وزدەرىنىڭ دەنە دايارلىقتارىن پاش ەتتى. ۇدايى فيزيكالىق جۇكتەمەلەر جانە سپورتپەن شۇعىلدانۋعا ابدەن داعدىلانىپ قالعان اسكەري قىزمەتشىلەر ءۇشىن مۇنداي حالىقارالىق جارىستار ناعىز سپورتتىق مەرەكەگە اينالدى.
قاتىسۋشىلار تەڭ ناتيجە كورسەتە وتىرىپ، بارىنشا كۇش سالدى. قازاقستاندىق «قازبريگ» بىتىمگەرشىلىك بريگاداسىنىڭ اسكەري قىزمەتشىلەرى دەنە دايارلىعىنىڭ جوعارى دەڭگەيىن كورسەتتى. قاتىسۋشىلاردىڭ ايتۋى بويىنشا، سپورتتىق جارىستار وقۋ-جاتتىعۋ باعدارلاماسىنىڭ اجىراماس بولىگىنە اينالعان جانە ۇلتارالىق كوماندالاردى كەرەمەت بىرىكتىرەدى.
«دالا قىرانى-2016» وقۋ-جاتتىعۋى ۇلى بريتانيادا 13 -شىلدەدە باستالعانىن ايتا كەتكەن ءجون. بۇل حالىقارالىق وقۋ-جاتتىعۋدىڭ ەكىنشى كەزەڭى، ءبىرىنشى كەزەڭى قازاقستاندا وسى كوكتەمدە وتكەن بولاتىن. قاتىسۋشىلاردىڭ الدىندا تۇرعان نەگىزگى تاپسىرمالار - بەيبىتشىلىكتى قولداۋ جونىندە وپەراتسيالاردىڭ بارلىق اسپەكتىلەرىن پىسىقتاۋ بولىپ تابىلادى. بەس ەلدىڭ بىتىمگەرشىلەرى بىرلەسكەن جاتتىقتىرۋلار وتكىزەدى، تاجىريبەلەرىمەن بولىسەدى جانە بىرلەسكەن ارنايى وپەراتسيانى وتكىزىپ تە قويدى. شامامەن 650 اسكەري قىزمەتشى ءۇشىن وقۋ-جاتتىعۋدىڭ وتكەن اپتاسى احۋالدى وقىپ-ۇيرەتەتىن جاتتىعۋلاردى جۇمىس جاساۋمەن ەرەكشەلەندى. سەناري بەيبىتشىلىك پەن قاۋىپسىزدىكتى قولداۋ جونىندە شىنايى بىتىمگەرشىلىك وپەراتسيالاردىڭ تاجىريبەسى نەگىزىندە جاسالعان.
