جىبەك جولى رالليىنە قاتىسۋشىلار قازاقستاننىڭ تابيعاتىنىڭ اسەمدىگىنە ءتانتى بولدى

الماتى. قازاقپارات- «جىبەك جولى» رالليىنە قاتىسۋشىلار قازاقستاننىڭ قىزدارى مەن تابيعاتىنىڭ اسەمدىگىنە ءتانتى بولىستى.

بۇل تۋرالى بۇگىن الماتىدا وتكەن باسپا ءسوز ءماسليحاتى بارىسىندا اتاقتى جارىسكەرلەر ستەفان پەترانسەل، سەباستيان لەب جانە سيريل دەپرە، سونداي-اق Peugeot Total كومانداسىنىڭ ديرەكتورى برۋنو فورمين مالىمدەدى.

«جىبەك جولى» رالليى - وتە تانىمال جارىس. وتە كۇردەلى جانە وتە قىزىقتى تراسسا. ءبىز جارىس جولىنىڭ ۇشتەن ەكىسىن ءجۇرىپ وتتىك. ءبىراق، وكىنىشكە قاراي، وسىدان ەكى كۇن بۇرىن قاتەلىككە بوي الدىرىپ، اۋىر اپاتقا ۇشىرادىق. اۆتوكولىگىمىزدى جوندەيمىز دەپ كوشباسشىلىق ورىننان ايىرىلىپ قالدىق. سوعان قاراماستان، قالعان ەكى ماشينامىزدىڭ ارقاسىندا كوش باسىنا شىققىمىز كەلەدى. بەيجىڭگە ءبىرىنشى بولىپ جەتەمىز دەگەن ۇمىتتەمىز»، - دەدى ستەفان پەترانسەل.

ءوز كەزەگىندە جارىستىڭ كوشباسشىسى سيريل دەپرە الماتىدا قانىپ ۇيىقتاعانىن ايتتى.

«ۇزاق ۋاقىتتىڭ ىشىندە ءبىرىنشى رەت كەرەۋەتتە ۇيىقتادىم. ۇيقىم قاندى. كەشە اسىقپاي وتىرىپ، كەشكى اس ىشتىك. الدىمىزدا ءالى اۋىر تراسسا كۇتىپ تۇر. كوماندالاردىڭ بارلىعى ءبىرىنشى ورىندى جەڭىپ العىسى كەلەدى. ءبىز ءۇشىن جاعداي وڭاي ەمەس. وسى جەتكەن ورنىمىزدى ساقتاپ، كوماندانى جەڭىسكە جەتەلەي ءبىلۋ قاجەت»، - دەدى س. دەپرە.

كوماندانىڭ تاعى ءبىر مۇشەسى سەباستيان لەب «جىبەك جولىنىڭ» «داكار» جولىنا قاراعاندا ەداۋىر ۇزاق ەكەندىگىن ايتتى.

«جول- جونەكەي قازاقستاننىڭ اسەم جەرلەرىن قاراپ، ءتانتى بولىپ جاتىرمىز»، - دەيدى سەباستيان لەب.

ايتا كەتەلىك، قۇرلىقارالىق «جىبەك جولى» مارافونى وتكەن 8 -شىلدە كۇنى ماسكەۋدىڭ قىزىل الاڭىندا باستالعان ەدى. ال، 11 -شىلدەدە جارىسقا قاتىسۋشىلار قوستاناي قالاسىنا كەلدى، كەلەسى كۇنى استانادا بولدى.

ەكى اپتا ىشىندە ولار 10 مىڭ شاقىرىمنان استام اۋماقتى باسىپ وتۋگە ءتيىس. ال ونىڭ باسىم بولىگى شاپشاڭ جۇرۋگە ارنالعان جەرلەر.

بيىل «جىبەك جولى» رالليىندە Peugeot Total كومانداسىنىڭ ءۇش ەكيپاجى جارىسۋدا. ولار: «داكار» ءرالليىنىڭ بىرنەشە دۇركىن چەمپيونى ستەفان پەترانسەل مەن شتۋرمان جان- پول- كوتترە، راللي-رەيد بويىنشا ەكى دۇركىن الەم چەمپيونى، موتوسيكل بويىنشا «داكار» رالليىنىڭ بەس مارتە چەمپيونى سيريل دەپرە مەن شتۋرمان داۆيد كاسترە جانە كلاسسيكالىق راللي بويىنشا الەمنىڭ بەس دۇركىن چەمپيونى سەباستيان لەب پەن شتۋرمان دانيەل ەلەنا.

اۆتور: ايبوتا جاپپاربەرگەن