اتى شۋلى «كەلىن» فيلمىنە تۇسكەن قىز: بارىنە كىنالى - ونەرگە عاشىقتىعىم

 استانا. قازاقپارات - اكتريسا گۇلشارات جۇبايەۆانى كوپشىلىك «كەلىن» فيلمى ارقىلى بىلەدى. «كەلىندە» كەلىن ءرولىن سومداعاننان كەيىن ازداپ كورەرمەنگە جاقپاي قالعانى بار.

گۇلشارات ودان كەيىن دە تاربيە مەن تاعىلىمعا تولى «قاراشاڭىراق» ، «اكە سەرتى» ، ء«سىز كىمسىز، كا مىرزا؟ » سەكىلدى كينوتۋىندىلارعا تۇسكەن. ول «كەلىن» فيلمىن وزىنە بەرىلگەن مۇمكىندىك دەپ باعالادى. بۇگىندە اتا- ەنەسىمەن بىرگە تۇرىپ جاتقان گۇلشارات بولاشاق كەلىندەرگە اقىل ايتتى. بۇل تۋرالى Zamana.kz حابارلايدى.

وزبەكستاننىڭ نۇكىس قالاسىندا 1985 -جىلى دۇنيەگە كەلگەن. وتباسىنداعى جەتى اعايىندىنىڭ تورتەۋى قايتىس بولعان. اكەسى تاريح ءپانىنىڭ مۇعالىمى، ال اناسى - اگرونوم. وتباسىمەن 2001 -جىلى اتىراۋ قالاسىنا كوشىپ كەلگەن. الدىمەن مۋزىكالىق ۋچيليشەدە ءبي ونەرى بويىنشا ءبىلىم الىپ، كەيىن زاڭگەر ماماندىعى بويىنشا وقىعان. جۇرەگى ونەردى قالاسا دا، اتا- اناسى تۇبەگەيلى قارسى بولعان. زاڭگەر ماماندىعى بويىنشا جۇمىسقا تۇرعىزىپ تا كورگەن. كوپ ۇزاماي شىعىپ كەتكەن. اتىراۋدا تەاتردا جۇمىس ىستەپ جۇرگەنىندە تالعات تەمەنوۆتەن عابيت مۇسىرەپوۆ اتىنداعى جاستار تەاترىنا شاقىرتقان.

- ءسىزدىڭ كينو الەمىندەگى تۇساۋىڭىزدى «كەلىن»  فيلمى كەستى مە؟

- سولاي. نەگىزى «كەلىندى» كورگەن ءاربىر كورەرمەندە ماعان دەگەن ءبىرتۇرلى كوزقاراس قالىپتاسقان. ويتكەنى قازاقتا بۇرىن- سوڭدى مۇنداي فيلم بولماعان عوي. بارىنە كىنالى - ونەرگە عاشىقتىعىم. كىشكەنتايىمنان بي بيلەدىم، سپورتقا قاتىسىپ، تاەكۆاندودان قارا بەلبەۋ يەسى (ءبىرىنشى دان) اتاندىم، سۋرەتشى دە بولا جازدادىم. ءبىراق كينوعا ءتۇسۋ مەنىڭ باستى ارمانىم ەدى. مەندەگى ءبىر «شانس» «كەلىن» فيلمى بولدى. العاشىندا- اق رەجيسسەر ماعان: «كەيىپكەرىڭنىڭ جالاڭاشتاناتىن جەرلەرى بار» ، - دەدى. ادامعا اناسىنان ارتىق جان جوق قوي، اناممەن اقىلداستىم. « قىزىم، ءوزىڭ ءبىل. اكەڭنىڭ رۇقساتىن ال» ، - دەدى ول كىسى. ال اكەم: « قىزىم، ەگەر جۇرەگىڭ شىن ونەر دەپ سوعىپ تۇرسا، بەتىڭنەن قاقپايىن. ءىشىڭ جالاڭاشتانباسا بولعانى دا» ، - دەدى.

- قازىر ءبىر ءۇيدىڭ ءتۇتىنىن تۇتەتىپ وتىرعان كەلىن، اياۋلى انا، ادال جار ەكەنىڭىزدى بىلەمىز. ودان بولەك، الەۋمەتتىك جەلىلەر ارقىلى ءارتۇرلى قولونەر بۇيىمدارىن، قازاقى ناقىشتاعى تۇرمىستىق زاتتاردى تىگەتىن ونەرىڭىز بار ەكەن...

- ءيا، مەنىڭ انام - تىگىنشى. ءوزىنىڭ 40 تىگىنشىسى بار كاسىپورنى بولاتىن، ءالى دە تىگىستەن قول ۇزگەن جوق. ءىس تىگۋ ونەرىن كىشكەنتاي كۇنىمنەن انامنىڭ قاسىندا ءجۇرىپ ۇيرەندىم. قازىر مەنىڭ ەكىنشى جۇمىسىم - تىگىنشىلىك. «شابىت» دەپ اتالاتىن شاعىن مەكەمەمىز بار، ونىڭ قۇرامىنا تىگىن سەحى، ەلۋ ادامنان قۇرالعان بي ءانسامبلى كىرەدى. ياعني بيشىلەرىمىزدىڭ ساحنالىق كيىمدەرىن، باسقا دا سىرتتان كەلەتىن تاپسىرىستاردى تىگۋمەن اينالىسامىز. بىلتىرعى جىلدىڭ جەتىستىگى دەسەم دە بولادى، ءوزىمىز قۇرىلىس جۇمىستارىن جۇرگىزىپ، بي مەكتەبىن، ۇلكەن تىگىن سەحىن اشتىق. قازىر سول بي مەكتەبىمىزگە كىشكەنتاي بالالار قابىلداپ، ولاردى تاربيەلەپ جاتىرمىز.

- وسى رەتتە ءارتىس بولامىن دەيتىن ءىنى- سىڭلىلەرىڭىزگە قانداي كەڭەس بەرەر ەدىڭىز؟ جالپى، بالام ءارتىس بولسا دەپ جۇرگەن اتا- انالار الدىمەن قايدا بارۋى كەرەك؟

- راسىندا دا وسى سۇراققا جاۋاپ تابا الماي جۇرگەن جاندار كوپ. مەن ونداي كىسىلەرگە مىنانى ايتامىن: بالانى ەشۋاقىتتا شەكتەمەڭىز. سپورتپەن اينالىسقىسى كەلدى مە، بەتىنەن قاقپاڭىز، ۇيىرمەگە قاتىستىرىڭىز. بيلەگىسى كەلدى مە، بيشىلەردەن ءدارىس السىن. ءان دە ايتسىن. ياعني بالاعا «سەن مىنا سالانىڭ عانا مامانى بولاسىڭ!» دەپ تالاپ قويماڭىز. ۋاقىت وتە كەلە بالا قانداي سالانى قالايتىنىن ءوزى شەشەدى. ماسەلەن، مەنى اتا- انام ەشتەڭەدەن شەكتەگەن جوق. جاڭا ايتىپ وتكەنىمدەي، سپورتپەن دە اينالىستىم، ات سپورتىنان دا حابارىم بار، بيدەن ءدارىس الدىم، زاڭگەرلىكتى ءبىتىردىم، كينو سالاسىندا ەڭبەك ەتىپ جاتىرمىن، تىگىنشىلىگىم تاعى بار. ياعني بالانىڭ بويىندا ءبىر ەمەس، بىرنەشە ونەر بولعانى دۇرىس.

- وسىنىڭ بارىنە قالاي ۇلگەرەسىز؟ جاسىراتىنى جوق، جۇمىسى مەن ءۇي شارۋاسىن قاتار الىپ جۇرە المايتىن ايەلدەر بار ارامىزدا. سولارعا ءوز قۇپياڭىزبەن بولىسەسىز بە؟

- مەن اتا- ەنەممەن بىرگە تۇرامىن. سوندىقتان وتباسىمنىڭ بەرەكە- بىرلىگى، شاڭىراقتىڭ تازالىعى، جايلىلىعى - مەنىڭ موينىمدا. كەشكە دەيىن جۇمىستارمەن جۇرسەم دە، ۇيگە كەلگەن سوڭ بار شارۋانى ءوزىم ىستەيمىن. كۇيەۋىمنىڭ، بالالارىمنىڭ ەرتەڭگى كۇنگە كيەتىن كيىمدەرىن دايىنداپ، ءۇيدىڭ ءىشىن جيناپ، تاڭەرتەڭگى داستارحانعا قوياتىن تاتتىلەردى ءپىسىرىپ بارىپ ۇيىقتايمىن. جالپى، مەنىڭ تۇسىنىگىمدە، ايەل دەگەن وسىنداي بولۋى كەرەك. جۇمىس ىستەيمىن دەپ شەشتىڭىز بە، وندا بارىنە ۇلگەرۋگە مىندەتتىسىز.

جاپ- جاس بولىپ اقىل ايتتى دەمەسسىزدەر، تاعى بىرەر كەڭەس بەرسەم دەيمىن. وتباسى باقىتى - ايەلدىڭ قولىندا. باردى ۇقساتىپ جاراتسا، جوققا سابىرلىقپەن قاراسا ءبارى جاقسى بولادى. قانداي جاعداي بولماسىن، اشۋلانباڭىز. بارىنە تۇسىنىستىكپەن قاراڭىز. «اناۋ جوق، مىناۋ جوق» دەپ كۇيەۋىڭىزدىڭ ميىن اشىتا بەرمەڭىز. سىزگە دەگەن سەزىمى سۋىپ كەتۋى مۇمكىن.

- سوڭعى سۇراق بولسىن، ءتۇر- سىمباتىڭىزعا قانداي دا ءبىر ەرەكشە كۇتىم جاسايسىز با؟

- ديەتا ۇستامايمىن. ارتىق سالماق قوسپاۋىمنىڭ سىرى - كۇندەلىكتى بيمەن اينالىسىپ وتىرامىن. ايتپاقشى، ايەلدەرگە دە وسىنداي كەڭەس بەرەمىن. كۇن سايىن بيلەڭىزدەر، ارىقتاۋدىڭ ەڭ قاراپايىم ءتاسىلى - وسى. ءسان سالوندارىنا دا ءجيى بارامىن دەپ ايتا المايمىن. بەتىمە، شاشىما ۇيدە، قولدا بار زاتتاردى پايدالانا وتىرىپ كۇتىم جاسايمىن.

 

سۇحباتتاسقان: ا. قاسىم