ە. ىدىرىسوۆ: «كاسپي بەستىگى» حالىقارالىق كەلىسىمدەردى دايىنداۋ قارقىنىن ۇدەتۋگە نيەتتى

 استانا. قازاقپارات - «كاسپيي بەستىگى» حالىقارالىق كەلىسىمدەردى دايىنداۋ قارقىنىن ۇدەتۋگە نيەتتى. بۇگىن استانادا كاسپيي ماڭى مەملەكەتتەرىنىڭ سىرتقى ىستەر مينيسترلەرىنىڭ كەڭەسى بارىسىندا قازاقستان رەسپۋبليكاسىنىڭ سىرتقى ىستەر ءمينيسترى ەرلان ىدىرىسوۆ وسىلاي مالىمدەدى.

 سىرتقى ساياسات ۆەدومستۆوسى باسشىسىنىڭ ايتۋىنشا، بۇنداي فورماتتاعى كەزدەسۋ ەلىمىزدە العاش رەت ءوتىپ وتىر. سونىمەن قاتار، بۇل جيىن قازاقستاندا ءوتۋى جوسپارلانعان «كاسپي بەستىگى» مەملەكەتتەرىنىڭ بەسىنشى ءسامميتى ءۇشىن اسا ماڭىزدى كەزەڭ بولىپ تابىلادى. «ارنايى جۇمىس توپتارىندا كاسپي تەڭىزىنىڭ قۇقىقتىق مارتەبەسىن رەتتەۋ جونىندەگى كەلىسسوزدەر باستالعالى 20  جىل ءوتىپتى. وسى كەزەڭ ارالىعىندا بارلىق تاراپتار اۋقىمدى جۇمىستار اتقارىپ، كاسپي تەڭىزىنىڭ قۇقىقتىق رەجيمىنە قاتىستى جەكەلەگەن ەلەمەنتتەر كەلىسىلدى. ايتارلىقتاي سالماقتى قۇقىقتىق بازاعا قاراماستان، «كاسپي بەستىگى» ءارتۇرلى باعىتتاعى حالىقارالىق كەلىسىمدەردى دايىنداۋ قارقىنىن ودان ءارى ۇدەتۋگە نيەتتى. بۇل قۇقىقتىق بازا ەڭ ءبىرىنشى كەزەكتە قۇزىرەتتى ورگاندار اراسىنداعى جەكەلەگەن باعىتتار بويىنشا كاسپي تەڭىزىنىڭ قاۋىپسىزدىك سالاسىنداعى ىنتىماقتاستىق تۋرالى كەلىسىمگە ۆەدومستۆوارالىق حاتتامانى ازىرلەۋ ماسەلەسىن قامتىپ وتىر» ، - دەدى مينيستر ە. ىدىرىسوۆ.

ونىڭ ايتۋىنشا، اتالمىش كەلىسىم نەگىزدەمەلىك قۇجات بولىپ تابىلادى. ءارى كاسپيدەگى قاۋىپسىزدىكتى قامتاماسىز ەتۋ ءۇشىن جانە قۇقىققا قايشى ارەكەتتەرمەن كۇرەس بويىنشا تەڭىز ماڭىنداعى مەملەكەتتەردىڭ ءوزارا ارەكەتتەستىگى ءۇشىن قۇقىقتىق نەگىز قالىپتاستىرادى.

«بۇدان بولەك، بۇگىنگى تاڭدا تاراپتاردىڭ قاراۋىندا كەلەشەك ىنتىماقتاستىقتى دامىتۋعا نەگىز بولاتىن ءبىرقاتار ماڭىزدى كەلىسىمشارت جوبالارى جاتىر» ، - دەدى س ءى م باسشىسى.

 

 اۆتور: قانات مامەتقازى ۇلى