وتەپقالي قۇرالوۆ: وليمپيادا ويىندارىن ەڭ العاش تۇركىلەر وتكىزە باستاعان

استانا. قازاقپارات - وليمپيادا ويىندارىن العاش رەت گرەكتەر ەمەس، تۇركىلەردىڭ اتا-بابالارى وتكىزگەن.

قازاقستاننىڭ ەڭبەك سىڭىرگەن باپكەرى وتەپقالي قۇرالوۆ وسىلاي دەيدى. ءوز زەرتتەۋلەرىنىڭ ناتيجەسىندە تۇتاس كىتاپ جازىپ شىققان اۆتور تاريحي دايەكتەردى دە كەلتىرەدى.

«پروتوتۇركىلەر جانە انتيكالىق ويىنداردىڭ ومىرگە كەلۋى» دەپ اتالاتىن 135 بەتتىك كىتاپ ەۋرازيالىق كوشپەندىلەردىڭ تاريحىنا ارنالعان. باسىلىم اۆتورى 150 گە جۋىق انىقتامانى، سوزدىكتەر مەن مۇراعات ماتەريالدارىن زەرتتەي كەلە، وليمپيادالىق ويىنداردىڭ باستاماسى بولعان سپورتتىق جارىستاردى العاش رەت ەجەلگى ءتاڭىرشىل نومادتار وتكىزۋى مۇمكىن دەگەن توقتامعا كەلگەن، دەپ جازادى khabar.kz.

«وليمپيادا ويىندارى العاش رەت ءبىزدىڭ داۋىرىمىزگە دەيىنگى 776-جىلى ءوتتى. ال تاڭىرشىلدىك ويىندار مىڭداعان جىل بۇرىن بولعان»، - دەيدى ق ر قۇرمەتتى سپورت قايراتكەرى، ەڭبەك سىڭىرگەن باپكەر وتەپقالي قۇرالوۆ.

اۆتوردىڭ پىكىرىنشە، پروتوتۇركىلەر جابايى اتتى ۇيرەتكەن سوڭ، سپورتتىق جارىستار وتكىزە باستاعان. ەجەلگى كوشپەلىلەردە تەك ات ويىندارىنىڭ 39 ءتۇرى بولعان. بۇعان كۇرەس، اسىق پەن ساداق اتۋدى قوسىڭىز. كونە ويىنداردىڭ كەيبىر تۇرلەرى قازىرگى وليمپيادا ويىندارىندا دا كەزدەسەدى. سپورت قايراتكەرى گرەكياعا بۇل ءداستۇر نومادتارمەن بىرگە باردى دەيدى.

وتەپقالي قۇرالوۆ وليمپيادا الاۋى ەندى افينىدا ەمەس، استانا نە الماتىدا جاعىلاتىنىنا سەنىڭكىرەمەيدى. دەگەنمەن ەڭبەگىنىڭ ەلەۋسىز قالمايتىنىنا ءۇمىتتى.

«وليمپيادا ويىندارىن تۇركى-گرەكتىك وليمپيادا ويىندارى دەپ اتاۋعا بولادى. سوندا قۇدا دا تىنىش، قۇداعي دا تىنىش بولادى»، - دەيدى ول.

تەك حالىقارالىق وليمپيادا كوميتەتىنىڭ شەنەۋنىكتەرى قازاقستاندىق اۆتوردىڭ ەڭبەگىمەن تانىسىپ، باستامانى قولدايدى دەۋ قيىن. قۇرالوۆتىڭ كىتابىنىڭ تارالىمى نەبارى - 3 مىڭ دانا.