قازاقستاندا ءسىبىر جاراسى بويىنشا جاعداي ۋشىققان جوق
«ءسىبىر جاراسى تۋرالى فاكت تەك قاراعاندى وبلىسىندا عانا راستالدى. الماتى وبلىسىندا بۇل ءالى راستالعان جوق. سوندىقتان دا، مەنىڭ ويىمشا، جاعداي سونشالىقتى الاڭدايتىنداي ۋشىققان ەمەس، دەگەنمەن ماسەلەلەر بارشىلىق» ، - دەدى دەپارتامەنت باسشىسى. بۇل رەتتە ديرەكتور قاراعاندىداعى وقيعاعا توقتالا كەلە، وندا دەنساۋلىق ساقتاۋ قىزمەتىنىڭ جەدەل ارەكەت ەتىپ، نازار اۋدارماعانى ۇلكەن پروبلەما بولعانىن ايتادى. «ادام ءبىر اپتاعا جۋىق مەديتسينالىق كومەكتەن تىس قالعان، سونىڭ سالدارىنان ەكى بىردەي كىسى ءولىمى ورىن الدى. ونىڭ ورىن الۋى دا زاڭدى، ويتكەنى ءتيىستى ارەكەتتەر اتقارىلمادى» ، - دەيدى س. ىبرايەۆ.
ايتا كەتەرلىگى، قازىرگى تاڭدا قازاقستاننىڭ ەت وداعى ۆەتەريناريا سالاسىندا اۋقىمدى رەفورمالار جۇرگىزۋدى، سونىمەن بىرگە ۆەتەرينارلىق باقىلاۋدى كۇشەيتۋ قاجەتتىگىن كوتەرگەن بولاتىن. ويتكەنى، ەلدەگى سوڭعى وقيعالارعا بايلانىستى كورشىلەس رەسەي قازاقستاندىق ەكسپورتتاۋشىلاردىڭ ونىمىنە شەكتەۋ ەنگىزگەن.
مينيسترلىك وكىلىنىڭ ايتۋىنا قاراعاندا، قازاقستاندىق تاراپ رەسەيدىڭ ۆەتارينارلىق باقىلاۋ قىزمەتىمەن كەلىسسوزدەر جۇرگىزىپ، قازاقستاندىق ەت ونىمىنە شەكتەۋدى الىپ تاستاۋ ماسەلەسىن قوزعاۋدا. «ءبىز كەلىسسوزدەردى جۇرگىزىپ جاتىرمىز. جاقىن ارالىقتا بۇل ماسەلە ءوز شەشىمىن تابادى دەپ ويلايمىن» ، - دەدى دەپارتامەنت باسشىسى.
اۆتور: قانات مامەتقازى ۇلى
