قازاقستاندا پاتەرلەر جارتى جىل ىشىندە بىرنەشە ميلليونعا ارزاندادى
سونىمەن قاتار، ءبىرىنشى جارتى جىلدىقتا ەڭ ارزان تۇرعىن ءۇي ورال قالاسىندا تىركەلگەن. وندا پاتەرلەردىڭ باعاسى 30 پايىزعا دەيىن تومەندەپ، شارشى مەترى ءۇشىن 84 مىڭ تەڭگە بولعان. ياعني، ورالدا ماۋسىم ايىندا 40 شارشى مەترلى پاتەر قاڭتار، اقپان ايلارىمەن سالىستىرعاندا 3,4 ميلليون تەڭگەگە ارزان بولدى.
ال تارازدا ساتىپ الۋشىلار 2,5 ميلليون تەڭگە ۇنەمدەي الدى. وندا پاتەردىڭ شارشى مەترى 32 مىڭ تەڭگەنى قۇراعان. ال اقتوبەدەگى پاتەرلەردىڭ باعاسى شامامەن 25 پايىزعا نەمەسە شارشى مەتر ءۇشىن 58,5 مىڭ تەڭگە بولعان. ايتا كەتەيىك، ەلىمىزدە جالپى ستاندارتتى 40 شارشى مەترلى پاتەر 2,3 ميلليونعا ارزانداعان.
اقتاۋ، قاراعاندى، وسكەمەن قالالارىندا جىلجىمايتىن مۇلىك نارىعىندا پاتەردىڭ باعاسى قاڭتار ايىنان باستاپ 23 پايىزعا تۇسكەن (- 100 مىڭ، - 62 مىڭ جانە -55 مىڭ). وسىلايشا قازىر بۇل قالالاردىڭ تۇرعىندارى پاتەردى باسقا قالالارمەن سالىستىرعاندا شامامەن 3 ميلليونعا ارزان ساتىپ الادى. ال پەتروپاۆلدا ورتاشا ستاتيستيكالىق ءبىر بولمەلى پاتەردىڭ باعاسى 17 ميلليون تەڭگەگە تۇسكەن. جىلدىڭ باسىنان بەرى پاتەرلەردىڭ باعاسى 18,6 پايىزعا تومەندەپ، شارشى مەترى 42 مىڭ تەڭگەنى قۇراعان.
شىمكەنتتە پاتەرلەردىڭ باعاسى 2 ميلليون تەڭگەگە تۇسكەن. ال استانا مەن الماتىداعى مۇلىك نارىعىندا باعانىڭ 15 پايىزعا دەيىن تومەندەۋى بايقالادى. مۇندا شارشى مەتر 61 بەن 64 مىڭ تەڭگەگە دەيىن ارزانداعان. ستاندارتتى پاتەردىڭ باعاسى بۇل قالالاردا جىلدىڭ باسىمەن سالىستىرعاندا 2,5 ميلليونعا تۇسكەن.
سونىمەن قاتار، مامانداردىڭ ايتۋىنشا، 2016-جىلدىڭ ەكىنشى جارتىسىندا نارىقتا بارلىق قالالاردا باعانىڭ ءتۇسۋى بايقالدى.
«ەڭ ارزان پاتەر تاراز بەن اقتوبەدە (شارشى مەتر ءۇشىن 171000 - 180000 تەڭگە). ال ەڭ قىمبات پاتەرلەر الماتى، استانا جانە اقتاۋدا ەكەنى انىقتالدى. الماتىدا پاتەردىڭ باعاسى شارشى مەتر ءۇشىن 370 مىڭ تەڭگە»، - دەدى ماماندار.
وسىعان دەيىن ساراپشىلار ەلىمىزدە جىل سوڭىنا دەيىن باسپانا ارزانداي تۇسەتىنىن ايتقان ەدى. ولاردىڭ پىكىرىنشە، باستاپقى التى اي ىشىندە باسپانانىڭ باعاسى تۇبەگەيلى ارزاندامايدى.
