10:55, 04 - شىلدە 2016 | GMT +5
عالىمدار ينەنىڭ ۇشىنا ورنالاستىرۋعا بولاتىن مەديتسينا كامەراسىن جاسادى
استانا. قازاقپارات - گەرمانياداعى شتۋتگارت ۋنيۆەرسيتەتىنىڭ زەرتتەۋشىلەرى 3D باسپا تەحنولوگياسىنىڭ كومەگىمەن كولەمى ينەنىڭ ۇشىنداي عانا جاڭا مەديتسينالىق كامەرا جاسادى. بۇل تۋرالى naked-science.ru حابارلادى.
ادام دەنەسىنىڭ ىشكى بەينەسىن الۋ - وتە كۇردەلى جۇمىس. وسى ماسەلەنى شەشۋ ءۇشىن زەرتتەۋشىلەر تۇزدىڭ كىشكەنە دانىندەي كۇردەلى لينزا جۇيەسىن ويلاپ تاپتى، ونىڭ كىشكەنتايلىعى سونداي مەديتسينالىق ينەنىڭ ىشىنە ورنالاستىرۋعا بولادى. بۇل قۇرال مەديتسيناداعى جاڭالىق قانا ەمەس، الداعى ۋاقىتتا سمارتفون، درون سەكىلدى باسقا دا اپپاراتتارعا وتە كىشكەنتاي كامەرالار جاساۋعا مۇمكىندىك بەرەدى.
عالىمدار ءۇش وبەكتيۆتەن تۇراتىن كامەرانى 3D باسپا تەحنولوگياسىنىڭ كومەگىمەن جاسادى. ولاردىڭ ايتۋىنشا، وسىنداي ادىسپەن 10 ميكرومەترگە دەيىنگى دالدىكپەن وپتيكالىق لينزا جۇيەسىن ازىرلەپ شىعۋعا بولادى.
