رەسەي تۇركياعا تۋريستىك جولدامالار ساتۋعا قويىلعان شەكتەۋدى جويدى
بۇدان بولەك، جارلىقتا تۇركيا بيلىگىمەن كەلىسسوزدەر وتكىزۋ جونىندە تاپسىرما بەرىلگەن. سونىڭ اياسىندا تۇركيادان ەنەتىن كەيبىر يمپورتتىق تاۋارلارعا شەكتەۋ جويىلۋى مۇمكىن.
بۇعان دەيىن پۋتين ەلشىلەردىڭ قاتىسۋىمەن وتكەن جيىندا ماسكەۋ انكارامەن ەكىجاقتى ىنتىماقتاستىقتى قايتا جانداندىرۋ ءۇشىن ءبىرقاتار شارالار قابىلدايتىنىن ايتقان بولاتىن. پرەمەر-مينيستر دميتري مەدۆەدەۆ بولسا، سانكتسيالاردى الۋ رەسەيلىك وندىرۋشىلەرگە كەسىر تيگىزبەۋ ءۇشىن كەزەڭ-كەزەڭىمەن جۇزەگە اساتىنىن ءمالىم ەتكەن.
تۇركياعا قارسى سانكتسيالار اتالعان ەلدىڭ ا ا ك رەسەيلىك سۋ-24 بومبالاۋشى ۇشاعىن اتىپ تۇسىرگەننەن كەيىن ەنگىزىلگەن. تۇركيا رەسەيلىك ۇشاق شەكارا بۇزدى دەسە، رەسەي ونى مويىنداماعان بولاتىن.
27- ماۋسىم كۇنى تۇركيا پرەزيدەنتى رەجەپ تايىپ ەردوعان اتىپ تۇسىرىلگەن ۇشاققا قاتىستى ءوز وكىنىشىن (كرەملدىڭ نۇسقاسى بويىنشا - كەشىرىم سۇراعان) جەتكىزىپ، رەسەي مەن تۇركيا اراسىنداعى قارىم-قاتىناستى قالپىنا كەلتىرۋ ءۇشىن قولدان كەلگەننىڭ ءبارىن جاساۋعا دايىن ەكەندىگىن ايتقان.
