اتىشۋلى ەرمەگيايەۆ ىسىندەگى باستى كۇدىكتى نادىربايەۆ كىناسىن تولىق مويىندادى

استانا. قازاقپارات - تالعات ەرمەگيايەۆتىڭ وققاعارى ءارى سەنىمدى تۇلعاسى سايات نادىربايەۆ ءوز كىناسىن تولىق مويىنداپ، قىلمىسقا قاتىستى وكىنەتىنىن ءبىلدىردى.

ول سونىمەن قاتار، پروتسەسسۋالدىق كەلىسىم قورىتىندىسى تۋرالى ءوتىنىش بەردى.

28 -ماۋسىم كۇنى استانا قالالىق پروكۋراتۋراسى كۇدىكتىنىڭ بەرگەن ءوتىنىشىن قاناعاتتاندىردى، وسىعان بايلانىستى نادىربايەۆپەن مامىلە تۇرىندەگى كەلىسىم جاسالدى، ول بويىنشا كۇدىكتىگە 3 جىلعا باس بوستاندىعىنان ايىرۋ تۋرالى شارتتى جازا بەلگىلەنەدى. قازىرگى كۇنى ءىس سوتتىڭ قاراۋىنا جىبەرىلگەن.

ايتا كەتەيىك، سايات نادىربايەۆ - «استانا ەكسپو-2017» ۇ ك» ا ق ەكس-باسقارما ءتوراعاسى تالعات ەرمەگيايەۆتىڭ سەنىمدى تۇلعاسى. باسشىسىنىڭ تاپسىرماسى بويىنشا نادىربايەۆ ەكسپو-2017 كورمەسى اياسىنداعى جىمقىرىلعان جانە قولما قول اقشاعا اينالدىرىلعان قاراجاتتى ەرمەگيايەۆقا بەرىپ وتىرعان. بۇل فاكتىنى سوتتالۋشىنىڭ ءبىرى مارس شورمانوۆ («كومپانيا ادس» ج ش س ەكس- پرەزيدەنتى) تا مويىنداعان، ول سوتتا 937 ميلليون تەڭگە شاماسىندا قولما- قولعا اينالدىرىلعان اقشانى ەرمەگيايەۆقا ونىڭ سەنىمدى تۇلعاسى نادىربايەۆ ارقىلى بەرگەنىن ايتقان ەدى.

«جالپى نادىربايەۆ بەس مارتە شورمانوۆتان 200-300 ميلليون تەڭگە شاماسىندا اقشا الىپ، ونى ەرمەگيايەۆقا بەرىپ وتىرعان. الايدا، نادىربايەۆ ايىبىن مويىندايتىن بولعاندىقتان، ەرمەگيايەۆتىڭ باسقا دا سەنىمدى تۇلعالارى ونىڭ تەرگەۋدەن قاشۋىن ۇيىمداستىرعان. ەرمەگيايەۆتىڭ باۋىرى ن. مولداشەۆ پەن ونىڭ تانىسى س. ەرەجەپ جانە باسقا دا تۇلعالار جەتى اي بويى نادىربايەۆتى ءارتۇرلى پاتەرلەردە جاسىرىپ كەلگەن. ىزدەۋ شارالارىنىڭ ناتيجەسىندە 28 -ناۋرىزدا نادىربايەۆتى سىبايلاس جەمقورلىققا قارسى كۇرەس قىزمەتكەرلەرى ۇستادى. ءوز كەزەگىندە نادىربايەۆتىڭ جۇبايى - ايدا نادىربايەۆا تەرگەۋگە كەدەرگى كەلتىرىپ، شاتاستىرۋ ماقساتىندا ب ا ق ارقىلى بىرنەشە مارتە مالىمدەمە جاساپ، جالعان ايعاقتار كورسەتكەن، كۇيەۋىنىڭ ۇرلانعانىن، ونىڭ زاڭسىز باس بوستاندىعىنان ايىرىلعانىن، وعان سىبايلاس جەمقورلىققا قارسى كۇرەس قىزمەتكەرلەرىنىڭ تاراپىنان زورلىقتار جاسالعانىن ايتقان. ال جالعان كىسى ۇرلاۋدى ۇيىمداستىرۋشىلار تالعات ەرمەگيايەۆتىڭ سەنىمدى تۇلعالارى بولىپ وتىر. قازىرگى تاڭدا نادىربايەۆتىڭ تەرگەۋدەن قاشۋىن ۇيىمداستىرعاندارعا قاتىستى قىلمىستى جاسىرعانى ءۇشىن ايىپ تاعىلىپ، ولار قىلمىستىق جاۋاپكەرشىلىككە تارتىلۋدا»، - دەلىنگەن باسپا ءسوز بايانىندا.

اۆتور: قانات مامەتقازى ۇلى