ەلىمىزدىڭ جاھاندىق وركەنيەتكە باتىل ارالاسىپ، حالىقارالىق ارەنادا زور ابىرويعا جەتۋى - قازاقستاننىڭ جارقىن بولاشاعىن كورسەتەدى - قازاقستان جازۋشىلار وداعى
سىرتقى قاتىناستا كوپۆەكتورلىقتى ۇستانعان ەلىمىزدىڭ ساياساتى ۇتىمدىلىعىن تانىتىپ كەلەدى. بۇگىن تاعى دا سوعان كوز جەتكىزدىك. بۇل تۋرالى قازاقستان جازۋشىلار وداعى جولداعان قۇتتىقتاۋدا ايتىلعان.
«ەلىمىز بىرىككەن ۇلتتار ۇيىمىنىڭ قاۋىپسىزدىك كەڭەسىنە تۇراقتى ەمەس مۇشەلىككە ءوتتى. قازاقستان 138 داۋىسپەن توپ جارىپ وتىر. بۇل حالىقارالىق ارەناداعى مەملەكەتتىلىكتىڭ ۇلكەن جەڭىسى. اسىرەسە ونىڭ تاۋەلسىزدىگىمىزدىڭ 25 جىلدىعى تۇسىندا بىزگە بۇيىرۋىن، تاعدىردىڭ سىيى دەپ قاراعان ءجون»، - دەلىنگەن حابارلامادا.
ەلىمىزدىڭ مۇنداي باس اينالدىرار تابىسقا قول جەتكىزۋىن قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىش ۇلى نازاربايەۆتىڭ ەڭبەگى دەپ ءتۇسىنۋىمىز كەرەك. ونىڭ حالىقارالىق سامميتتەرگە قاتىسىپ، اۋقىمدى جانە ايماقتىق قاۋىپسىزدىك جايلى سوزدەرى، اسىرەسە، 2015 -جىلعى ب ۇ ۇ اسسامبلەياسىنداعى انتيادرولىق ۇستانىمى ءسوزسىز ىقپال ەتتى. سونداي- اق، جاھاندانۋ داۋىرىندە مەملەكەت قۇرۋدىڭ ەۋرازيالىق ۇلگىسىنە نەگىزدەلگەن قازاقستاندىق مودەلىن قالىپتاستىردى.
نە بارى تاۋەلسىزدىگىنە 25 جىل تولىپ وتىرعان ەلىمىزدىڭ جاھاندىق وركەنيەتكە باتىل ارالاسىپ، حالىقارالىق ارەنادا زور ابىرويعا جەتۋى - قازاقستاننىڭ جارقىن بولاشاعىن كورسەتەدى.
بەيبىتسۇيگىش ەلىمىزدى، ونىڭ ەلباسىن ءساتتى قادامدارىمەن قۇتتىقتايمىز! ۇلى دالا ەلىنىڭ مارتەبەسى اسقاقتاي بەرسىن.
ەلىمىزدىڭ تاۋەلسىزدىگى ماڭگى بولعاي!
