گولوۆكين الماتىدا ءوزىن زارىعا كۇتىپ جاتقان ەكى ناۋقاس بۇلدىرشىنمەن كەزدەستى
«ارماندار ورىندالادى. اسىرەسە بالالاردىڭ ارمانى. تەك، كامىل سەنۋ كەرەك. بۇگىن قوس ءبۇلدىرشىننىڭ ارمانى ورىندالدى. چەمپيون ءوزى كەلىپ، ولارعا تەز ساۋىعىپ كەتۋىن تىلەدى. ەندى ولار ءوز سىرقاتتارىن نوكاۋتقا جىبەرۋگە ءسوزسىز كۇش تابادى دەپ ويلايمىن.
عاجايىپ قازىردەن باستاپ بولىپ جاتقان سەكىلدى - رۇستەمنىڭ دەنەسى جانسىزدانعان بولاتىن، الايدا گەنامەن كەزدەسەمىن دەپ كۇتكەندىكتەن ءارى ونىڭ سىيلىعىنىڭ ارقاسىندا بالاقايدىڭ قولى قوزعالا باستادى. ول گولوۆكيننىڭ قولىن قىسىپ، امانداسا الدى. ال گەنا ءوزىن قاشان دا باتىرلار سەكىلدى ۇستايدى عوي. وكىنىشكە قاراي، بۇعان دەيىنگى ونىمەن كەزدەسۋ جايلى وتىنىشتەرىمىز وعان جەتپەگەن بولىپ شىقتى. تەك ونىڭ وزىنە جەكە ءبىزدىڭ شاقىرتۋىمىزدى ەستىرتكەننەن كەيىن عانا ول ناۋقاس بۇلدىرشىندەر ونىمەن كەزدەسۋدى زارىعا كۇتىپ جاتقانى جايلى حاباردار بولدى. ول بارلىق ءىسىن جيىستىرىپ قويىپ، اۋرۋحاناعا كەلدى. گەناديدىڭ جالعىز ءوتىنىشى - ب ا ق وكىلدەرىنىڭ بولماۋىن سۇرادى. بۇل ونىڭ قاراپايىمدىلىعى مەن ناعىز ەر ازاماتقا ءتان مەيىرىمدىلىگىن كورسەتەدى. ءبىز اڭىز ادامدى ءوز كوزىمەن كورگەن بالاقايلار ەندى عاجايىپقا ءسوزسىز سەنىپ، جازىلىپ كەتەدى دەپ ويلايمىز»، - دەپ جازدى «بالالاردىڭ ارمانىن ورىندايىق» اتتى كەزدەسۋدى ۇيىمداستىرۋشى الەۋمەتتىك جەلىدە.
