سارى اعاشتىق ديقاندار قاربىزدارىن شەتەل اسىرىپ ۇلگەردى

استانا. قازاقپارات - سارى اعاش اۋدانىنىڭ ديقاندارى العاشقى ونىمدەرىن قىر اسىرا باستادى.

ماسەلەن، بوزاي اۋىلدىق وكرۋگىنىڭ شارۋالارى ەلىمىزدىڭ سولتۇستىك وڭىرلەرىن ەسەپتەمەگەندە، كورشىلەس رەسەي مەملەكەتىنە 137 توننا قاربىز جونەلتتى.

 ەككەن ءونىمدى ساۋدالاپ، قارجى كوزىنە اينالدىرۋ ماسەلەسى اۋداندا جاقسى جولعا قويىلعان. ول ءۇشىن سارى اعاشتا لوگيستيكالىق ورتالىقتار مەن تەمىر جول جەلىسى كۇندىز- ءتۇنى جۇمىس ىستەپ تۇر.

بۇگىنگى كۇننىڭ وزىندە وندا قاربىزدان باسقا ەرتە پىسەتىن جەمىستەر ورىك، شيە، قۇلپىناي، قاراورىك پەن كوكونىس ونىمدەرى ساتىلىمعا شىققان. مۇنان بولەك، الداعى ون كۇن كولەمىندە ەرتە پىسەتىن كارتوپ پەن قاۋىن بازار سورەلەرىنە شىعادى دەپ جوسپارلانۋدا.

ايتا كەتەيىك، بيىل سارى اعاش اۋدانىندا 77460 گەكتار جەرگە اۋىل شارۋاشىلىعى ونىمدەرى ەگىلگەن، دەپ جازادى otyrar.kz.