اقتوبەدە ەكى جاسار ءبۇلدىرشىن التىنشى قاباتتان قۇلاپ، امان قالدى
وقيعا 28 -مامىردا، كوشەدە جۇرگەن تۇرعىنداردىڭ كوز الدىندا بولدى.
ايانانى جانساقتاۋ بولىمىنەن نەيروحيرۋرگياعا اۋىستىردى. ونىڭ ىشكى ورگاندارى جانشىلىپ، يەگى جاراقاتتانعان، بالانىڭ جالپى جاعدايى تۇراقتى.
دارىگەرلەر مەن كۋاگەرلەر بالانىڭ بىردە-ءبىر جەرى سىنباعانىنا تاڭ بولىپ وتىر. قازىر ايانا اۋرۋحانادا، سويلەيدى، وينايدى، جاعدايى جاقسى.
«بۇل ۋاقىتتا بالالار دالادا جۇرگەن، ءبارى بولعان جايدى كورگەن سوڭ قورقىپ، جىلادى. ولار قىزدىڭ كوزى اق بولعانىن، اۋزىنان قان اققانىن ايتتى. ول قوزعالىسسىز جاتتى، ءتىپتى جىلاعان دا جوق. انام دارىگەر، جۇگىرىپ بارىپ وعان العاشقى كومەك كورسەتتى، مۇز قويدى. ءۇي جانىندا بالالار حيرۋرگى تۇراتىن، ول دا كومەك كورسەتتى. سوسىن قىزدىڭ اكەسى كەلدى. وعان انام مەن حيرۋرگ بالاعا تيىسپەۋدى، ونىڭ سىنعان جەرلەرى بولۋى مۇمكىن ەكەنىن ايتتى. اكەسى تىڭداماي، قىزىن قولىنا الدى. جەدەل جاردەم جىلدام جەتىپ، ونى الىپ كەتتى»، - دەدى وقيعاعا كۋا بولعان جاننا.
ايانانىڭ اناسى ءالى ءوز-وزىنە كەلە الماي وتىر.
«ۇيدە قوناق بولعان، مەن تاماق دايىنداپ جاتىر ەدىم، - دەيدى ول، - ءبىز بالكونداعى تەرەزەنى جاپقاندا، بالالار اشپاس ءۇشىن تۇتقانى الىپ تاستايمىز. ايانا شكافتان تۇتقانى الىپ، ءوزى اشقان. ۇلىم ايانا تەرەزە الدىنداعى تاقتايدا ءىلىنىپ تۇرىپ، قۇلاپ كەتكەنىن كورگەنىن ايتتى. كورشىلەر قوڭىراۋ شالىپ ايتتى، تەرەزەدەن قاراسام، ول جەردە جاتىر. بۇل جايىندا ايتۋ دا وڭاي ەمەس. ايانا وتە بەلسەندى بالا. قازىر ءوز-وزىنە كەلدى. ازداپ وينايدى، ءوزى تاماق جەيدى. قوزعالادى. ازداپ السىزدەۋ، ارينە. ەندى ءبىر سەكۋند تا قاراۋسىز قالدىرمايمىن. ەندى بۇل ۇيدە تۇرعىم كەلمەيدى، جەر ۇيگە كوشەمىز».
