تاتۋيروۆكانىڭ تارتقىزار تاۋقىمەتى

استانا. قازاقپارات - «تاتۋيروۆكانىڭ تارتقىزار تاۋقىمەتى». بۇل ماتەريال «وڭتۇستىك قازاقستان» گازەتىندە ءبىرشاما ۋاقىت بۇرىن جاريالانعان ەكەن.

بۇگىنگى قوعامدا بۇل تاقىرىپتىڭ ماڭىزدىلىعىن ەسكەرە كەلە، وقىرماندار نازارىنا ۇسىنعاندى ءجون كوردىك.

تابيعي جاراتىلعان كەلبەتىنە كوڭىلى تولمايتىندار ءۇشىن «باس اۋىرتار» ماسەلە جوق، قازىر. قاسى ۇناماسا سىزىپ الادى، ەرنى ۇناماسا دالاپ دايىن. ءتىپتى، تاتۋيروۆكا ارقىلى دەنەسىنە ىرىلى-ۇساقتى سۋرەت سالدىراتىن «ەرەكشەلەنگىشتەر» قاپتاپ كەتتى. مۇنىڭ ءبارى دەنەگە سۋرەت سالدىرۋدىڭ سوڭى نەگە اپارىپ سوعاتىنىن بىلمەگەندىكتەن.

باتىس ەلدەرىندە تاتۋيروۆكاعا ورتا عاسىر شەنىندە-اق تىيىم سالىنعان. ويتكەنى, دەنەنى تاتۋاج بەن پيرسينگ ارقىلى تەسۋ قاتەرلى ىسىك اۋرۋلارىنىڭ پايدا بولۋىنا اكەلىپ سوعاتىنى دالەلدەنگەن. وعان قوسا دەنەنى تەسۋ ادام دەنەسىندەگى ۇساق اۋرۋلاردىڭ كۇش الۋىنا اپارىپ سوعادى ەكەن. حالىق دەنساۋلىعىن باعالايتىن مەملەكەتتەردە دەنەگە سۋرەت سالۋعا شەكتەۋ قويىلعان.

قازاق حالقى ءۇشىن دە بۇل دۇنيە - جات. اتا- بابالارىمىز مۇنداي تاڭبالاردى تەك مالعا قولدانعان. شاريعات بويىنشا مۇنداي تاسىلدەردى دەنە كەمىستىگىن جويۋ ماقساتىندا عانا قولدانۋعا بولادى. يسلامدا تابيعي قالىپتى وزگەرتۋگە رۇقسات ەتىلمەيدى.

تاتۋيروۆكا - تىنىق مۇحيتىن مەكەن ەتكەن تايپا اتى «تاتاۋ» سوزىمەن بايلانىستى. جەرگىلىكتى حالىق امەريكا ۇندىستەرى سەكىلدى شاشاق تاعىپ، دەنەسىنە سۋرەت سالدىرىپ جۇرگەن كورىنەدى. وركەنيەتتەن ادا قالعان «ارالدىقتاردىڭ» قاڭسىعىن تاڭسىق ەتىپ الدىق بۇگىندە.

تاتۋيروۆكانىڭ ۋاقىتشا جانە ءومىر باقي ساقتالاتىن ءتۇرى بار. ونىڭ ءبارى تەرىگە ەنەتىن بوياۋدىڭ حيميالىق قۇرامىنا بايلانىستى. سۋرەت سالۋدا قولدانىلاتىن بوياۋلار قۇرامىندا دەناتۋرات (سپيرت ءتۇرى) ، مەتيل سپيرتى, ەتيلەنگليكول، الدەگيدتەر سياقتى ۋلاعىش زاتتار بولادى. ءوز كەزەگىندە ولار ادام ساۋلىعىنا كەرى اسەرىن تيگىزبەي قويمايتىنى ايتپاسا دا تۇسىنىكتى. كەيبىر جاعدايلاردا سۋرەت سالىنعان دەنەدە اللەرگيا پايدا بولۋى دا مۇمكىن. دەنەدەگى سۋرەتتىڭ تيگىزەر زيانى ونىڭ كولەمىنە دە تىكەلەي قاتىستى.

زيانى عىلىمي تۇردە دالەلدەنگەن بۇل سانگە بىزدىڭ ەلدە توقتاۋ بولماي تۇر. دەنەگە سۋرەت سالدىراتىن ورىنداردىڭ قايدا ورنالاسقانىن بالاعا دەيىن بىلەدى. بۇرىندارى تەك شەتەلدىك فيلمدەردەن كورەتىن «تاتۋلار» قانداستارىمىزدىڭ تانىنە دە تاڭبا بولىپ تۇسۋدە.

قۇران كارىمدە: «ادام بالاسىن ەڭ كوركەم مۇسىندە جاراتتىم» دەلىنگەن. ال، دەنەگە سۋرەت سالىپ، وزگەرىس جاساۋ - جاراتقانعا قارسى كەلۋمەن پارا- پار. مۇسىلمان دەگەن اتقا كىر كەلتىرمەۋ ءۇشىن، سىرتقى سۇلۋلىقتان گورى ىشكى جان دۇنيەمىزدىڭ سۇلۋلىعىن جوعارى قويعانعا نە جەتسىن؟!

ايگەرىم ايتمۇحامبەتوۆا،

دەرەككوز: okg.kz