قازاقستاندىق دەلەگاتسيا قۇلجا قالاسىنداعى قازاق ورتا مەكتەبىنە باردى - فوتو
مەكتەپتە ەكسكۋرسيانى ونىڭ ديرەكتورى جانار يمانالى وتكىزدى.
ونىڭ ايتۋىنشا، بۇگىندە وقۋ مەكەمەسىندە 7-12 - سىنىپتار ارالىعىندا 1200 وقۋشى ءبىلىم الىپ جاتىر. مەكتەپتەگى گۋمانيتارلىق پاندەر قازاق تىلىندە، جاراتىلىستانۋ پاندەرى - قىتاي تىلىندە وتكىزىلۋدە. سونداي- اق بالالارعا اعىلشىن ءتىلى دە ۇيرەتىلەدى. تاڭەرتەڭنەن بەرى بارلىق بالالار ساباقتا بولسا، تۇستەن كەيىن ولاردىڭ دەمالۋعا نەمەسە مەكتەپ جانىندا جۇمىس ىستەپ وتىرعان 27 ۇيىرمەنىڭ بىرىنە بارۋعا مۇمكىندىگى بار.
بۇل مەكتەپتە كيىم ۇلگىسى سپورتتىق. بالالار سپورتتىق شالبار، كوگىلدىر ءتۇستى جەڭىل جەيدەلەر مەن كۇرتەشەلەر كيەدى. كەۋدەلەرىنە وقۋشى تۋرالى مالىمەتتەر جازىلعان بەيدج تاعادى.
مەكتەپ اۋلاسىندا 700 ادام تۇراتىن جاتاقحانا، دارەتحانالار جانە مونشا ورنالاسقان.
كۇن سايىن نەگىزگى قوڭىراۋ كەزىندە مەكتەپ الدىنداعى الاڭدا بي تۇرىندەگى سەرگىتۋ ءساتى وتكىزىلەدى. بالالار اۋەلى كۋنگ- فۋ امالدارىن كورسەتىپ، ودان كەيىن قارا جورعا بيلەرىن بيلەيدى.
اسحانادا ۇلدار مەن قىزدار بولەك تاماقتانادى. مۇندا قىتاي جانە ۇيعىر تاعامدارى بەرىلەدى. ناۋرىز مەرەكەسىندە بالالار ءۇشىن قازاقتىڭ ۇلتتىق تاعامدارى - ناۋرىز كوجە، باۋىرساق، قازاقشا ەت ازىرلەنەدى. اسحانادا بەينەباقىلاۋ جازباسى كورسەتىلەتىن ارنايى ەكران ورنالاسقان. وسىلايشا، بالالار اس دايىنداۋ بولمەسىندە نە ءپىسىرىلىپ جاتقانىن كورە الادى.
7 - سىنىپ وقۋشىسى كاريما بەردى قىزىنىڭ ايتۋىنشا، ونىڭ مەكتەپتەگى سۇيىكتى ءپانى - قازاق ادەبيەتى. قىز بالا اباي، مۇحتار اۋەزوۆ، فاريزا وڭعارسىنوۆا جانە مۇحتار شاحانوۆتىڭ شىعارمالارىن ءسۇيىپ وقيتىنىن ايتتى. ول بولاشاقتا قازاقستانعا بارىپ، وندا قازىرگى زامانعى اقىن- جازۋشىلارمەن تانىسۋدى ارماندايدى.
جانار يمانالىنىڭ تۇسىندىرۋىنشە، وبلىستا ءبىلىم بەرۋ تەگىن، سەبەبى مەملەكەت ورتا بىلىمگە جىل سايىن ءار بالاعا 2 مىڭ يۋان (شامامەن 100 مىڭ تەڭگە) ءبولىپ وتىرادى. بۇل سوما بارلىق شىعىنداردى وتەيدى. تولەنۋگە تيەسىلى تەك جاتاقحانا مەن تاماقتانۋ. جاتاقحانادا تۇرۋ باعاسى ءبىر توقساندا 200 يۋان (10 مىڭ تەڭگە)، تاماقتانۋ - كۇنىنە 14 يۋان (700 تەڭگە).
مەكتەپ 1935 -جىلدان بەرى جۇمىس ىستەپ كەلەدى، ونىڭ قابىرعاسىندا كوپتەگەن تانىمال قازاق قايراتكەرلەرى ءبىلىم الدى. پەداگوگيكالىق قۇرام ق ح ر ش ۇ ا ءو ۇلتتىق- ساياسي كونسۋلتاتيۆتىك كەڭەسىنىڭ بۇرىنعى ءتوراعاسى اسحات كەرىمباي مەن اتاقتى وپەرا ءانشىسى مايرا مۇحامەد قىزىنىڭ وسى مەكتەپتىڭ تۇلەكتەرى ەكەندىگىن ماقتانىش ەتەدى.
