اۆستراليادا كەنگۋرۋ شابۋىلىنان ەكى ادام جاراقات الدى

استانا. قازاقپارات - وڭتۇستىك اۆستراليادا كلەر شاتقالىن ۆەلەسيپەدپەن ارالاپ جۇرگەن ەكى ايەلگە كەنگۋرۋ شابۋىلدادى. 45 جاستاعى شارون گەنريحتىڭ قابىرعاسى سىنىپ، ىشكى قۇرىلىسىنا زاقىم كەلگەن، 47 جاستاعى حەلەن سولتەردىڭ ميى شايقالعان،

دەپ جازادى Australian Associated Press.

وتكەن سارسەنبى كۇنى كلەر شاتقالىنىڭ سۇلۋ تابيعاتىن تاماشالاپ، تۋريستىك 35 شاقىرىمعا سوزىلعان Riesling Trail ۆەلوجولىمەن كەلە جاتقان ەكى ايەلگە جەرگىلىكتى قوساياق جانۋار شابۋىل جاساعان.

گەنريح جولدىڭ شەتىندە تۇرعان كەنگۋرۋدى كورگەنىمەن وعان اسا ءمان بەرمەگەن. الايدا قالتالى جانۋار ايەلدى قوساياقتاپ تەۋىپ جىبەرگەن دە ەكىنشى كىسىگە ۇمتىلعان.

قازىر قابىرعاسى سىنعان گەنريحكە وتا جاسالماق.

ماماندار كەنگۋرۋدان ساقتانىپ ءجۇرۋدى ەسكەرتەدى. ولار ءىرى، بويى اداممەن بىردەي، ءارى بۇلشىق ەتتەرى كەرەمەت دامىعان قارۋلى، ادامدى مەرت ەتۋى مۇمكىن.