بيزنەسمەندەر: قازاق تىلىندە ءبىلىم العان جاستار بەدەلدى وقۋ ورنىنا تۇسە المايدى
«ۇشتىلدىلىك» ساياساتىن قولدايمىز دەپ وتىرعان كاسىپكەرلەر، شالعاي ەلدىمەكەندەردە تازا قازاق تىلىندە ءبىلىم العان جاستار بەدەلدى وقۋ ورىندارىنا تۇسە المايدى دەيدى.
بۇل تۋرالى 31 ارنا حابارلايدى.
سول سەبەپتى مەكتەپتەر مەن جوعارعى وقۋ ورىندارىندا، اسىرەسە، اعىلشىن تىلدەرىن جەتىك وقىتۋ كەرەكتىگىن العا تارتقان. دەگەنمەن بۇل باستامانى تانىمال قوعام بەلسەندىلەرى قاۋىپتى ساناپ، ءۇزىلدى-كەسىلدى قارسىلىق تانىتىپ وتىر.
«ۇشتىلدىلىكتى» قولداپ حات جولداعان ەلدەگى ءىرى كاسىپكەرلەر ءتىل ساياساتى قازىردىڭ وزىندە ناتيجەسىن بەرىپ جاتىر دەيدى. وتاندىق تانىمال بيزنەسمەندەر اتىنان باستاما ۇسىنعانداردىڭ ىشىندە ارمانجان بايتاسوۆ، كەڭەس راقىشەۆ، ءتىپتى مادەني شارالارعا جانى قالماي دەمەۋشىلىك تانىتىپ جۇرەتىن يسلامبەك سالجانوۆتار بار.
بۇل توپتىڭ ايتۋىنشا، «ۇشتىلدىلىك» ساياساتىن ەنگىزبەي الەمدىك وركەنيەتكە ىلەسە المايدى ەكەنبىز. ال ساياساتتانۋشى ءازىمباي عالي كاسىپكەرلەردىڭ بۇل باستاماسى قاۋىپتى ەكەنىن ايتادى.
«ونىڭ ەشقانداي دەموكراتياشىل باعىتى جوق. جالپى قازاق ماسەلەسىن شەشپەي، نە ساياسي رەفورما، نە ەكونوميكالىق رەفورما قازاقستاندا جۇرمەيدى. ءبىر قىزىعى 90-جىلداردىڭ ورتاسىنا تامان تاعى دا وسىنداي باستاما بولعان. ول كەزدە 90-جىلداردىڭ ەكونوميكالىق داعدارىسى بولعان»، - دەيدى ساياساتتانۋشى ءازىمباي عالي.
1994 -جىلى بولات ابىلەۆ باستاعان كاسىپكەرلەر ورىس ءتىلىن مەملەكەتتىك ءتىل ەتۋگە تالپىنعان. ول كەزدە دە تىڭ ۇسىنىستى ەشكىم قولداپ كەتپەدى. ساياساتتانۋشى قازاق تىلىنە تۇساۋ بولۋ - ۇلتتى سىيلاماۋمەن تەڭ دەپ ەسەپتەيدى. ال كوپشىلىك اراسىندا كاسىپكەرلەر ۇسىنىسىن قولدايتىندار نەكەن- ساياق.
قازىرگى تاڭدا ورتاشا ەسەپپەن قازاق بالالارىنىڭ 90 پايىزى قازاق مەكتەپتەرىنە بارادى. بۇل ەندى-ەندى تۇزەلىپ كەلە جاتقان احۋال. ال وزگە تىلدەردىڭ دامۋىن قوس قولداپ قولداپ وتىرعان كاسىپكەرلەردىڭ كەيبىرى مەملەكەتتىك تىلگە شورقاق ەكەنىن العا تارتادى ماماندار. ءارى «ۇشتىلدىلىك» ساياساتى مەكتەپ باعدارلاماسىنا ەنگىزىلسە، كوپشىلىك مەملەكەتتىك ءتىلدىڭ اياسى تارىلا ما دەپ الاڭدايدى.
