جەردى جالعا الۋدا جەرگىلىكتى اۋىل تۇرعىندارىنا باسىمدىق بەرۋ قاجەت

استانا. قازاقپارات - بۇگىن جەر رەفورماسى جونىندەگى رەسپۋبليكالىق كوميسسيانىڭ وتىرىسىندا ەكونوميكا بويىنشا جۇمىس توبىنىڭ جەتەكشىسى اقىلبەك كۇرىشبايەۆ اتالعان توپتىڭ جيىنىندا ايتىلعان پىكىرلەرمەن ءبولىستى.

«ءبىزدىڭ توپتاعى مۇشەلەردىڭ ويى بويىنشا، جەر - تاۋار ەمەس، جەر - ءوندىرىستىڭ قۇرامى. سوندىقتان وسى رەتتە بىرنەشە ۇستانىمداردى قاراستىردىق. بىرىنشىدەن، جەردى ساتىپ الۋعا تەك سول جەردى جالعا الىپ وتىرعان، جەرگە تەر توگىپ وتىرعان، جۇمىس ىستەگەن ادامدارعا عانا رۇقسات بەرۋىمىز كەرەك. بۇل جاعدايدا ءباسساۋدا (اۋكسيون) ارقىلى جەرىن ساتۋعا تىيىم سالىنادى. وسى تۇرعىدا جەردى قالتالى ادامدار ساتىپ الادى دەگەن كۇمانعا جاۋاپ رەتىندە ايتامىن»، - دەپ توقتالدى ا. كۇرىشبايەۆ.

سونىمەن قاتار جۇمىس توبىنىڭ جەتەكشىسى ەكىنشى ۇستانىمىن جاريا ەتتى.

«جەرىن ساتىپ العاننان كەيىن، بەلگىلەگەن مەرزىم ىشىندە قايتا ساتۋعا نەمەسە جالعا بەرۋگە شەكتەۋ ەنگىزۋ. بۇنداي تۇرعىدان قاراۋ الەمدىك تاجىريبەدە دە كوپ تارالعان. ال ءۇشىنشى ۇستانىمعا توقتالاتىن بولساق، جەردى جالعا الۋ كەزىندە ءوتىنىش بىلدىرگەن جەرگىلىكتى اۋىل تۇرعىندارىنا باسىمدىق بەرۋ مۇمكىندىگىن بەلگىلەۋ. مۇنداي شارالار دامىعان ەلدەردە كەڭىنەن قولدانىلادى، ال ءبىز ءۇشىن حالىقتىڭ اۋىلدىق جەردە تۇراقتانۋىنا سەپتىگىن تيگىزەدى. جالپى، بۇلاردىڭ بارلىعى جۇمىس توبىندا ايتىلعان پىكىرلەر»، - دەدى ا. كۇرىشبايەۆ.

اۆتور: رۋسلان عابباسوۆ